Archive | August, 2012

பண்பாட்டை விளக்கும் உன்னதத் திருவிழா

28 Aug

நமது நாட்டின் பண்பாட்டுச் சிறப்புக்கு அடையாளமாகத் திகழ்பவை பண்டிகைகள். ஒவ்வொரு பண்டிகைக்கும் தோற்றக் காரணம் உண்டு. மக்களை ஒன்றிணைப்பதும், மகிழ்ச்சியூட்டுவதுமே பண்டிகைகளின் அடிப்படை நோக்கம். அந்த வகையில் கேரள மக்களால் கொண்டாடப்படும் ஓணம் பண்டிகை தனிச் சிறப்பு மிக்கதாகும்.

‘பரசுராம க்ஷேத்திரம்’ என்று அழைக்கப்படும் பெருமை வாய்ந்த கேரளத்தை முன்னொரு காலத்தில் மகாபலி சக்கரவர்த்தி ஆண்டு வந்தார். இவர் பிரகலாதனின் பேரன். நல்லாட்சி நடத்தியதால் மக்களின் நன்மதிப்பைப் பெற்றவர். தான தர்மம் செய்வதில் நிகரற்றவராக விளங்கிய இவரது மனத்திலும் மாசு புகுந்தது. தானத்தில் தன்னை விஞ்ச ஆளில்லை என்ற ஆணவமும், தேவர்களை அடிமைப்படுத்திய அசுர குணமும் மகாபலிக்கு வினையாக அமைந்தன.

மகாபலி மன்னனின் ஆணவம் போக்கி தேவர்களைக் காக்க வாமன அவதாரம் எடுத்த மகாவிஷ்ணு, மூன்றடி நிலம் தானம் கேட்டுப் பெற்றார். மகாபலியை சம்ஹரித்தார் என்பது புராணக் கதை. ஓரடிக்கு மண்ணையும் மற்றோர் அடிக்கு விண்ணையும் அளந்த வாமனனின் விஸ்வரூப தரிசனம் கண்ட மகாபலி சக்கரவர்த்தி, மூன்றாம் அடிக்கு தனது தலையையே அளித்தார். அதன் மூலம் இறையருள் பெற்றார்.

எனினும் நல்லாட்சி நடத்திய நாயகனான மகாபலி, ஆண்டுதோறும் மலையாள சிங்கம் மாதம், திருவோண நட்சத்திரத்தன்று தனது நாட்டைக் காண வந்து செல்ல வரம் கேட்டுப் பெற்றார் என்பது மக்களின் நம்பிக்கை.

அதன்படி தங்களது சுபிக்ஷம் காண வரும் மன்னன் மகாபலியை வரவேற்க, அந்நாட்டு மக்கள் புத்தாடை புனைந்து, ஒன்பது சுவை உணவுடன், வாசலில் மலர்க் கோலமிட்டு, சாகச விளையாட்டுகளுடன் விழா கொண்டாடுகின்றனர். இதுவே ஓணம் பண்டிகையின் தாத்பரியம்.

மலையாள மக்கள் அனுசரிக்கும்  ‘கொல்ல வருஷம்’ என்ற நாள்காட்டியின் முதல் மாதமான சிங்கம் மாதத்தில் ஹஸ்த நட்சத்திரம் துவங்கி திருவோணம் நட்சத்திரம் வரையிலான பத்து நாட்களும் கொண்டாடப்படுவதே ஓணம் பண்டிகை. மாநிலம் முழுவதும் அறுவடை முடிந்து வீடுதோறும் செல்வம் குவிந்திருக்கும் சூழலில் இப்பண்டிகை வருகிறது. மக்களுக்கு ஆனந்தம் தருகிறது.ஸ

ஒரு நாட்டின் பண்பாட்டின் சின்னமாக விளங்குபவை ஆடைகளும் உணவு வகைகளும் தான். அதன்படி, மலையாளிகளுக்கே உரித்தான ‘கசவு’ வெண் பட்டாடைகள் தனிச்சிறப்பு பெற்றவை. இந்த ஆடைகளை அணிந்து, 64 வகையான பதார்த்தங்களுடன் கூடிய ‘ஓண சத்யா’ விருந்தளித்து உறவினர்களையும் நண்பர்களையும் உபசரிப்பது கேரள மக்களின் பண்டிகை மாண்பு.

அடுத்து, பண்பாட்டின் அடையாளங்களாக சாகசக் கலைகளும் நாட்டியங்களும் இசைப் பாடல்களும் விளங்குகின்றன. ஓணம் விழாவில் பெண்கள் ஆடும் ‘கைகொட்டுக் களி’யும், ஆண்கள் ஆடும் ‘புலிக்களி’யும் சிறப்பானவை. தவிர, பாரம்பரியமான கயிறு இழுத்தல் போட்டி, களரி, படகுப் போட்டிகளும் நடைபெறுவது வழக்கம்.

கேரளத்துக்கே உரித்த யானைத் திருவிழா ஓணம் பண்டிகையின் சிகரமாகும். பண்டிகையின் பத்தாம் நாளான திருவோணம் அன்று, யானைகளை அலங்கரித்து ஊர்வலம் நடத்தி மகிழ்வர்.

‘அத்தப்பூக் களம்’ எனப்படும் பூக்கோலம், மகாபலி சக்கரவர்த்தியை வரவேற்கும் விதமாக ஒவ்வொரு கேரளத்தவரின் இல்லத்தின் முகப்பிலும் காணப்படுவது ஓணம் பண்டிகையின் முத்திரையாகும். ஜாதி, மத வித்தியாசமில்லாமல் கேரளத்தைச் சார்ந்த அனைவரும் கொண்டாடும் ஓணம் பெருவிழா, சத்தமின்றி மலையாள மக்களை ஒருங்கிணைத்து, அவர்களது பண்பாட்டுப் பெருமிதத்தை நினைவூட்டி வருகிறது.

கேரள மக்கள் உலகின் எந்த மூலைக்குச் சென்றாலும் பண்பாட்டை மறவாமல் கொண்டாடும் திருவோணம் திருவிழா, பாரதத்தின் பெருமையையும் பார் முழுவதும் பரப்பி வருகிறது. இவ்விழாவை நாமும் கொண்டாடி மகாபலி சக்கரவர்த்தியின் அருளைப் பெறுவோமே!

—————————————

நீதி தவழும் நாடு…

ஓணம் பண்டிகையை முன்னிட்டு கேரள மக்கள் பாடும் பாடல், மகாபலி சக்கரவர்த்தியின் சிறப்பை வெளிப்படுத்துவதாக உள்ளது. மகாபலி ஆண்ட நாட்டின் சிறப்பை நினைவுகூர்ந்து, அதேபோன்ற நாடு அமைய பண்டிகையின்போது பிரார்த்திக்கிறார்கள் மக்கள். இதோ அந்தப் பாடலின் வரிகள்:

மாவலி மன்னன் ஆண்ட நாட்டில்
மனிதர்களெல்லாம் சரிநிகரே!
ஆனந்தம் எங்கும் தாண்டவமாடும்.
அவதியென்பதே எங்குமில்லை.

நோய்கள் நெருங்கா நாடு அது
சிசுக்களை சாவு அண்டாது.
பொய்யை அறியா பண்புறு மக்கள்!
கொள்ளையும் திருட்டும் அங்கில்லை.

வாய்மை எங்கும் பேச்சில் மிளிரும்
அளவைகள் தரத்தை வெளிப்படுத்தும்.
யாரும் யாரையும் ஏமாற்றாத
நேர்மை ஒளிரும் வீரிய தேசம்.

மாவலி ஆண்ட மண்ணில் என்றும்
அனைவரும் ஒரு குலம்! சரிநிகரே!

– தினமணி (கோவை) 28.08.2012

பொன் ஓணத் திருநாள் -விளம்பரச் சிறப்பிதழ்

நாளை (29.08.2012) திருவோணத் திருநாள்

.

Advertisements

மீண்டும் வேண்டும்…

18 Aug

This slideshow requires JavaScript.

மீண்டும் வேண்டும் காந்திஜி –
மதவாதிகளிடமிருந்து
மக்களைக் காக்க…
அராஜகவாதிகளிடமிருந்து
அரசியலை மீட்க…

மீண்டும் வேண்டும் நேதாஜி –
வெளிநாட்டு மோகத்தை
வேருடன் கிள்ளி எறிய…
வெற்றிபெறும் உத்வேகத்தை
நாட்டுக்கு அளிக்க…

மீண்டும் வேண்டும் திலகர் –
தேசபக்தி நறுமணம்
எங்கும் பரவ…
வேஷமிடும் சதியாளர்கள்
நடுங்கியோட…

மீண்டும் வேண்டும் அம்பேத்கர் –
ஏற்றத் தாழ்வற்ற சமுதாயம்
விரைவில் அமைய…
எல்லோரும் எல்லாமும்
எங்கேயும் பெற…

மீண்டும் வேண்டும் பாரதி –
சுதந்திரத்தின் சுகத்தை
அனைவரும் உணர…
அடிமைத்தனத்தின் எச்சங்கள்
அலறியோட…

மீண்டும் வேண்டும் சுதந்திரம் –
உயர்வைத் தடுக்கும்
ஊழல் அரக்கனிடமிருந்து…
சுயநலமே பிரதானமான
அதிகாரிகளிடமிருந்து…
நாட்டை அழிக்கும்
நாசகாரர்களிடமிருந்து…

– தினமணி (விளம்பரச் சிறப்பிதழ்), கோவை (15.08.2012)

.

முகவரி அறிவோம்!

15 Aug

கத்தியின்றி ரத்தமின்றி
பெற்றிடவில்லை இந்த
பெருமை மிகு சுதந்திரத்தை!

தீரன் சின்னமலையும்
ஜான்சிராணியும்,
கட்டபொம்மனும்,
தாந்தியாதோபேயும்,
திப்பு சுல்தானும்
அடித்த முதலடி
மறந்திட முடியுமா?

செக்கிழுத்தோம்…
குண்டடி பட்டோம்..
தூக்கு மேடையில்
துணிந்து ஏறினோம்!

உத்தம் சிங்குகளும்,
மதன்லால் திங்க்ராக்களும்,
வாஞ்சி நாதன்களும்,
பகத் சிங்குகளும்
அந்நியனை அலற வைக்கும்
அமரச் சமரில்
ஆகுதி ஆகினர்!

வெஞ்சிறையில் வீழ்ந்த
சாவர்க்கரும்,
திலகரும்,
தடியடி பட்ட
லஜபதிராயும்
ரத்தம் சிந்தாமலா – நாம்
சுதந்திரர் ஆனோம்?

நேதாஜியின்
தேசிய இராணுவம்
வடகிழக்கில்
சுதந்திரம் கண்டதை
மறைக்க முடியுமா?
மறுக்க முடியுமா?

சும்மா வரவில்லை
சுகமான சுதந்திரம்!
ஆருயிர் ஈந்த
அரும்பெரும் தியாகியர்
சரித்திரம் மறப்பது
சம்மதம் தானா?

அஹிம்சையின் பெயரில்
சுதந்திரப் போரை
மூடி மறைத்தால்
முகவரி இழப்போம்!
பொன்விழா கண்ட பூரிப்பு போதும்…
இன்றே நமது முகவரி அறிவோம்!

.
நன்றி: தினமலர் (ஈரோடு, சேலம்)
(15.08.2004)

.

