இந்தியாவின் மனிதக் கணினி

1 Dec

Sakunthaladevi2

சகுந்தலா தேவி

சிலர் பிறக்கும்போதே ஞானக் குழந்தைகளாகப் பிறக்கின்றனர். அவர்களை பிறவிமேதைகள் என்று கூறுவர். அவர்களின் அறிவுத்திறனுக்கான காரணத்தை விஞ்ஞான உலகால் புரிந்துகொள்ள முடிவதில்லை. ஆனால் பிறவிமேதைகள் சிலரே தங்கள் வாழ்நாள் முழுவதும் சாதனை படைக்கிறார்கள். அதற்கு அவர்களின் அர்ப்பணிப்பும், தங்கள் திறமையை மேம்படுத்தும் ஆர்வமும் தான் காரணம்.

அத்தகையவர்களுள் ஒருவர்தான் ‘இந்தியாவின் மனிதக் கணினி’ என்று புகழப்பட்ட சகுந்தலாதேவி.

பெங்களூரில் 1929, நவம்பர் 4-இல் பிறந்த சகுந்தலாதேவி, சிறு வயதிலேயே அபார அறிவுடன் விளங்கினார். அவருக்கு 3 வயதாக இருக்கையில், தந்தையுடன் சீட்டுக்கட்டு விளையாட்டில் ஈடுபட்டபோது அவரது அறிவு வெளிப்பட்டது.

சர்க்கஸில் மாயாஜால வித்தைக்காரராக இருந்த அவரது தந்தைக்கு, தனது தொழிலைவிட தனது மகளின் திறமை மீது அதீத நம்பிக்கை ஏற்பட, தனது குழந்தையை காட்சிப் பொருளாக்கினார். முச்சந்திகளில் தனது குழந்தையை நிறுத்தி, சாலையில் செல்வோரின் கணிதக் கேள்விகளுக்கு பதிலளிக்கச் செய்து வருவாய் ஈட்டினார் அவர்.

அறியாத வயதிலேயே குடும்பச் சுமையை தனது தோளில் ஏற்ற சகுந்தலாவுக்கு முறையான பள்ளிக்கல்விக்கு வாய்ப்பில்லாது போனது. தனது ஆறாம் வயதில் மைசூரு பல்கலைக்கழகத்தில் நடந்த நிகழ்ச்சியில் தனது கணித அறிவை அவர் வெளிப்படுத்தினார். அதன்பிறகு அவரது உலகளாவிய கணித உலா தொடங்கியது.

பல இலக்கங்களைக் கொண்ட எண்களின் கனம், வர்க்கம், கணமூலம், வர்க்கமூலம், அடுக்குகளுக்கும், சிக்கலான கணக்குகளுக்கும் மிகக் குறுகிய நேரத்தில் மனக்கணக்காக தீர்வு கூறுவதில் சகுந்தலா திறம் மிகுந்தவராக இருந்தார். பழைய நூற்றாண்டின் ஏதாவது ஒரு தேதியைக் குறிப்பிட்டால் உடனே அதற்கான கிழமையைக் கூறும் அளவுக்கு நினைவாற்றலும் கணக்கிடும் திறனும் அவருக்கு இருந்தன.

அவரது 15-வது வயதில் (1944) லண்டனுக்கு தந்தையால் அழைத்துச் செல்லப்பட்டார். அங்கு அவரது கணித அறிவுக்கு பல ரசிகர்கள் உருவாயினர். 1960-இல் நாடு திரும்பிய சகுந்தலா பரிதோஷ் பானர்ஜி என்ற ஐஏஎஸ் அதிகாரியைத் திருமணம் செய்தார். இவர்களுக்கு ஒரு குழந்தையும் பிறந்தது. 1979-இல் திருமண முறிவை அடுத்து பெங்களூரு திரும்பினார் சகுந்தலா. அதன்பிறகு கணிதம், ஜோதிடம், புதின எழுத்துகளில் அவரது கவனம் திரும்பியது.

பள்ளிக்குச் செல்லாமலே அனுபவ அறிவாலும், ஆர்வத்தாலும் தனது துறையில் அறிவினை வளர்த்துக்கொண்ட சகுந்தலாதேவி, பல விளையாட்டு கணித நூல்களை எழுதியிருக்கிறார். கணிதத்தில் மாணவர்களுக்கு அச்சத்தைப் போக்கி ஆர்வமூட்டுவதை தனது கடமையாகவே அவர் கொண்டிருந்தார்.

எண்களின் விளையாட்டு (1977), குழந்தைகளை கணித நிபுணராக்குவது எப்படி? (2005), எண்களின் புத்தகம், எண்களின் அதிசய உலகம், கணிதப்புதிர்கள் (2006) ஆகியவை அவர் கணித உலகுக்கு அளித்த சில நூல்கள். ஜோதிடத்திலும் பல நூல்களை அவர் எழுதியிருக்கிறார். தவிர, கற்பனைப் புதினங்கள், நினைவாற்றல் குறித்த நூல்களையும் அவர் எழுதியிருக்கிறார்.

