Archive | June, 2017

சர் சி.வி.ராமன் பரம்பரையை வளர்த்தவர்

27 Jun

எஸ்.ராமசேஷன்

நோபல் பரிசு பெற்ற இயற்பியல் விஞ்ஞானியான சர் சி.வி.ராமன் (1888- 1970) , இந்தியாவில் அடிப்படை அறிவியல் வளர்வதற்குத் தூண்டுகோலாக இருந்தவர். அவரது அடியொற்றிப் பணியாற்றிய விஞ்ஞானிகள் தலைமுறை அப்போது உருவானது. வெங்கட்ராமனின் மறைவை அடுத்து ஒரு வெற்றிடம் உருவானபோது, அந்த வெற்றிடத்தை நிரப்புபவராக அமைந்தார், அவரது மருமகனும், நேரடி சீடருமான எஸ்.ராமசேஷன். அவரும் ராமனைப் போலவே ஒளியியல் விஞ்ஞானி.

ராமன் ஆராய்ச்சிக் கழகம், இந்திய அறிவியல் அகாதெமி, பெங்களூரு இந்திய அறிவியல் கழகம், நிகழ் அறிவியல் சங்கம் ஆகியவற்றில் ராமன் வகித்துவந்த இடத்தை பூர்த்தி செய்ததுடன், அந்த நிறுவனங்களுக்கு புது மெருகூட்டியவர் ராமசேஷன். அது மட்டுமல்ல, ராமனின் அறிவியல் ஆராய்ச்சிக் கட்டுரைகளை இரு தொகுதிகளாகத் தொகுத்து வழங்கியவரும் அவர்தான். ராமனின் சுயசரிதையையும், அவருடன் இணைந்து ராமசேஷன் எழுதியுள்ளார். Continue reading

பொது சார்பியல் கோட்பாட்டை இந்தியாவில் வளர்த்தவர்

20 Jun

பி.சி.வைத்யா

ஐன்ஸ்டீனின் பொது சார்பியல் கோட்பாடும் சிறப்பு சார்பியல் கோட்பாடும்,  சென்ற நூற்றாண்டில் அறிவியல் உலகில் புரட்சிகரமான மாற்றங்களுக்கு வித்திட்டவை. அண்டவியலில் புதிய கண்டுபிடிப்புகளுக்கான கருதுகோள்கள் அவை. அவற்றில் பொது சார்பியல் கோட்பாட்டின் இந்தியப் பிரதிநிதி போலவே இயங்கினார், இங்குள்ள கணிதப் பேராசிரியர் ஒருவர். அது மட்டுமல்ல, பொது சார்பியல் கோட்பாட்டின் (General  Theory of Relativity)  சிக்கலான சமன்பாடுகளை விடுவிப்பதற்கான புதிய வழிமுறையையும் அவர் உருவாக்கினார். அவர், பேராசிரியர் பிரஹலாத் சுனிலால் வைத்யா. சுருக்கமாக பி.சி.வைத்யா என்று அழைக்கப்படுகிறார்.

பி.சி. வைத்யாவின் கண்டுபிடிப்பு,  ‘வைத்யா மெட்ரிக்’ என்று அவர் பெயரிலேயே உலகம் முழுவதும் பின்பற்றப்படுகிறது. கணிதப் பேராசிரியர், கோட்பாட்டு இயற்பியல் விஞ்ஞானி, கல்வியாளர், சுதந்திரப் போராட்ட வீரர், எழுத்தாளர், காந்தியவாதி எனப் பன்முகங்களைக் கொண்டு, மனித சக்தியின் எல்லையற்ற தன்மைக்கு நிரூபணமாக விளங்கியவர் அவர். Continue reading

கட்டணமா, கந்து வட்டியா? வங்கிகளின் அடாவடிக்கு தீர்வு என்ன?

19 Jun

அண்மைக்காலமாக, வாடிக்கையாளர்களின் நலனைக் கருத்தில் கொள்ளாமல் தன்னிச்சையாக கட்டணங்களை நிர்ணயிக்கும் போக்கு வங்கிகளிடையே அதிகரித்து வருகிறது. சிறப்பு சேவைகளை வழங்கவும், சேவைகளின் தரத்தை உயர்த்தவும் இந்தக் கட்டணங்கள் விதிக்கப்படுவதாக வங்கி நிர்வாகங்கள் கூறுகின்றன. இதனால் வங்கி நிர்வாகங்கள் மீதும், மத்திய அரசு மீதும் மக்களின் அதிருப்தி பெருகி வருகிறது.

கடந்த ஆண்டு இறுதியில் மத்திய அரசு மேற்கொண்ட உயர் மதிப்பு ரூபாய் நோட்டுகளின் பண மதிப்பிழப்பு நடவடிக்கையால், நாடு முழுவதும் வங்கி மூலமான பணப் பரிமாற்றம் பல மடங்கு அதிகரித்துள்ளது. இதுவரை வங்கிக் கணக்கில் வராமலே கணக்கின்றி புழக்கத்தில் இருந்து வந்த ரொக்கப்பணம் வங்கி மூலமான பரிமாற்றத்துக்கு வர மத்திய அரசின் நடவடிக்கை வித்திட்டுள்ளது.

மத்திய அரசின் பண மதிப்பிழப்பு நடவடிக்கைகளின் போது பல சிரமங்கள் நேரிட்டபோதும், அவற்றைத் தாங்கிக் கொண்டு அரசுக்கு மக்கள் ஆதரவளித்தனர். நாட்டிலுள்ள கருப்புப் பணத்தை ஒழிக்க அந்த நடவடிக்கை தேவை என்றுணர்ந்த அவர்கள் ரொக்கப் பணத்துக்கு தட்டுப்பாடு ஏற்பட்டபோதும் அரசை ஆதரித்தனர்.

அரசின் அந்த நடவடிக்கை காரணமாக தற்போது சுமார் ரூ. 16.8 லட்சம் கோடி ரொக்கம் வங்கிக் கணக்குகளுக்குள் வந்துள்ளது. இதன்மூலமாக பல வங்கிகளின் நிதியிருப்பு கணிசமாக அதிகரித்துள்ளது. ஆனால், வங்கி முறையை நம்பி தங்கள் பணத்தைச் செலுத்திய பலருக்கும் வங்கிகள் தற்போது தொந்தரவு தரத் துவங்கி இருக்கின்றன. Continue reading

இந்தியாவின் அணுசக்தி துறை வல்லுநர்

13 Jun

ஸ்ரீகுமார் பானர்ஜி

நாட்டின் மின்சாரத் தேவையைப் பூர்த்தி செய்வதில் அணுசக்தித் துறை பெரும்பங்கு வகிக்கிறது. இத்துறையில் இந்தியா தன்னிறைவு பெற்றுள்ளது மட்டுமல்ல, வல்லரசு நாடுகளுக்கு இணையாக அணு ஆயுத பலமும் பெற்றுள்ளது.

இத்துறையை நாட்டுக்கு அறிமுகப்படுத்தியவர், இந்திய அணுக்கருவியலின் தந்தையான ஹோமி ஜஹாங்கீர் பாபா. ராஜா ராமண்ணா, ஆர்.சிதம்பரம், அனில் ககோட்கர் உள்ளிட்ட பல விஞ்ஞானிகளின் இடையறாத உழைப்பாலும், தெளிவான திட்டமிடலாலும் அணுசக்தித் துறையில் இந்தியா சிகரத்தை எட்டியுள்ளது. இந்தப் பட்டியலில் அணுசக்தி ஆணையத்தின் தலைவராக (2009 -2012) இருந்த உலோகவியல் பொறியாளர் ஸ்ரீகுமார் பானர்ஜிக்கும் பேரிடம் உண்டு.

உலோகங்களின் இயற்பியல், வேதியல் பண்புகளை ஆராய்வதன் அடிப்படையில் உலோகவியல் இரு பிரிவாக உள்ளது. அதில், அணுசக்தித் துறைக்கு அடிப்படையான உலோக இயற்பியல் (Physical Mettalurgy) பிரிவில் வல்லுநராக பானர்ஜி விளங்குகிறார். Continue reading

ரஜினி அரசியலுக்கு வரக் கூடாதா?

13 Jun

பிரபல நடிகர் ரஜினிகாந்த் அண்மையில் தனது ரசிகர்களுடன் புகைப்படம் எடுத்துக்கொண்ட நிகழ்வின்போது கூறிய சில கருத்துகள், தமிழகத்தில் பெரும் சர்ச்சையைக் கிளப்பிவிட்டுள்ளன. தமிழகத்தில் ‘சிஸ்டம்’ கெட்டுப்போய்விட்டது; போர் வரும்போது பார்த்துக் கொள்வோம் என்று ரசிகர்களிடம் கூறியது, அவரது அரசியல் பிரவேச ஆசையை வெளிப்படுத்தி இருக்கிறது.

இந்த நாட்டின் குடிமகன் என்ற முறையில் அரசியலை விமர்சிக்கவும், அரசியலில் ஈடுபடவும் நடிகர் ரஜினிகாந்துக்கு முழு உரிமை உள்ளது. அதுபோலவே ரஜினியின் கருத்துகளை விமர்சிக்கவும் அனைவருக்கும் உரிமை உண்டு. ஆயினும், அவர் அரசியலுக்கு வரக் கூடாது என்று சொல்லவோ, தமிழகத்தை ஆள நினைக்கக் கூடாது என்று சொல்லவோ யாருக்கும் உரிமை கிடையாது.

1996-இல் நடைபெற்ற சட்டப்பேரவைத் தேர்தலின்போது, அப்போதைய ஆளுங்கட்சியை எதிர்த்து நடிகர் ரஜினிகாந்த் குரல் கொடுத்தார். அது அன்றைய திமுக- தமாகா கூட்டணியின் வெற்றிக்கு உதவிகரமாக இருந்தது. அன்றுமுதல், ஒவ்வொரு தேர்தலின்போதும் ரஜினிகாந்தின் அரசியல் பிரகடனத்தை எதிர்பார்ப்பது தமிழகத்தில் வழக்கமாகவே மாறிவிட்டது.

எனினும், நடிகர் ரஜினி அரசியலில் நுழையாமல் லாவகமாகத் தவிர்த்து வந்தார்; 2004 நாடாளுமன்றத் தேர்தலில் மட்டும் பாஜகவுக்கு ஆதரவாக அவர் கருத்து தெரிவித்தார். எனவே அவர் பாஜகவில் சேரக் கூடும் என்ற யூகம் பரவுகிறது.

அதற்கேற்றாற்போல, பாஜக தேசியத் தலைவர் அமித் ஷா, ரஜினிகாந்த் போன்ற நல்லவர்கள் தங்கள் கட்சியில் இணைய வேண்டும் என்று வெளிப்படையாக வேண்டுகோள் விடுத்திருக்கிறார். அதற்கு ரஜினி இன்னும் எந்த பதிலும் அளிக்கவில்லை.

இந்த விஷயத்தில் அவரது நண்பர் கமல்ஹாசன் ரஜினிக்கு அளித்துள்ள அறிவுரை தெளிவானது. அதைவிட, தேமுதிக என்ற கட்சியைத் துவங்கி கையைச் சுட்டுக்கொண்ட நடிகர் விஜயகாந்தின் ஆலோசனை மிகுந்த பெறுமதி உடையது. இவற்றை மீறி தனிக் கட்சி துவங்குவதும், இன்னொரு கட்சியில் சேருவதும் ரஜினியின் விருப்பம். அதை ரஜினியே சொல்வதுபோல, ஆண்டவன் தீர்மானிக்கட்டும்.

இந்நிலையில், நடிகர் ரஜினியை வைத்து சில திரைப்படங்களை இயக்கிய முன்னணி இயக்குநர் பாரதிராஜா,  “ரஜினி தமிழகத்தில் வாழ நினைக்கலாம்; தமிழகத்தை ஆள நினைக்கக் கூடாது” என்று அறிவுரை வழங்கியிருக்கிறார். ஒரு நண்பராக இதை ரஜினியிடம் கூற பாரதிராஜாவுக்கு எந்தத் தடையுமில்லை. ஆனால், தமிழகத்தை ஆள நினைக்கக் கூடாது என்று ரஜினியை எச்சரிக்க அவர் யார்?

தமிழகத்தை யார் ஆள வேண்டும் என்று தீர்மானிக்க வேண்டியவர்கள், மாநிலத்திலுள்ள சுமார் 5.5 கோடி வாக்காளர்கள்தானே ஒழிய, பாரதிராஜா அல்ல. தமிழகத்தை தமிழன்தான் ஆள வேண்டும் என்பது போன்ற முழக்கங்களை எழுப்புவது  ‘கொடி பறக்குது’ போன்ற திரைப்படங்களை அளித்த பாரதிராஜாவுக்கு பெருமை சேர்க்காது.

நடிகர் ரஜினிகாந்தால் போராளி என்று போற்றப்பட்ட இயக்குநர் சீமானும், ரஜினியின் அரசியல் பிரவேசத்தை வன்மையாகக் கண்டித்து வருகிறார். அவரது விமர்சனங்கள் எல்லை மீறி வருகின்றன. அதில் மொழிவழி தேசியப் பிரிவினையைத் தூண்டும் நோக்கமும் காணப்படுகிறது. இது நமது அரசியல் சாசனத்துக்கு விரோதமானது.

இத்தனைக்கும், ரஜினிகாந்த் தனது பேச்சில் அரசியல் களம் காணத் தயாராவதற்கான சிறு குறிப்பையே அளித்திருக்கிறார். அதற்குள், அவர் தமிழக அரசியலில் இறங்கி மக்கள் மனங்களை வென்று முதல்வராகவே ஆகிவிடப் போவதாக, பீதியுடன் சலசலக்கும் தமிழ்நேய ஆதரவாளர்களைக் காணும்போது நகைப்பெழுகிறது.

ரஜினிகாந்த் மக்களிடையே பிரபலமான, வசீகரமான நடிகராக இருக்கலாம். ஆனால், அரசியல் குறித்த அவரது பார்வை தெளிவானதாக இல்லை. திரைப்படத்தில் ஒரே பாடலில் பணக்காரன் ஆவதுபோல, அரசியலில் இறங்கியவுடன் புரட்சிகரமான மாற்றங்களை நிகழ்த்திவிட முடியாது.

அதற்கு ஓர் அரசியல் கட்சியை கட்டமைக்கும் வல்லமை வேண்டும்; கட்சிக்கான கொள்கைகளை வடிவமைக்கும் சமூக அறிவு வேண்டும்; ஒத்த சிந்தனை கொண்டவர்களை அரவணைத்து அவர்களை வழிநடத்தும் தலைமைப் பண்பு வேண்டும்; இவை அனைத்தையும்விட, ஓய்வற்ற உழைப்பும், அடித்தள மக்கள் எளிதில் அணுகக் கூடிய எளிமையும் வேண்டும்.

முதல் பிரதமர் நேரு முதல் இன்றைய பிரதமர் மோடி வரை, மகாத்மா காந்தி முதல் ஜெயபிரகாஷ் நாராயணன் வரை, காமராஜர் முதல் ஜெயலலிதா வரை, வெற்றிகரமான தலைவர்கள் அனைவருமே மேற்கண்ட பண்புகளால் உயர்ந்தவர்கள். நடிகர் ரஜினிகாந்தின் பேச்சுகளைக் காணும்போது, இந்த குணநலன்கள் அவருக்கு உள்ளனவா என்பதில் சந்தேகம் எழுவது இயல்பே.

ஒவ்வொருமுறை தனது புதிய படத்துக்குத் தயாராகும்போதும் அதற்கு முன்னோட்ட விளம்பரமாக அரசியல் யூகங்கûளைக் கிளப்புபவராகவே அவர் இருந்திருக்கிறார். தனது அரசியல் கொள்கை என்ன என்பது குறித்தோ, தனது பொருளாதாரக் கண்ணோட்டம் குறித்தோ அவர் சொன்னதில்லை. மந்திரத்தில் மாங்காய் விழ வைக்க முடியாது என்பதை அவர் முதலில் உணர வேண்டும்.

ரஜினி அரசியலில் இறங்குவாரா, சாதிப்பாரா என்பன போன்ற கேள்விகளுக்கு முன்னதாகவே, அவரை நடிகர் என்பதற்காகவும், பிற மாநிலத்தில் பிறந்தவர் என்பதற்காகவும் எதிர்ப்பது எந்த அளவில் சரியில்லையோ, அதேபோல, அவர் பிரபல நடிகர் என்பதற்காகவே அவருக்கு அதீத முக்கியத்துவம் அளிப்பதும் தவறானதாகிவிடும்.

தலைமையின்றித் தள்ளாடும் தமிழக அரசியலுக்கு விமோசனமாக ரஜினிகாந்த் வரட்டும். அதற்கு அவர் தன்னை தகுதி படைத்தவராக மாற்றிக் கொள்வதும் அவசியம்.

அதன்பிறகு அரசியல் களத்தில் அவர் போராடட்டும். அவரை ஏற்பதோ, நிராகரிப்பதோ தமிழக மக்களின் உரிமை. அதைத் தடுக்க வெற்று வாய்ச்சொல் வீரர்களுக்கு எந்தத் தகுதியும் கிடையாது.

.