பதிப்பாளரின் மனப்பதிவுகள்

7 Aug

தமிழின் முன்னோடிப் பதிப்பகங்களுள் ஒன்று தமிழ்ப் புத்தகாலயம். அதன் நிறுவனர் கண.முத்தையாவின் நினைவலைகளின் சிறு தொகுப்பே இந்நூல். அறிஞர் ராகுல சாங்கிருத்தியாயனின் ‘வால்காவிலிருந்து கங்கை வரை’ என்ற அரிய நூலை தமிழுக்கு வழங்கியவர் கண.முத்தையா; நேதாஜியின் இந்திய தேசிய ராணுவத்தில் பணியாற்றியவர்;  தமிழ் எழுத்தாளர் சங்க நிர்வாகியாகவும் இருந்திருக்கிறார். சுமார் 50 ஆண்டு காலம், தமிழின் முன்னணி எழுத்தாளர்கள் பலருடன் பழகிய இவரது நினைவுகளை அவரது மருமகன் அகிலன் கண்ணன் கோர்வையாகத் தொகுத்திருக்கிறார்.

இது அளவில் சிறிய நூலாக இருக்கலாம். ஆனால் விஷய அளவில் பல அற்புதமான சரித்திர நிகழ்வுகளின் பதிவாக இருக்கிறது. எழுத்தாளர்கள் பேரா.வையாபுரி பிள்ளை, சாமி சிதம்பரனார், சக்தி வை.கோவிந்தன், திருலோக சீதாராம், புதுமைப்பித்தன், அகிலன், நா.பார்த்தசாரதி, கு.அழகிரிசாமி, ராஜம் கிருஷ்ணன், ஜெயகாந்தன், இந்திரா பார்த்தசாரதி, விஜயபாஸ்கரன், அரசியல் தலைவர்கள் பெரியார், அண்ணாதுரை, பக்தவத்சலம், ப.ஜீவானந்தம், பாலதண்டாயுதம், ம.பொ.சி, மு.கருணாநிதி போன்ற முந்தைய தலைமுறையினர் குறித்த ஆசிரியரின் பதிவுகள் உள்ளத்தை உருக்குபவை.

இந்திய தேசிய ராணுவத்தில் தான் நிகழ்த்திய அரிய சாகசங்களை அடக்கமாகக் குறிப்பிட்டுச் செல்லும் ஆசிரியர் நேதாஜியின் அணுக்கத் தொண்டராக இருந்தவர். இந்நூல் அவரது நிறைகுடப் பாங்கை வெளிப்படுத்துகிறது. இந்திய தேசிய ராணுவத்தின் முக்கியத்துவத்தை விளக்கும் அரிய ஆவணம் இந்நூல் எனில் மிகையில்லை.

எனினும், ஒரு பதிப்பாளராகவே கண.முத்தையாவின் நினைவுகள் இந்நூலில் அதிகமாக உள்ளன. பதிப்புத் தொழில்நுட்பம் பல மடங்கு வளர்ந்துள்ள சூழலில் தமிழ் இலக்கிய உலகம் எதிர்பார்த்த அளவுக்கு வீரியமாக வளரவில்லை என்ற மனக்குறையை ஆசிரியர் வெளிப்படுத்தி இருக்கிறார். தமிழ் எழுத்தாளர்களிடையே நிலவும் ஒற்றுமையின்மையும் இவரை மிகவும் சங்கடப்படுத்தி இருக்கிறது. தமிழ் எழுத்தாளர்கள் அனைவரும் கண்டிப்பாகப் படிக்க வேண்டிய நூல் இது.

***

முடிவுகளே தொடக்கமாய்…

கண.முத்தையா

பக்கம்: 144,  விலை: ரூ. 30,

தமிழ்ப் புத்தகாலயம்,
34, சாரங்கபாணி தெரு,
தியாகராய நகர், சென்னை- 17.
போன்: 044- 2834 0495.

.