Archive | கட்டுரை RSS feed for this section

’சிக்ஸ்த் சென்ஸ்’ பிரணவ் மிஸ்திரி

13 May

உலகம் வியந்த இந்திய ஆராய்ச்சியாளர்கள்: ஆய்வு இமயம்-12

பிரணவ் மிஸ்திரி

இன்றைய உலகின் பத்து சிறந்த கண்டுபிடிப்பாளர்களில் ஒருவர் என்று கிறிஸ் ஆண்டர்ஸன் நிறுவனமும், ஆசியாவின் சிறந்த 15 விஞ்ஞானிகளில் ஒருவர் என்று ‘ஆசியன் சயின்டிஸ்ட்’ பத்திரிகையும், 2013-ஆம் ஆண்டின் இளம் உலகத் தலைவராக உலகப் பொருளாதார மன்றமும் ஓர் இந்திய இளைஞரைத் தேர்வு செய்தன.

 

நவீன உலகின் அற்புதக் கண்டுபிடிப்பான ஆறாவது புலன் எனப்படும் கணினித் தொழில்நுட்பத்தை 2009-இல் வடிவமைத்த அந்த இளைஞர் பிரணவ் மிஸ்திரி.

கழுத்தில் தொங்கும் ஒரு சிறிய கேமரா, கையடக்கமான புரொஜக்டர், நடமாடும் கணினி ஆகியவற்றின் தொகுப்புடன், அதை இயக்குபவரின் சைகைகள் பொருள்களின் மீது ஏற்படுத்தும் நிழலைத் தரவாகக் கொண்டு கணினியை இயக்குவதுதான் இந்தத் தொழில்நுட்பத்தின் சாராம்சம். Continue reading

செயற்கை நுண்ணறிவு விஞ்ஞானி ராஜ் ரெட்டி

12 May

உலகம் வியந்த இந்திய ஆராய்ச்சியாளர்கள்: ஆய்வு இமயம்-11

ராஜ் ரெட்டி

மனிதனைவிட வேகமாகச் சிந்தித்து இயங்கும் ஆற்றலுடன் தானியங்கி இயந்திர மனிதனை உருவாக்கும் தீவிர முயற்சிகளில் உலக விஞ்ஞானிகள் ஈடுபட்டுள்ளனர். இதற்கான செயற்கை நுண்ணறிவுத் திறன் (Artificial Intelligence) ஆராய்ச்சிகள்தான் இன்றைய அறிவியல் உலகின் உச்சம். இந்த ஆராய்ச்சிகளில் உலக அளவில் முன்னோடியாக இருப்பவர், அமெரிக்காவில் வாழும் இந்தியரான ராஜ் ரெட்டி.

 

ஆந்திர மாநிலத்தின் சித்தூர் மாவட்டம், காட்டூரில் விவசாயக் குடும்பத்தில் 1937, ஜூன் 13-இல் பிறந்தவர், தபலா ராஜகோபால் ரெட்டி. சுருக்கமாக, ராஜ் ரெட்டி.

சென்னையில் கிண்டி பொறியியல் கல்லூரியில் (பின்னாளில் அண்ணா பல்கலைக்கழகம்) கட்டுமானப் பொறியியலில் 1958-இல் பட்டம் பெற்ற ராஜ் ரெட்டி, மேற்படிப்புக்காக ஆஸ்திரேலியா சென்றார். அங்கு நியூ சவுத் வேல்ஸ் பல்கலைக்கழகத்தில் 1960-இல் எம்.டெக். பட்டம் பெற்றார். பிறகு அங்கேயே ஐபிஎம் நிறுவனத்தில் பயன்பாட்டு அறிவியல் பிரதிநிதியாக பணிபுரிந்தார்.

Continue reading

நரம்பு உயிரியல் மேதை வி.எஸ்.ராமசந்திரன்

11 May

உலகம் வியந்த இந்திய ஆராய்ச்சியாளர்கள்: ஆய்வு இமயம்-10

வில்லியனூர் எஸ்.ராமசந்திரன்

மனித மூளையின் இயக்கத்தில் மறைந்துள்ள பல அரிய உண்மைகளைக் கண்டடைந்தவராக அமெரிக்காவில் வசிக்கும் இந்தியரான உளவியல் விஞ்ஞானி வில்லியனூர் எஸ்.ராமசந்திரன் கருதப்படுகிறார்.

 

பாண்டிச்சேரியின் வில்லியனூரில் பிறந்த ராமசந்திரனின் பள்ளிக் கல்வி, சென்னையிலும், தாய்லாந்தின் பாங்காங்கிலும் கழிந்தது. சென்னையிலுள்ள ஸ்டான்லி மருத்துவக் கல்லூரியில் 1971இல் எம்.டி. பட்டம் பெற்ற ராமசந்திரன், பிரிட்டனின் கேம்பிரிட்ஜ் பல்கலைக்கழகத்துக்கு உள்பட்ட டிரினிட்டி கல்லூரியில் பயின்று, நரம்பு அறிவியலில் ஆராய்ச்சிப் பட்டம் பெற்றார்.

அதையடுத்து அமெரிக்காவின் கலிஃபோர்னியா தொழில்நுட்பக்கழகத்தில் (கால்டெக்) கூட்டு ஆய்வாளராக, ஜேக் பெட்டிகிரூ உடன் இணைந்து இரண்டாண்டுகள் பணியாற்றினார்.

1983}இல் சாண்டியேகோவில் உள்ள கலிஃபோர்னியா பல்கலைக்கழகத்தில் உளவியல் துறை உதவிப் பேராசிரியராக இணைந்தார்; 1998-இல் முழுநேரப் பேராசிரியராக 1998-இல் உயர்வு பெற்றார். தற்போது அங்குள்ள மூளை மற்றும் உணர்ச்சிகள் தொடர்பான ஆராய்ச்சி மையத்தின் இயக்குநராக உள்ளார்.

Continue reading

விண்ணில் கலந்த கல்பனா சாவ்லா

10 May

உலகம் வியந்த இந்திய ஆராய்ச்சியாளர்கள்: ஆய்வு இமயம்- 9

கல்பனா சாவ்லா

தனது நோட்டுப் புத்தகத்தில் விமானப் படங்களை வரைந்த அந்தச் சிறுமி, பின்னாளில் விண்வெளியில் ஆராயும் தாரகையாக உயர்ந்தாள்; 2003}இல் அவள் சென்ற விண்வெளி ஓடம் வெடித்துச் சிதறியதில் பலியாகி உலக மாந்தரின் நெஞ்சங்களில் நிறைந்தாள். அவள்தான் கல்பனா சாவ்லா.

 

ஹரியாணா மாநிலத்தில் உள்ள கர்னால் என்ற கிராமத்தில், பனாரஸி லால் சாவ்லா} சன்யோசிதா தேவியின் மகளாக, 1962, மார்ச் 17-இல் பிறந்தவர் கல்பனா. உள்ளூர் அரசுப் பள்ளியில் பயின்ற கல்பனா, சண்டிகரில் உள்ள பஞ்சாப் பொறியியல் கல்லூரியில் விமான ஊர்திப் பொறியியலில் பி.டெக். பட்டம் பெற்றார் (1982).

மேற்படிப்புக்காக அமெரிக்கா சென்ற கல்பனா, டெக்சாஸ் பல்கலைக்கழகத்தில் விண்வெளிப் பொறியியலில் எம்.எஸ்சி. பட்டம் பெற்றார் (1984). கூடவே அமெரிக்காவில் விமானம் இயக்க உரிமமும் பெற்றார். அச்சமயத்தில் விமானப் பயிற்சியாளர் ஜீன் பியர் ஹாரிஸனை மணம் புரிந்தார்.

அடுத்து கொலராடோ பல்கலைக்கழகத்தில் சேர்ந்து 1986}இல் மற்றொரு முதுநிலைப் பட்டத்தையும் (1986), பிஹெச்.டி. பட்டத்தையும் (1988) விண்வெளிப் பொறியியலில் பெற்றார் கல்பனா.

Continue reading

இருதயவியல் நிபுணர் சலீம் யூசுப்

9 May

உலகம் வியந்த இந்திய ஆராய்ச்சியாளர்கள்: ஆய்வு இமயம்- 8

சலீம் யூசுப்

இன்றைய உலகில் பலரும் அஞ்சக் கூடியதாக இருப்பது மாரடைப்பு. தவிர, லட்சக் கணக்கான மக்களை முடமாக்குவது பக்கவாதம். இவ்விரண்டு நோய்களுக்குத் தேவையான தற்காப்பு முறைகள், சிகிச்சை முறைகளைக் கண்டறிந்தவர், கனடாவில் வாழும் இந்திய மருத்துவரான இருதயவியல் வல்லுநர் சலீம் யூசுப்.