இப்போது சட்ட அங்கீகாரம் பெற்றுவிட்ட ஒருபால் ஈர்ப்பு பற்றி 1977-லேயே   ‘The world of Homosexuals’  என்ற நூலை எழுதியிருக்கிறார் சகுந்தலா. தனது பிறவி மேதைமையை மேம்படுத்திக்கொண்டு பல்துறை நிபுணராக விளங்கிய சகுந்தலா, 2013, ஏப்ரல் 21-இல் மறைந்தார்.

உலக சாதனை:

தனது கணித அறிவால் கின்னஸ் உலக சாதனைப் புத்தகத்தில் இடம் பிடித்தவர் சகுந்தலா. 1980, ஜூன் 18-இல் லண்டன் இம்பீரியல் கல்லூரியில் நடத்தப்பட்ட நிகழ்ச்சியில் 13 இலக்க எண்கள் இரண்டைப் பெருக்கி (7,686,369,774,870 X 2,465,099,745,779) 28 விநாடிகளில் பதில் அளித்து (18,947,668,177,995,426,462,773,730) அவையோரை வியப்பில் ஆழ்த்தினார் சகுந்தலா. இது 1982-ஆம் ஆண்டின் கின்னஸ் சாதனைப் புத்தகத்தில் இடம்பெற்றது.

1988-இல் கலிஃபோர்னியா பல்கலைக்கழக உளவியல் பேராசிரியர் ஆர்தர் ஜென்சென், பெரிய கணக்குப் புதிர்களைக் கூறி சகுந்தலாவின் மனத்திறனை சோதித்தார். அவற்றுக்கு அவர் குறைந்த விநாடிகளில் பதிலளித்தார். உதாரணமாக, 61,629,875 என்ற எண்ணின் கனமூலமும், 170,859,375 என்ற எண்ணின் ஏழாவது மூலமும் கேட்கப்பட்டன. அவற்றுக்கான விடைகளை (395, 15), ஆர்தர் கேள்விகளை குறிப்பேட்டில் குறிக்கும் முன்னமே கூறி ஆச்சரியத்தில் ஆழ்த்தினார் சகுந்தலா. அவரது அறிவுத்திறன் குறித்து ‘Intelligence’ என்ற கல்வியிதழில் ஆய்வுக் கட்டுரையை 1990-இல் வெளியிட்டார் ஆர்தர்.

1977-இல் தெற்கு மெதடிஸ்ட் பல்கலைக்கழகத்தில் நடந்த நிகழ்ச்சியில், ஓர் 201 இலக்க எண்ணின் 23-வது மூலத்தைக் கணக்கிட்டு 50 விநாடிகளில் பதில் (546,372,891) அளித்தார். அதை சரிபார்க்க அமெரிக்க தரநிர்ணய நிறுவனத்தின் யூனிவாக்-1108 என்ற சூப்பர் கணினியில் தனி நிரல் எழுத வேண்டி இருந்தது. அந்தக் கணினியும்கூட இந்தப் புதிருக்கு பதிலளிக்க கூடுதலாக 12 விநாடிகள் எடுத்துக் கொண்டது!

இவ்வாறாக தனது கணித அறிவால் உலக அளவில் புகழ் பெற்ற சகுந்தலா தேவி, கணிதத்தை எளிதாகக் கற்பிக்க பெங்களூரில் கணிதப் பயிற்சி மையத்தைத் தொடங்கினார். அது இன்றும் சிறப்புற இயங்குகிறது. அங்கு அதிவேகக் கணக்கீடுகளுக்கான வேத கணித அடிப்படையில் பாடம் பயிற்றுவிக்கப்படுகிறது.

மனிதனின் மூளை ஓர் அறிவுச் சுரங்கம். அதைத் திறம்படக் கையாள்பவர்கள் மேதைகளாகிறார்கள். இதற்கு சகுந்தலாதேவியின் வாழ்க்கை ஓர் அரிய உதாரணம்.

***

உன்னை நீ நம்பு!

கணிதமேதை சகுந்தலா தேவி, அச்சத்தைக் குறைத்தாலே கணிதத்தில் வெல்லலாம் என்கிறார்.

“முதலில் உன்னை நீ நம்பு. உன்னிடத்தில் நம்பிக்கையையும் திறனையும் வளர்ப்பதுதான் அவசியம். நீ எண்களில் பெரிய நிபுணராக இருக்க வேண்டியதில்லை. யாரும் பிறக்கும்போதே முழுமையான திறனுடன் பிறப்பதில்லை. புதிர்கள், விளையாட்டுகளில் ஆர்வம் காட்டினால் கணிதம் வசப்படும்”  என்பது அவரது அறிவுரை.

சகுந்தலா தேவியின் பிறந்தநாளை கௌரவிக்கும் வகையில், 2013-இல் கூகிள் நிறுவனம் தனது முகப்புப் பக்கத்தில் இவரது படத்தை வெளியிட்டு மரியாதை செய்தது.

.

– தினமணி இளைஞர்மணி -01.12.2015

.

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: