Tag Archives: இளைஞர்மணி

இதோ ஓர் இளம் விஞ்ஞானி!

20 Feb

பிரவீண்குமார் கோரகாவி

கணிப்பொறி நிறுவனமான இன்டெல் 2004-இல் அமெரிக்காவின் போர்ட்லேண்டில் நடத்திய சர்வதேச அளவிலான அறிவியல் மற்றும் பொறியியல் கண்காட்சி அது (ISEF). அதில் இடம்பெற்ற விண்வெளி அறிவியல், உயிரி வேதியியல் படைப்புகளில் பரிசுக்குரியவர்களைத் தேர்வு செய்யச் சென்ற நடுவர் குழுவில் இடம் பெற்றிருந்த அந்தச் சிறுவனைப் பார்த்து கண்காட்சிக்கு வந்திருந்த எல்லோரும் திகைத்தனர். ஏனெனில், அப்போது அவனுக்கு வயது 15 மட்டுமே. அந்த நடுவர் குழுவில் நாஸா விஞ்ஞானிகளுடன் அவன் இடம் பெற்றிருந்தான்.

பள்ளிப்படிப்பு கூட முடிக்காத அந்தச் சிறுவன் வேறு யாருமில்லை, இந்தியாவைச் சேர்ந்த பிரவீண்குமார் கோரகாவி தான். அவனை நடுவர் குழுவில் சேர்ப்பதற்கு வித்திட்டவை, இளம் வயதில் அவன் உருவாக்கிய புதிய கண்டுபிடிப்புகளே. அவன் உருவாக்கிய 40,000 ஆண்டு நாள்காட்டியும், குடிநீர் சுத்திகரிப்புத் தொழில்நுட்பமும், உணவுப் பொருள்களைக் கெடாமல் பாதுகாக்கும் புதிய தொழில்நுட்பமும் அவனது பிறவி மேதைமையை வெளிப்படுத்தின. அவனை சர்வதேச அறிவியல் சமூகம் வாரி அணைத்துக்கொண்டது. Continue reading

Advertisements

சர்வதேச மேலாண்மை வல்லுநராகத் திகழும் கணினி விஞ்ஞானி

13 Feb

அமர் குப்தா

’24 மணிநேர அறிவுத் தொழிற்சாலை’ என்ற சொல் உலக அளவில் பிரபலமாகி வருகிறது. 250 ஆண்டுகளுக்கு முன் உலகை உருமாற்றிய தொழிற்புரட்சி போல, இந்த நூற்றாண்டின் அடிப்படை மாற்றத்துக்கு 24 மணிநேர அறிவுத் தொழிற்சாலை (24-Hour Knowledge Factory) காரணமாக அமையும் என்று கருதப்படுகிறது.

இதன்படி, பல்வேறு துறைகளைச் சார்ந்த வல்லுநர்களும், விஞ்ஞானிகளும், உலகின் வெவ்வேறு மூலைகளில் இருந்தபடியே ஒருங்கிணைந்து பணிபுரியும் வாய்ப்பு அமைத்துக் கொடுக்கப்படுகிறது. துறைகளிடையிலான இணக்கம், பணிகளைப் பகிர்ந்துகொள்ளும் ஒத்துழைப்பு, அறிவுசார் சொத்துரிமை திட்டம், தகவல் தொடர்பின் மூலமாக ஆய்வுச் சிரமங்களைக் குறைத்தல் ஆகிய அம்சங்களைக் கொண்டதாக  ’24 மணிநேர அறிவுத் தொழிற்சாலை’ விளங்குகிறது.

இதனை சிந்தனைக் கருவாக்கி வடிவமைத்தவர், இந்தியாவைச் சார்ந்த கணினி விஞ்ஞானியான அமர் குப்தா. கணினியியலில் பல சாதனைகளைச் செய்துள்ள குப்தா, மேலாண்மைத் துறையிலும் உலக அளவில் நிபுணராகத் திகழ்கிறார். அமெரிக்கக் குடிமகனாகிவிட்ட குப்தா, உலக அமைப்புகள் பலவற்றில் வழிகாட்டும் வல்லுநர் ஆவார். Continue reading

கணினியைக் காக்கும் செயல்வீரர்கள்

6 Feb

சாகேத் மோடி

இன்றைய உலகம் கணினி உலகம். தனிநபர்களின் கையடக்கமான அலைபேசி முதல் பெறு நிறுவனங்களின் ஆராய்ச்சியகங்கள் வரை கணினியாக்கம் இல்லாத இடமில்லை. அதேசமயம், கணினியில் தகவல் பாதுகாப்பு பெரும் சவாலானதாக மாறி வருகிறது. எங்கிருந்தோ மறைமுகமாக இயங்கும் கணினித் தகவல் திருடர்கள் அல்லது கொந்தர்கள் என அழைக்கப்படும் ஹேக்கர்களின் (Hackers) கைவரிசையால் நமது கணினிகள் செயலிழப்பதும், கணினியில் உள்ள முக்கியமான தகவல்கள் திருடப்படுவதும் பெரும் ஆபத்தாக மாறி வருகின்றன.

இதற்கு ஓர் உதாரணத்தை இங்கு காணலாம். கனடா நாட்டின் மிகப் பெரிய தொலைதொடர்பு நிறுவனம் நோர்டெல்.  சுமார் 400 பில்லியன் டாலர் (இந்திய மதிப்பில் ரூ. 25.5 லட்சம் கோடி) மதிப்பிலான நிறுவனம் அது. இந்நிறுவனம் 2017-இல் திவாலானதாக அறிவிக்கப்பட்டது. அதற்குக் காரணம், நிறுவனத்தின் கணினி வழித் தகவல்கள் போதிய விழிப்புணர்வுடன் பாதுகாக்கப்படாததே. நோர்டெலின் கணினிக் கட்டமைப்புக்குள் ஊடுருவிய ஹேக்கர்களால் அதன் அடிப்படைத் தகவல்கள்  போட்டி நிறுவனங்களான சீன, ரஷ்ய நிறுவனங்களின் கைகளில் சேர்ந்தன. அதன் விளைவாக உலகளாவிய ஒப்பந்தப் புள்ளிகளில் நோர்டெலை போட்டி நிறுவனங்கள் வீழ்த்தி முன்னேறின. 2014-இல் துவங்கிய நோர்டெலின் வீழ்ச்சியை யாராலும் தடுக்க முடியவில்லை.

இதற்கு ஒரே காரணம், தகவல் பாதுகாப்பு  (Information Security), கணினிப் பாதுகாப்புக்கு (Computer Security) நோர்டெல் நிறுவனம் உரிய முக்கியத்துவம் அளிக்காததே. கணினியை வடிவமைக்கும் விஞ்ஞானிகளைவிட வேகமாகச் சிந்திப்பவர்களாகவும், கணினி வலைப்பின்னலுக்குள் நுழைய குறுக்குவழி கண்டுபிடிப்பவர்களாகவும் சர்வதேச அளவில் பிரமாண்டமாக ஹேக்கர்களின் படை இயங்குகிறது. பல அரசுகளின் தகவல் திரட்டுகளையும் அவர்கள் கபளீகரம் செய்திருக்கின்றனர். பல வங்கிகள் இவர்களால் முடங்கி இருக்கின்றன. எனவேதான் ஹேக்கர்களின் தாக்குதல்களிலிருந்து கணினி இயக்கத்தையும், தகவல் தரவுகளையும் காப்பாற்ற பலகோடி செலவில், ஹேக்கிங் தடுப்புச் செயலிகளும், பாதுகாப்பு ஏற்பாடுகளும் செய்யப்படுகின்றன. இதற்கு உதவுவோரும் அடிப்படையில் ஹேக்கர்களே. ஆனால் இவர்கள் அறநெறிசார் ஹேக்கர்கள் (Ethical Hackers) என்று அழைக்கப்படுகின்றனர். Continue reading

விண்வெளியில் ஒளிரும் இந்திய வீராங்கனை

30 Jan

கல்பனா சாவ்லா

அந்தச் சிறு பெண் தனது நோட்டுப் புத்தகத்தில் விமானங்களை வரைவதில் அளவற்ற ஆர்வமுடையவளாக இருந்தாள். விதம் விதமான விமானங்களை வரைவது அவளது பொழுதுபோக்கு. வளர்ந்தபோது விமானத்தில் பறப்பதைப் பற்றிக்  கனவு கண்டாள். அவளது ஆர்வமும் கனவும், அவளை விண்ணில் மகத்தான சாதனை செய்யும் தாரகையாக பின்னாளில் உயர்த்தின. இன்று அவளது பெயரில் விண்வெளியில் ஒது புதிய சிறு கோள் விண்வெளியில் இருக்கிறது.

அவள் வேறு யாருமில்லை, 2003-இல் விண்வெளியில் வெடித்துச் சிதறிய கொலம்பியா விண்வெளி ஓடத்தில் விண்வெளி வீராங்கனையாகப் பயணித்து, உலக மக்களின் நெஞ்சங்களில் நீங்காத இடம் பெற்ற கல்பனா சாவ்லா என்ற அமெரிக்கா வாழ் இந்தியப் பெண் தான். இன்று உலகில் பல இடங்களுக்கு அவரது பெயர் சூட்டப்பட்டிருகிறது. பெண்களுக்கு சிறந்த முன்னுதாரணமாக அவரது வாழ்க்கைப் பயணம் கற்பிக்கப்படுகிறது.

Continue reading