லட்சக் கணக்கான நோயாளிகளிடம் சிகிச்சை ஆராய்ச்சி நடத்தி, அதன்மூலம் இருதய நோய், மூளையைத் தாக்கும் ரத்தநாள அடைப்பு ஆகியவை குறித்த தெளிவான முடிவுகளை சலீம் யூசுப் வெளியிட்டுள்ளார்.

கேரள மாநிலம், கொட்டாரக்கராவில் 1952, நவம்பர் 26-இல் பிறந்தார் சலீம் யூசுப். பெங்களூரிலுள்ள புனித ஜான் மருத்துவக் கல்லூரியில் 1976}-இல் எம்பிபிஎஸ் பட்டம் பெற்ற யூசுப், ரோட்ஸ் கல்வி உதவித்தொகை பெற்று, மேற்படிப்புக்காக ஆக்ஸ்போர்டு பல்கலைக்கழகம் சென்றார். அங்கு ‘மாரடைப்பைத் தடுப்பதில் பீட்டா அட்ரீனர்ஜிக் மருந்து’ என்ற தலைப்பில் (Beta Adrenergic Blockade in Myocardial Infraction) ஆராய்ச்சி மேற்கொண்டு டி.ஃபில். பட்டம் பெற்றார். அவரது வழிகாட்டியாக இருந்தவர் உலகப் புகழ் பெற்ற இருதயவியல் நிபுணர் பீட்டர் ஸ்லைட்.

Continue reading

கண்ணாடி ஒளியிழையை கண்டறிந்த நாரிந்தர் சிங் கப்பானி

8 May

உலகம் வியந்த இந்திய ஆராய்ச்சியாளர்கள்: ஆய்வு இமயம்- 7

நாரிந்தர் சிங் கப்பானி

நவீன உலகின் அதிவேக தகவல் தொடர்புக்கு வித்திட்ட கண்ணாடி ஒளியிழையின் (Fibre Optics) அடிப்படைத் தத்துவத்தைக் கண்டறிந்தவர், இந்தியாவைச் சேர்ந்த நாரிந்தர் சிங் கப்பானி.

இயற்பியல் விஞ்ஞானி, கண்டுபிடிப்பாளர், கல்வியாளர், எழுத்தாளர், தொழில் முனைவோர் எனப் பல பரிமாணங்களை உடைய நாரிந்தர் சிங் கப்பானி 120 கண்டுபிடிப்புகளுக்கான அறிவுசார் சொத்துரிமைகளைப் பெற்றுள்ளார்.

பஞ்சாப் மாநிலத்தின் மோகாவில் 1926 அக். 12-இல் பிறந்தார் நாரிந்தர். அவரது பள்ளிக்கல்வி டேராடூனில் கழிந்தது. கல்லூரிப் படிப்பை முடித்தவுடன், இந்திய ஆயுத தளவாட சேவைப் பணியில் டேராடூனில் சிறிதுகாலம் பணிபுரிந்தார். அங்கு செங்கோணப் பட்டகங்களைக் கொண்டு ஒளியின் போக்கை மாற்றுவது குறித்து ஆராய்ச்சி செய்தார்.

Continue reading

சக்தி! 

8 May

சிங்க மீதமர்ந்து – சூலம்
.கையினில் ஏந்தி – கால
சங்கடம் நீக்கி – மாலன்
.தங்கையாய் அவதரித்து,
சங்கரன் உடலில் – பாதி
.சமமெனப் பெற்ற – ஆதி
மங்கையின் புகழில் – மீதி
.சொல்லவும் கூடுமாமோ?

