Archive | கவிதை RSS feed for this section

இனியவை படைப்போம்!

12 Aug

தேசம் காத்திட வாருங்கள் – நம் 
தெய்வம் காத்திட வாருங்கள்!
தேசம் காத்திட வாருங்கள்- நம் 
தெய்வம் பாரத தேசமிதே!

எல்லையில் எதிரிகள் நடமாட்டம் – உள் 
நாட்டினில் துரோகிகள் கொண்டாட்டம்!
எல்லாம் தெரிந்தும் வீட்டுக்குள்ளே 
முடங்கியிருப்பது ஏனய்யா?

பலமரம் சேர்ந்தால் ஒரு தோப்பு- இப் 
பழமொழி அனைவரும் அறிந்தது தான்
பலவகைக் கட்சி கூறுகளாலே
பட்ட அவலங்கள் போதுமய்யா!

சுதந்திரக் காற்றை சுவாசித்து- நாம் 
சுகமாய் வாழ்ந்திட வீழ்ந்தவரை 
மனதில் இருத்தி பூஜிப்போம்!
மடமை அழித்திட வாருமய்யா!

பலமலர் சேர்ந்தால் ஒருமாலை – அது 
பரமனை வழிபட உதவிடுமே!
பலப்பல சாதி வேற்றுமை சொல்லி 
பைத்தியமானது போதுமய்யா!

வாய்மை, தூய்மை, ஒழுக்கத்தை – தன் 
வாழ்வில் பேணிய காந்தியினை 
மறந்துவிட்ட தலைவர்களாலே 
மானம் கேட்டது போதுமய்யா!

பலதுளி சேர்ந்தால் பெருவெள்ளம் – நாம் 
பலரும் சேர்ந்தது பாரதமே! 
இதுவரை பெற்ற அனுபவம் போதும்
இனியவை படைப்போம் வாருமய்யா!

– விஜயபாரதம் (02.07.1999)
Advertisements

கறை

22 Jul
.

அன்புடன் தொற்றிய நாய் மீது

வள்ளென விழுந்தேன்.

சட்டையில் மட்டுமா கறை?

.
விஜயபாரதம் (13.11.1998)

திருப்பாதை

14 Jul

வித்தாக என் தந்தை,
விளைநிலமாய் என் அன்னை,
முத்தாக நான் மலர,
முறுவலுடன் பெற்றோர்கள்!
.
வித்தைக்கு என் ஆசான்,
விழைவுக்கு என் நண்பர்,
சித்தாக நான் சுடர,
சிந்தனைகள் பல உதயம்!
.
சொத்தாக நற்கல்வி,
சொந்தமென குலக்கீர்த்தி,
பத்தினியாய் என் மனைவி,
பக்கத்தில் நான் பெற்றோர்!
.
பித்தாக என் அன்பர்,
பின்னாலே உறவோர்கள்,
இத்தனையும் போதாது,
இறைவனவன் என்னோடு!

 

(பி.கு: 1991-இல் எழுதிய கவிதை)

அபத்தம்

6 Jun

மூக்கு முட்ட சாப்பிடும்
தொழிலாளர்நல ஆய்வாளர்.

ஏக்கத்துடன் இலைஎடுக்கும்
குழந்தைத் தொழிலாளி.