உயிரி வேதியியல் விஞ்ஞானி வெங்கட்ராமன் ராமகிருஷ்ணன்

7 May

உலகம் வியந்த இந்திய ஆராய்ச்சியாளர்கள்: ஆய்வு இமயம்-6

வெங்கட்ராமன் ராமகிருஷ்ணன்

உயிரணுக்களிலுள்ள ஆர்என்ஏ, புரதங்களின் சிக்கலான அமைப்பான ரிபோசோம் எனப்படும் செல்களுக்குள் புரதம் உற்பத்தியாவது தொடர்பான ஆராய்ச்சி மருத்துவ உலகில் பேரிடம் வகிக்கிறது. ரிபோசோம் அமைப்பின் அடிப்படையில் புதிய நுண்ணுயிர் எதிரிகள் (ஆன்டி பயாட்டிக்) உருவாக்கப்படுகின்றன. இதற்கு வித்திட்ட முக்கியமான கண்டுபிடிப்பை நிகழ்த்தியவர் நோபல் பரிசு பெற்ற வெளிநாடு வாழ் இந்தியரான வெங்கட்ராமன் ராமகிருஷ்ணன்.

 

தமிழகத்தின் சிதம்பரத்தைச் சேர்ந்தவர் சி.வி.ராமகிருஷ்ணன், உயிரி வேதியியல் விஞ்ஞானி. இவரது மனைவி ராஜலட்சுமி உளவியல் விஞ்ஞானி. இத்தம்பதிக்கு மகனாக 1952-இல் பிறந்தார் வெங்கட்ராமன். பெற்றோர் குஜராத்தின் வதோதராவிலுள்ள மகாராஜா சாயாஜிராவ் பல்கலைக்கழகத்தில் பேராசிரியர்களாகப் பணிபுரிந்தனர். அவர்களது வீடே ஆய்வகமாகச் செயல்பட்டது.

வதோதராவிலுள்ள ஒரு கிறிஸ்தவ மிஷன் பள்ளியில் படித்த வெங்கட்ராமன், மகாராஜா சாயாஜிராவ் பல்கலைக்கழகத்தில் 1971-இல் இயற்பியலில் இளநிலைப் பட்டம் பெற்றார். மருத்துவப் படிப்புக்கான நுழைவுத் தேர்விலும் ஐஐடி நுழைவுத் தேர்விலும் தோல்வியுற்ற அவர், தாயின் அறிவுரையை ஏற்று தேசிய அறிவியல் திறனறித் தேர்வை எழுதி வென்று, கல்வி உதவித்தொகை பெற்றார். Continue reading

எரிக்கப்படாத குப்பைகள்…

7 May
பரணில் இருக்கும் பழைய பொருட்களில்
உபயோகமற்ற ஏதாவது இருக்கும்
ஒவ்வொரு போகியிலும் எரிக்க.

Continue reading

பொருளாதார மேதை அமார்த்யா சென்

6 May

உலகம் வியந்த இந்திய ஆராய்ச்சியாளர்கள்: ஆய்வு இமயம்- 5

அமார்த்யா சென்

பொருளாதாரம் என்பது பொதுநலத்துடன்  இயைந்ததாக இருக்க வேண்டும்.  அப்போதுதான் அது வளர்ச்சிப் பொருளாதாரமாக இருக்க முடியும் என்ற புதிய கோட்பாட்டை நிறுவி, அதற்காக 1998இல் நோபல் பரிசு பெற்றவர் இந்திய பொருளாதார மேதை அமார்த்யா சென்.
.

தத்துவ இயலிலும் பொருளாதாரத்திலும் நிபுணரான சென், இவ்விரு துறைகளையும் வெற்றிகரமாக இணைத்ததன் மூலமாக, இதுவரை பதில் பெற முடியாத பொருளாளாதாரக் கேள்விகளுக்குத் தீர்வு கண்டார்.பிரிக்கப்படாத பாரதத்தில்  (தற்போதைய வங்கதேசம்), மணிகஞ்ச்பகுதியில் 1933, நவம்பர் 3-இல் பிறந்தார்  அமார்த்யா சென். அவரது தந்தை அசுதோஷ் சென் டாக்கா பல்கலைக்கழகத்தில் பேராசிரியராக இருந்தார்.  வங்கத்தின் புகழ்பெற்ற சிந்தனையாளரான க்ஷிதிமோகன் சென்னின் மகள் அமிதா இவரது தாய். புனித கிரிகோரி பள்ளியில் 7 வயது வரை அமார்த்யா  படித்தார். 1940-இல் அவரது குடும்பம் கொல்கத்தாவுக்கு இடம்பெயர்ந்தது.

%d bloggers like this: