Tag Archives: காங்கிரஸ்

மகா’ வேடதாரிகள்!

26 Nov

முகநூல் உலகம் ஒரு வித்யாசமான உலகம். உடனடி உணர்ச்சிவசங்களே இங்கு கோலோச்சுகின்றன. எந்த ஒரு விஷயம் குறித்தும் உடனடி பதிவும் விவாதமும் முகநூலின் தவிர்க்க முடியாத அங்கம்.

ஆனால்-

இரு தினங்களுக்கு முன் பாஜகவின் தேவேந்திர பட்னாவிஸ், தேசியவாத காங்கிரஸின் அஜித் பவார் உதவியுடன் மகாராஷ்டிரத்தில் ஆட்சி அமைத்தபோது குதூகலமாகப் பதிவிட்டு பொங்கிய பலர் இன்று விரக்தி வெளிப்பட புலம்பல்களைப பதிவிட்டு வருகிறார்கள். இது தேவையற்ற வருத்தம்.

இரு தினங்களுக்கு முன் பாஜகவின் அதிரடியைக் கண்டு அதிர்ந்த பாஜக வெறுப்பாளர்கள் பலர் இன்று குதூகலமாக மதச்சார்பின்மையை முழங்குகிறார்கள். கொஞ்சகாலம் மகிழட்டும். தவறில்லை. சிவசேனை செக்யூலரானது சந்தோஷமே. Continue reading

ஆச்சரியம் அளிக்கப்போகும் கிழக்கு இந்தியா!

25 Apr

நாட்டின் கிழக்குப் பகுதியில் உள்ள மாநிலங்களான பிகார் (40), ஜார்க்கண்ட் (14), மேற்கு வங்கம் (42), ஒடிசா (21) ஆகியவற்றில் மொத்தமாக 117 மக்களவைத் தொகுதிகள் உள்ளன.

இவற்றில் பிகாரில் பாஜகவின் தோழமைக் கட்சியான ஐக்கிய ஜனதாதளமும், ஜார்க்கண்டில் பாஜகவும், மேற்கு வங்கத்தில் திரிணமூல் காங்கிரஸும், ஒடிசாவில் பிஜு ஜனதா தளமும் ஆட்சி செய்கின்றன.

கிழக்கு மாநிலங்களில் அதிக அளவில் பரபரப்புக்குள்ளாகி இருக்கும் மேற்கு வங்கம், இம்முறை தேர்தலில் ஆச்சரியமான முடிவுகளைத் தரும் என்று அரசியல் உலகம் எதிர்பார்க்கிறது. Continue reading

தேர்தல் முடிவைத் தீர்மானிக்கும் தென்னிந்தியா

20 Apr

இதுவரை நடந்த மக்களவைத் தேர்தல்களில் மத்திய ஆட்சியைத் தீர்மானிப்பதாக விளங்கிவந்தது உ.பி, ம.பி.யை உள்ளடக்கிய மத்திய இந்தியா தான். ஆனால் இம்முறை வரலாறு மாறுகிறது. 132 எம்.பி.க்களைத் தேர்ந்தெடுக்கவுள்ள தென்னிந்தியா இம்முறை தேர்தல் முடிவைத் தீர்மானிக்கும் சக்தியாக உள்ளது.

தென்னிந்தியாவில் தமிழ்நாடு (39), கேரளம் (20), கர்நாடகம் (28), ஆந்திரப் பிரதேசம் (25), தெலங்கானா (17) ஆகிய 5 மாநிலங்களும், புதுச்சேரி (1), அந்தமான் மற்றும் நிகோபர் தீவுகள் (1), லட்சத்தீவுகள் (1) ஆகிய 3 யூனியன் பிரதேசங்களும் உள்ளன.

இத் தேர்தலில் பிரதானப் போட்டியாளர்களான பாஜகவுக்கும் காங்கிரஸ் கட்சிக்கும் சவாலாக விளங்கும் பிரதேசமாக தென்னிந்தியா உள்ளது.

***

2014 தேர்தல் முடிவுகள்:

சென்ற மக்களவைத் தேர்தலில் தென்னிந்தியாவில் இருந்து 39 எம்.பி.க்களை மட்டுமே ஆளும் தேசிய ஜனநாயகக் கூட்டணி பெற்றது. தமிழ்நாடு (2), புதுச்சேரி (1), ஆந்திரப்பிரதேசம் (17), தெலங்கானா (1), கர்நாடகம் (17), அந்தமான்- நிகோபர் தீவுகள் (1) பகுதிகளில் தேசிய ஜனநாயகக் கூட்டணி வென்றது. இதில் பாஜகவின் பங்கு 22.

அப்போது பாஜகவுடன் கூட்டணித் தோழராக இருந்த தெலுங்குதேசம் கட்சி தற்போது ஆந்திரப் பிரதேசத்தில் தனித்துப் போட்டியிடுகிறது. சென்ற தேர்தலில் தமிழகத்தில் தனித்துப் போட்டியிட்ட அதிமுக இம்முறை பாஜகவுடன் கூட்டணி அமைத்துள்ளது. மற்றபடி பாஜக கூட்டணியில் பெருத்த மாற்றம் இல்லை.

சென்ற தேர்தலில் ஐக்கிய முற்போக்குக் கூட்டணி நாடு முழுவதும் பெற்ற 44 இடங்களில் தென்னிந்தியாவின் பங்களிப்பு 24. கேரளம் (12), லட்சத் தீவுகள் (1), கர்நாடகம் (9), தெலங்கானா (2) பகுதிகளில் இக் கூட்டணி வென்றது. இதில் காங்கிரஸ் மட்டும் 19 இடங்களைக் கைப்பற்றியது.

சென்ற தேர்தலில் கர்நாடகத்தில் தனித்துப் போட்டியிட்ட மதச்சார்பற்ற ஜனதாதளமும், தமிழகம், புதுவையில் தனி கூட்டணியாகப் போட்டியிட்ட திமுகவும் இம்முறை காங்கிரஸ் அணியில் சேர்ந்துள்ளன. பிற மாநிலங்களில் எந்த மாற்றமும் இல்லை.

பாஜக, காங்கிரஸ் அல்லாத கட்சிகள் 69 இடங்களில் வென்றன. அதில் தமிழகத்தின் அதிமுக (37), தெலங்கானாவின் தெலங்கானா ராஷ்டிர சமிதி (11), ஆந்திரப் பிரதேசத்தின் ஒய்எஸ்ஆர் காங்கிரஸ் (8), இடதுசாரிகள் (10) ஆகியவை முக்கியமானவை. இதில் தற்போது பாஜக அணியில் அதிமுகவும், காங்கிரஸ் அணியில் மதச்சார்பற்ற ஜனதாதளமும் சேர்ந்துவிட்டன. இடதுசாரிகள் தமிழகத்தில் மட்டும் திமுக} காங்கிரஸ் கூட்டணியில் இடம் பெற்றுள்ளனர். Continue reading

மேற்கு இந்தியாவில் மேலாண்மை யாருக்கு?

13 Apr

நாட்டின் பொருளாதார மையமாக விளங்கும் மேற்கு இந்திய பிரதேசத்தில் குஜராத், மகாராஷ்டிரம், கோவா ஆகிய 3 மாநிலங்களும், டாமன் மற்றும் டையூ,  தாத்ரா மற்றும் நகர்ஹவேலி ஆகிய 2 யூனியன் பிரதேசங்களும் உள்ளன.

இந்தப் பகுதிகளிலிருந்து மக்களவைக்கு 78 எம்.பி.க்கள் தேர்வு செய்யப்படுகின்றனர். குஜராத்- 26, மகாராஷ்டிரம்- 48, கோவா- 2, டாமன் மற்றும் டையூ- 1, தாத்ரா மற்றும் நகர்ஹவேலி- 1 என்ற எண்ணிக்கையில் தொகுதிகள் உள்ளன.

இவற்றில் சென்ற தேர்தலில் பாஜக 72 தொகுதிகளில் வென்றது. காங்கிரஸ் 2 தொகுதிகளிலும் தேசியவாத காங்கிரஸ் 4 தொகுதிகளிலும் வென்றன.

2014 தேர்தல் நிலவரம்:

2014 தேர்தலில் பாஜகவின் வெற்றிப் பயணத்துக்கு மிகவும் உறுதுணையாக இருந்த பிரதேசம் இது. குஜராத்தில் மொத்தமுள்ள 26 தொகுதிகளிலும் பாஜக வென்றது. அப்போது மண்ணின் மைந்தர் நரேந்திர மோடி பிரதமர் வேட்பாளராகக் களமிறங்கியதால் குஜராத் முழுவதும் பாஜக அலை வீசியது.

அதேபோல, அண்டை மாநிலமான மகாராஷ்டிரத்திலும் பாஜகவின் செல்வாக்கு மிளிர்ந்தது. அங்குள்ள 48 தொகுதிகளில் பாஜக- 23, சிவசேனை-18, ஸ்வாபிமான் பக்ஷ-1 என தேசிய ஜனநாயகக் கூட்டணி 42 இடங்களைக் கைப்பற்றியது. காங்கிரஸ்-2, தேசியவாத காங்கிரஸ்- 4 என ஐக்கிய முற்போக்குக் கூட்டணி 6 இடங்களில் வென்று ஆறுதல் அடைந்தது.

மற்றொரு அண்மை மாநிலமான கோவாவில் உள்ள இரு தொகுதிகளும் பாஜக வசமாயின. டாமன்- டையூ, தாத்ரா- நகர்ஹவேலி ஆகிய இரு யூனியன் பிரதேசத் தொகுதிகளிலும் பாஜகவே வென்றது.

இவற்றில் குஜராத், மகாராஷ்டிரம், கோவா மாநிலங்களில் பாஜகதான் தற்போது ஆட்சியிலும் உள்ளது. பாஜக} காங்கிரஸ் ஆகிய இரு கட்சிகளின் மோதல் களமாக இந்தப் பிரதேசம் விளங்குகிறது.

 

குஜராத்தில் நேரடி மோதல்:

பிரதமர் மோடி முதல்வராக இருந்த மாநிலம் குஜராத். பாஜக தேசியத் தலைவர் அமித் ஷாவும் குஜராத் மாநிலத்தவர். எனவே அரசியல் தலைமையைப் பொருத்த வரை பாஜகவின் கரம் ஓங்கியுள்ளது. மோடி, அமித் ஷா- முதல்வர் விஜய் ரூபானி- துணை முதல்வர் நிதின்பாய் படேல் என்ற நால்வர் அணி பாஜகவுக்கு வலுவாக உள்ளது.

மூத்த தலைவர் கேசுபாய் படேல் ஒதுங்கி இருப்பதும், பாஜக முன்னாள் தலைவர் அத்வானி தேர்தலில் போட்டியிடாததும் கட்சிக்குள் சிறு சலசலப்பை ஏற்படுத்தினாலும், அதனை பாஜக தலைமை சரிசெய்துவிட்டது. அத்வானி வென்ற காந்திநகர் தொகுதியில் அமித் ஷாவே போட்டியிடுவதால் அனைவரது கவனமும் திசை திரும்பியுள்ளது.

மறுதரப்பில் காங்கிரஸ் கட்சியின் அகில இந்திய பொதுச்செயலாளரும் சோனியா காந்தியின் தனிச் செயலாளருமான அகமது படேல் காங்கிரஸ் கட்சியின்  பிரதானத் தலைவராக உள்ளார். உயர் ஜாதியினரான படேல்களை மிகவும் பிற்பட்டோர் பட்டியலில் சேர்க்கக் கோரி போராட்டம் நடத்திய படிதார் ஆந்தோலன் தலைவர் ஹார்திக் படேல் தற்போது காங்கிரஸில் இணைந்துவிட்டார். அவரது வரவு காங்கிரஸ் கட்சிக்கு புத்துணர்வூட்டியுள்ளது. தலித் தலைவர் ஜிக்னேஷ் மேவானி காங்கிரஸ் கட்சியின் இன்னோர் இளம் தலைவர்.

காங்கிரஸ் கட்சியின் நேசக் கட்சிகளான தேசியவாத காங்கிரஸýம், பாரதிய பழங்குடியினர் கட்சியும் இம்முறை தனித்துப் போட்டியிடுகின்றன. தேசியவாத காங்கிரஸ் தலைவராக உள்ள சங்கர் சிங் வகேலா, பாஜகவிலும் காங்கிரஸிலும் தலைவராக இருந்த முன்னாள் முதல்வர். அவர் மாநிலத் தலைவராக இருப்பதால்தான் காங்கிரஸ் கூட்டணியில் தேசியவாத காங்கிரஸ் கட்சி சேரவில்லை. அதேபோல, காங்கிரஸ் கட்சியின் முன்னணித் தலைவராக இருந்த அல்பேஷ் தாகுர் கட்சியிலிருந்து விலகி இருப்பது அக்கட்சிக்கு தெற்கு குஜராத்தில் சறுக்கலாக உள்ளது.

2017 பேரவைத் தேர்தலில் காங்கிரஸ் கட்சியின் வெற்றிக்கு பல இடங்களில் உதவிய பாரதிய பழங்குடியினர் கட்சித் தலைவர் சோட்டுபாய் வாஸவா காங்கிரஸ் கட்சித் தலைமையின் உதாசீனத்தால் தனித்துப் போட்டியிடுகிறார். கூட்டணியின்றி பாஜகவை தனித்துச் சந்திப்பது காங்கிரஸ் கட்சிக்கு பலவீனம்.

2017 தேர்தலின்போது, இம்மாநில சட்டப்பேரவையில் மொத்தமுள்ள 182 இடங்களில் பாஜக 100 இடங்களிலும்,  காங்கிரஸ் கூட்டணி 81 இடங்களிலும் (காங்கிரஸ்- 72, பாரதிய பழங்குடிக் கட்சி- 2. தேசியவாத காங்கிரஸ்- 1) வென்றன; சுயேச்சைகள் இரு இடங்களிலும் வென்றனர்; 4 இடங்கள் காலியாக உள்ளன. காங்கிரஸ் கட்சியிலிருந்து 6 எம்எல்ஏக்கள் விலகி அதிர்ச்சி அளித்துள்ளனர். இதன் காரணமாக 6 இடங்கள் காலியாக உள்ளன. இங்குள்ள மொத்த வாக்காளர்களின் எண்ணிக்கை 4.3 கோடி.

மகாராஷ்டிரத்தில் கூட்டணிகள் மோதல்:

மகாராஷ்டிரத்தில் பாஜக- சிவசேனை கூட்டணி அரசு ஆட்சி செய்கிறது. இவ்விரு கட்சிகளும் சில ஆண்டுகளாகவே ஊடலும் கூடலுமாக உள்ளன. பால் தாக்கரே காலத்தில் மகாராஷ்டிரத்தில் சிவசேனை பெற்றிருந்த தனிப்பட்ட செல்வாக்கை இப்போது பாஜக சுவீகரித்துவிட்டது. இதனை சிவசேனையால் ஜீரணிக்க முடியாததால் அவ்வப்போது பாஜகவை கடுமையாக விமர்சிக்கிறது. எனினும், ஹிந்துத்துவ அரசியல் அடிப்படையில் இரு கட்சிகளும் இயங்குவதால், தேர்தல் தருணத்தில் வேறு வழியின்றி சமரசம் செய்து கொள்கின்றன.

பாஜகவைச் சேர்ந்த தேவேந்திர பட்னவிஸ் முதல்வராக உள்ளார். இம்மாநிலத்தைச் சேர்ந்த  நிதின் கட்கரி மத்திய சாலைப் போக்குவரத்து மற்றும் நெடுஞ்சாலைத் துறை அமைச்சராக உள்ளார். நாடு முழுவதும் சாலை விரிவாக்கத் திட்டங்களை வெற்றிகரமாக நடைமுறைப்படுத்தியதன் மூலமாக  சிறந்த அமைச்சர் என்ற பெயரைப் பெற்றிருக்கிறார் கட்கரி.

சிவசேனைத் தலைவர் உத்தவ் தாக்கரே, இந்திய குடியரசுக் கட்சித் தலைவர் ராம்தாஸ் அதாவலே, மகாராஷ்டிரா ஸ்வாபிமான் கட்சித் தலைவர் நாராயண் ராணே ஆகியோர்  பாஜக அணியிலுள்ள முக்கியமான தலைவர்கள்.

சென்ற 2014 தேர்தலில் தேசிய ஜனநாயகக் கூட்டணியில் இடம் பெற்றிருந்த ஸ்வாபிமான் பக்ஷ, ராஷ்டிரீய சமாஜ் பக்ஷ கட்சிகள் இப்போது பிரிந்து சென்று விட்டன.  இவற்றில் ஸ்வாபிமான் பக்ஷ கட்சி தற்போது காங்கிரஸ் கூட்டணியில் சேர்ந்துவிட்டது. பகுஜன் விகாஸ் அகாடி கட்சி, யுவ ஸ்வாபிமான் கட்சி ஆகியவையும் காங்கிரஸ் அணியில் உள்ளன.

காங்கிரஸ் கட்சியின் உறுதுணையாக இம்மாநிலத்தில் தேசியவாத காங்கிரஸ் கட்சி உள்ளது. அக்கட்சியின் தலைவர் சரத் பவார், அவரது மகள் சுப்ரியா சுலே ஆகியோர் காங்கிரஸ் அணியின் பிரதானத் தலைவர்கள்.  காங்கிரஸ் முன்னாள் முதல்வர்கள் சுஷீல்குமார் ஷிண்டே,  அசோக் சவாண், பிருத்விராஜ் சவாண் ஆகியோரும் காங்கிரஸ் கட்சியின் முகங்கள்.

சிவசேனையிலிருந்து பிரிந்து ராஜ் தாக்கரே துவங்கிய மகாராஷ்டிர நவநிர்மாண் சேனை கட்சி காங்கிரஸ் கூட்டணியில் இடம்பெறாத போதும், பாஜகவுக்கு எதிராகவும் காங்கிரஸ் கட்சிக்கு ஆதரவாகவும் பிரசாரம் செய்கிறது. இங்குள்ள மொத்த வாக்காளர்களின் எண்ணிக்கை 8.73 கோடி.

2017 மார்ச்சில் நடைபெற்ற மகாராஷ்டிர சட்டப்பேரவைத் தேர்தலில் மொத்தமுள்ள 288 தொகுதிகளில் பாஜக கூட்டணி 186 இடங்களில் வென்றது (பாஜக- 122, சிவசேனை- 63, இந்திய குடியரசுக் கட்சி- 1). காங்கிரஸ் கூட்டணி 86 இடங்களில் வென்றது (காங்கிரஸ்- 42, தேசியவாத காங்கிரஸ்-41, பகுஜன் விகாஸ் அகாடி – 3). சிபிஎம்} 1, மகாராஷ்டிர நவநிர்மாண் சேனை-1, ஏஐஎம்ஐஎம்-2, சுயேச்சைகள்- 7 உள்பட பிறர் 16 பேர் உள்ளனர்.

கோவாவில் இருமுனைப் போட்டி:

இரு மக்களவைத் தொகுதிகளைக் கொண்ட கோவாவில் பாஜகவுக்கும் காங்கிரஸýக்கும் நேரடிப் போட்டி நிலவுகிறது. வடக்கு கோவா- தெற்கு கோவா என இரு தொகுதிகளிலும் இருவேறுபட்ட அரசியல் காற்று வீகிறது. இங்குள்ள மொத்த வாக்காளர்களின் எண்ணிக்கை 11.27 லட்சம்.

இம் மாநிலத்தில் எந்தக் கட்சிக்கும் பெரும்பான்மை கிடைக்காத சூழலில் பாஜக குதிரைபேரத்தைக் கொண்டு ஆட்சியைக் கைப்பற்றிவிட்டதாக காங்கிரஸ் குற்றம் சாட்டுகிறது. இங்கு பாஜகவின் தோழமைக் கட்சியாக இருந்த மகாராஷ்டிரவாதி கோமந்தக் கட்சி இப்போது காங்கிரஸ் அணிக்கு மாறிவிட்டது.

கோவாவில் பாஜகவின் வளர்ச்சிக்கு வித்திட்டவரான முன்னாள் முதல்வர் மனோகர் பாரிக்கர் அண்மையில் காலமானார். அவர்மீது மாநில மக்களுக்கு மிகுந்த அபிமானம் உள்ளது. அவரின்றி பாஜக சந்திக்கும் முதல் தேர்தல் இது. பாரிக்கர் மீதான அனுதாபம் வாக்குகளைப் பெற்றுத் தரும் என பாஜக நம்புகிறது.

பாஜக முதல்வராக பிரமோத் சாவந்த் உள்ளார். துணை முதல்வராக கோவா முன்னணிக் கட்சியின் தலைவர் விஜய் சர்தேசாய் உள்ளார். முன்னாள் முதல்வர் லட்சுமிகாந்த் பார்சேகரும்  பாஜகவின் முக்கியத் தலைவர்.

எதிர்த்தரப்பில், காங்கிரஸ் முன்னாள் முதல்வர் பிரதாப் சிங் ராணே, மகாராஷ்டிரவாதி கோமந்தக் கட்சியின் தலைவர் சுதின் தவாலிகர்,  முன்னாள் ஆர்எஸ்எஸ் தலைவரும் இந்நாள் பாஜக எதிரியுமான கோவா சுரக்ஷா மஞ்ச் தலைவர் சுபாஷ் வெலிங்கர் ஆகியோர் உள்ளனர். சிவசேனை இங்கு பாஜக கூட்டணியில் இல்லை.

மார்ச் 2017இல் நடைபெற்ற கோவா சட்டப் பேரவைத் தேர்தலில் மொத்தமுள்ள 40 தொகுதிகளில் பாஜக கூட்டணி 19 இடங்களிலும் (பாஜக-13, ம.கோ.க-3, கோ.மு.க- 3), காங்கிரஸ் கூட்டணி 18 இடங்களிலும் (காங்கிரஸ்- 17, தேசியவாத காங்கிரஸ்-1) வென்றன; சுயேச்சைகள் 3 இடங்களில் வென்றனர். சுயேச்சைகளின் ஆதரவோடு பாஜக ஆட்சியைப் பிடித்தது.

ஆனால் மனோகர் பாரிக்கர் உடல்நலக் குறைவு காரணமாக பாஜக ஆட்சி ஆட்டம் கண்டபோது,  சுயேச்சை உறுப்பினர்கள் பாஜகவில் சேர்க்கப்பட்டனர். தவிர,  பாஜகவை மிரட்டி வந்த தோழமைக் கட்சியான மகாராஷ்டிரவாதி கோமந்தக் கட்சியின் இரு உறுப்பினர்கள் பாஜகவில் சேர்க்கப்பட்டனர். அதனால் அக்கட்சி கூட்டணியிலிருந்து வெளியேறியது. எனவே கோவாவில் பாஜக ஆட்சி தற்போது நூலிழைப் பெரும்பான்மையுடன் மட்டுமே உள்ளது. அணி மாறிய எம்எல்ஏக்களால் 4 காலியிடங்கள் ஏற்பட்டுள்ளன.

டாமன்- டையூ,  தாத்ரா- நகர்ஹவேலி ஆகிய யூனியன் பிரதேசங்களிலும் காங்கிரஸ்-பாஜக இடையே போட்டி நிலவுகிறது. இம்மாநிலங்கள் துணைநிலை ஆளுநரின் நேரடிக் கட்டுப்பாட்டில் ஆளப்படுகின்றன; இவற்றில் சட்டப் பேரவைகள் இல்லை.

மாநிலங்களில் நிலவும் பிரச்னைகள்:

குஜராத், மகாராஷ்டிர மாநிலங்கள் ஜிஎஸ்டி வரிவிதிப்பால் பெரும் பாதிப்பை எதிர்கொண்டுள்ளன. இம்மாநிலங்களில் பாஜகவின் பாரம்பரிய வாக்கு வங்கியாக இருந்த வர்த்தகர்கள் இதனால் மத்திய அரசு மீது அதிருப்தி அடைந்திருப்பதாகக் கூறப்படுகிறது. உயர் மதிப்பு ரூபாய்  நோட்டுகள் ஒழிப்பு நடவடிக்கையும் இம்மாநிலங்களில் பெரும் தாக்கம் ஏற்படுத்தியுள்ளது.

படிதார் போராட்டத்தால் மாநில அரசுக்கு எதிராக எழுந்த அதிருப்தி இன்னமும் குறையவில்லை. இது வடக்கு குஜராத், செüராஷ்டிரப் பகுதிகளில் எதிரொலிக்கும் என காங்கிரஸ் நம்புகிறது. 2017 சட்டப்பேரவைத் தேர்தலில் பெற்ற வாக்குகளின் அடிப்படையில் 16 எம்.பி.க்களைப் பெற முடியும் என்பது காங்கிரஸ் கட்சியின் கணக்கு.

பாஜக, காங்கிரஸ் ஆகிய இரு கட்சிகளிலும் அதிருப்தியாளர்கள் பிரச்னை நிலவுகிறது. பல தொகுதிகளில் போட்டி வேட்பாளர்கள் களமிறங்குவதும் எதிரணியை ஆதரிப்பதும் இரு கட்சிகளுக்குமே சிக்கல். இதில் பெருமளவில் பாதிக்கப்பட்டிருப்பது காங்கிரஸ் கட்சியே.

மகாராஷ்டிரத்தில்  விவசாயிகள் நடத்திய போராட்டம் பெரும் எழுச்சியை ஏற்படுத்தியுள்ளது. இங்கு 2014 முதல் 2018 வரையிலான நான்கு ஆண்டுகளில் ஐயாயிரத்துக்கு மேற்பட்ட விவசாயிகள் கடன் பிரச்னையால் தற்கொலை செய்து கொண்டிருக்கின்றனர். இதனால் விவசாயிகளிடையே நிலவும் அதிருப்தி காங்கிரஸ் கட்சிக்கு ஆதரவாக மாறுமா என்பது தேர்தலில் தெரியவரும்.

இருப்பினும், அண்மையில் மோடி அரசு  விவசாயிகளுக்கு அறிவித்த உதவித்தொகை திட்டம் தங்களுக்குக்  கைகொடுக்கும் என பாஜக நம்புகிறது. அதேசமயம், ராகுல் காந்தி அறிவித்துள்ள ஆண்டுக்கு ரூ. 72 ஆயிரம் ‘நியாய்’ உதவித் திட்ட வாக்குறுதி விவசாயிகளைக் கவரும் என்பது காங்கிரஸின் நம்பிக்கை.

விதர்பா தனி மாநிலக் கோரிக்கை, கோரேகானில் தலித் மக்கள் போராட்டம், மராட்டா மக்களின் இட ஒதுக்கீட்டுப் போராட்டம் ஆகியவையும் தேர்தலில் எதிரொலிக்கக் கூடும்.

இரும்புத்தாது உற்பத்தியில் முன்னணி வகித்து வந்த கோவா மாநிலம் சட்ட விரோத சுரங்கங்களால் கடுமையாகப் பாதிக்கப்பட்டது. அதனால் அரசுக்கு ரூ. 35 ஆயிரம் கோடி இழப்பு ஏற்பட்டது. அதை எதிர்த்து போராட்டம் நடத்தியே பாஜக ஆட்சிக்கு வந்தது. அதன்படி, மனோகர் பாரிக்கர் முதல்வராக இருந்தபோது 2012இல் சட்டவிரோத சுரங்கங்கள் தடை செய்யப்பட்டன. இருப்பினும், அம்மாநிலத்தில் சுரங்க விவகாரம் நீறு பூத்த நெருப்பாக இருந்து கொண்டிருக்கிறது.

சுற்றுலா மாநிலமான கோவாவில் கலாசாரக் கட்டுப்பாடுகளுக்கு எதிர்வினை எழுவதால், அவ்விஷயத்தில் பாஜக சற்று அடக்கமாகவே இருக்கிறது. இருப்பினும் பாஜகவின் தோழமை அமைப்புகள் நடத்தும் போராட்டங்களால் சிறுபான்மையினரின் ஆதரவு குறைய வாய்ப்பிருக்கிறது.

குஜராத், கோவாவில் காலியாக உள்ள பேரவைத் தொகுதிகள் சிலவும் இடைத்தேர்தலைச் சந்திக்கின்றன. குறிப்பாக கோவாவில் 3 தொகுதிகளுக்கு நடைபெறும் இடைத்தேர்தல் முடிவுகள் அம்மாநில அரசியலில் தாக்கத்தை ஏற்படுத்தும்.

மொத்தத்தில் சென்ற தேர்தலில் பெற்ற வெற்றியைத் தக்கவைக்க பாஜக போராடுகிறது.  இம்மாநிலங்களில் ஆளும் கட்சியாகவும் பாஜக இருப்பதால் மாநில அளவிலான அதிருப்தியையும் சமாளித்தாக வேண்டியுள்ளது. அதேசமயம், எதிர்க்கட்சியான காங்கிரஸ் புத்தெழுச்சியுடன் பாஜகவை எதிர்கொள்கிறது. இதில் வெல்லப்போவது யார்?  இதற்கான விடை காண சில வாரங்கள் காத்திருப்பதைத் தவிர நமக்கு வேறு வழியில்லை.

Continue reading

வடக்கு இந்தியாவில் வலிமை யாருக்கு?

10 Apr

 

பொதுவாக வட இந்தியா என்று நாம் அழைக்கும் பகுதியில் தக்காணத்துக்கு வடக்கே உள்ள அனைத்துப் பகுதிகளும் அடங்கி இருப்பதாக நினைக்கிறோம். உண்மையில் வட இந்தியா என்பது 5 மாநிலங்கள், 2 யூனியன் பிரதேசங்கள் மட்டுமே அடங்கிய நிலப்பகுதி ஆகும்.

நமது நாட்டை சீராக நிர்வாகம் செய்ய வசதியாக, 1956ஆம் ஆண்டு மாநில மறுசீரமைப்பு சட்டம் இயற்றப்பட்டு, மொழிவாரி மாநிலங்கள் பிரிக்கப்பட்டன. அப்போது, இந்தியக் குடிமைப் பணி ஆட்சியாளர்களின் நிர்வாகத்துக்காக 5 பிரதேசங்கள் பிரிக்கப்பட்டன. அவை: வட இந்தியா, மேற்கு இந்தியா, மத்திய இந்தியா, கிழக்கு இந்தியா, தென் இந்தியா. இவை அல்லாது, 1971இல் உருவாக்கப்பட்ட வடகிழக்கு மாநிலங்களின் கூட்டமைப்பும் ஒரு பிரதேசமாக தற்போது கருதப்படுகிறது.

29 மாநிலங்கள், 7 யூனியன் பிரதேசங்கள்:

இந்தப் பிரதேசங்களில் உள்ள மாநிலங்கள் மற்றும் யூனியன் பிரதேசங்களின் விவரம்:

வட இந்தியா: சண்டிகர் (யூ.பி), தில்லி (யூ.பி), ஹரியாணா, இமாச்சல் பிரதேசம், ஜம்மு-காஷ்மீர், பஞ்சாப், ராஜஸ்தான்.

மேற்கு இந்தியா: கோவா, குஜராத், மகாராஷ்டிரம், டாமன்– டையூ (யூ.பி), தாத்ரா- நகர்ஹவேலி (யூ.பி)

மத்திய இந்தியா: சத்தீஸ்கர், மத்தியப்பிரதேசம், உத்தரகண்ட், உத்தரப் பிரதேசம்.

கிழக்கு இந்தியா: பிகார், ஜார்க்கண்ட், ஒடிஸா, மேற்கு வங்கம்.

தென் இந்தியா: ஆந்திரப் பிரதேசம், கர்நாடகம், கேரளம், புதுச்சேரி (யூ.பி) தமிழ்நாடு, தெலங்கானா, லட்சத் தீவுகள் (யூ.பி), அந்தமான் நிகோபார் தீவுகள் (யூ.பி).

வடகிழக்கு இந்தியா: அருணாசல பிரதேசம், அஸ்ஸாம், மணிப்பூர், மேகாலயம், மிஸோரம், நாகலாந்து, சிக்கிம், திரிபுரா.

Continue reading

மானமுள்ள தமிழரா நீங்கள்?

7 Apr

 

2009இல் இலங்கையில் உள்நாட்டுப் போர் உச்சக்கட்டத்தை அடைந்தபோது, அந்நாட்டு அரசுக்கு பலவகையிலும் உதவியது, மன்மோகன் சிங் தலைமையிலான அன்றைய ஐ.மு.கூட்டணி அரசு. அதன்மூலமாகவே விடுதலைப்புலிகளை சிங்கள ராணுவம் நிர்மூலம் செய்தது.

அங்கு இலங்கையில் வம்சாவளித் தமிழர்களை கொத்துக் குண்டுகளால் இலங்கை ராணுவம் துவம்சம் செய்து கொண்டிருந்தபோது, இங்கே நாம் மக்களவைத் தேர்தலில் ஆழ்ந்திருந்தோம். ‘இந்திராவின் மருமகளே வருக!’ என்று வரவேற்பிதழ் வாசித்துக் கொண்டிருந்தார் தமிழினத் தலைவர் மு.க. Continue reading

வெற்றியை நிர்ணயிக்கும் கூட்டணி அரசியல்

6 Apr

இந்தியாவில் இதுவரை 6 பிரதமர்கள் கூட்டணி அரசுகளை நடத்தி இருக்கிறார்கள். கூட்டணி அரசுகளில் அதிக காலம் நீடித்தது, மன்மோகன் சிங் பிரதமராக இருந்த காங்கிரஸ் தலைமையிலான ஐக்கிய முற்போக்குக் கூட்டணி  (2004-2014). மிகக் குறுகிய காலம் நீடித்த அரசு ,  தேவே கவுடா பிரதமராக இருந்து ஐக்கிய முன்னணி அரசு (324 நாள்கள்).

இந்தக் கூட்டணி அரசுகளின் கதை மிக சுவாரசியமானது. 1975இல் இந்திரா காந்தி கொண்டு வந்த நெருக்கடி நிலைக்கு எதிராக நாடு தழுவிய அளவில் எதிர்க்கட்சிகளின் கூட்டணி முயற்சி துவங்கியது. அப்போது ஸ்தாபன காங்கிரஸ், லோக்தளம், பாரதீய ஜன சங்கம்,  பிரஜா சோஷலிஸ்டு, சம்யுக்த சோஷலிஸ்டு உள்ளிட்ட 11 கட்சிகள் ஒருங்கிணைந்து ஜனதா கட்சியாக உருவெடுத்தன.

1977 தேர்தலில் அந்தக் கட்சி 298 தொகுதிகளில் வென்று ஆட்சியைப் பிடித்தது. மொரார்ஜி தேசாய் பிரதமர் ஆனார். இதை கூட்டணி அரசாகக் கருத முடியாது. ஆயினும் அரசியல் கட்சிகள் இணைந்து செயல்பட முடியும் என்பதற்கான முன்னோட்டமாக தேசாய் அரசு அமைந்தது. பிறகு ஜனதா பிளவுபட்டு, காங்கிரஸ் ஆதரவுடன்  சரண் சிங் பிரதமரானார்.

ஜனதா அரசின் வீழ்ச்சிக்குப் பிறகு இந்திரா காந்தி 1980இல் மீண்டும் பிரதமரானார். 1984இல் இந்திரா காந்தி படுகொலையை அடுத்து நடந்த தேர்தலில் காங்கிரஸ் 426 தொகுதிகளில் அமோக வெற்றி பெற்று ராஜீவ் காந்தி பிரதமரானார். காங்கிரஸ் கட்சிக்கு எதிராக எதிர்க்கட்சிகள் கூட்டணி சேர வேண்டிய தேவை அப்போது ஏற்பட்டது.

***

இது முன்னணிகள்- கூட்டணிகள் யுகம். வலிமையான அரசியல் கூட்டணி அமைக்காவிடில் தேர்தலில் முழுமையான வெற்றியை அறுவடை செய்ய இயலாது. எனவேதான் முக்கிய அரசியல் கட்சிகள் அனைத்தும் ஒத்த கருத்துடைய கட்சிகளுடன் கூட்டணி அமைக்கின்றன.

தேர்தல் களத்தில் வெல்வது மட்டுமல்ல, தனது பிரதான எதிரி வெல்லாமல் தடுப்பதும் ஒரு வியூகமே. அந்த அடிப்படையிலேயே தேர்தல் கூட்டணிகளும் தொகுதி உடன்பாடுகளும் செய்து கொள்ளப்படுகின்றன. வாக்குகள் சிதறாமல் தடுப்பதும், பலதரப்பட்ட மக்களின் வாக்குகளை ஒன்றுசேர்ப்பதும் கூட்டணி அரசியலின் இலக்குகள்.

தற்போது 17வது மக்களவைக்கான தேர்தல் களைகட்டிவிட்டது. ஆளும் பாஜக தலைமையிலான தேசிய ஜனநாயகக் கூட்டணிக்கும், எதிர்க்கட்சி வரிசையில் அமர்ந்திருக்கும் காங்கிரஸ் தலைமையிலான ஐக்கிய முற்போக்குக் கூட்டணிக்கும்தான் பிரதானப் போட்டி.

கேரளம், மேற்கு வங்கம் ஆகிய மாநிலங்களில் மட்டும் இடதுசாரிக் கூட்டணி சொல்லிக் கொள்ளும்படியாக இருக்கிறது. பிற மாநிலங்களில் அந்தந்தப் பிரதேச நிலவரத்துக்குத் தகுந்தாற்போல காங்கிரஸ் அல்லது மாநிலக் கட்சிகளுடன் இடதுசாரிக் கட்சிகள் கூட்டணி அமைப்பது வழக்கமாக இருக்கிறது.

இவற்றில் இரு பிரதானக் கூட்டணிகளே தேர்தல் களத்தில் ஆதிக்கம் செலுத்தப்போகின்றன. இத்தேர்தலில் வெற்றியை நிர்ணயிக்கும் காரணியாக கூட்டணி நிர்வாகம் இருக்கப்போகிறது. அந்த வகையில் தேசிய ஜனநாயகக் கூட்டணியே முதலிடத்தில் இருக்கிறது.

2014 தேர்தலில் 29 கட்சிகளுடன் கூட்டணி அமைத்த பாஜக, இம்முறை 24 கட்சிகளுடன் கூட்டணி அமைத்துள்ளது. அவற்றில் அகாலிதளம், சிவசேனை, ஐக்கிய ஜனதாதளம், அதிமுக, அஸ்ஸôம் கண பரிஷத், பாரத் தர்ம ஜனசேனா ஆகியவை முக்கியமான கட்சிகள்.

சென்ற தேர்தலில் தே.ஜ.கூட்டணியில் இடம்பெற்ற கூர்க்கா ஜனமுக்தி மோர்ச்சா (ஜிஜேஎம்), இந்திய ஜனநாயகக் கட்சி, கொமுதேக, மதிமுக, ஹரியாணா ஜன்ஹித் காங்கிரஸ்,  ராஷ்ட்ரீய லோக் சமதா கட்சி (ஆர்எல்எஸ்பி), ஹிந்துஸ்தான் அவாம் மோர்ச்சா (ஹெச்ஏஎம்), ராஷ்ட்ரீய சமாஜ் பக்ஷா,  சுவாபிமான் பக்ஷா ஆகிய 9 கட்சிகள் இந்தத் தேர்தலில் காங்கிரஸ் அணிக்கு மாறியுள்ளன.

இந்தக் கூட்டணியிலிருந்து வெளியேறிய  தெலுங்குதேசம் கட்சி ஆரம்பத்தில் காங்கிரûஸ ஆதரித்தபோதும், ஆந்திர மாநிலத்தில் தனியாகவே போட்டியிடுகிறது. கோவாவில் பாஜக நடத்திய அதிரடி அரசியலால் பாதிக்கப்பட்ட மகாராஷ்டிரவாதி கோமந்தக் கட்சி இம்முறை தனித்துப் போட்டியிடுகிறது.

அதேசமயம்,  அதிமுக, ஐக்கிய ஜனதாதளம், அஸ்ஸôம் கணபரிஷத், புதிய தமிழகம், தமாகா, பாரத் தர்ம ஜனசேனா உள்ளிட்ட 6 புதிய கட்சிகள் தே.ஜ.கூட்டணியில் ஐக்கியமாகி உள்ளன.

கூட்டணி அமைப்பதில் பாஜக தேசியத் தலைவர் அமித் ஷா சாமர்த்தியமாகச் செயல்பட்டிருக்கிறார். மகாராஷ்டிரத்தில் பாஜக மீது அதிருப்தியுடன் இருந்த சிவசேனை கட்சியை கூட்டணியில் தொடர்ந்து இருக்கச் செய்ததும், அஸ்ஸôமில் அஸ்ஸôம் கண பரிஷத்தை கூட்டணியில் தொடரச் செய்ததும் அவரது முக்கியமான களப்பணி.

அதேசமயம், பாஜகவுக்கு மாற்றாக தன்னை முன்னிறுத்தும் காங்கிரஸ் கட்சி, அதற்கேற்ற வகையில் கூட்டணி முயற்சிகளை மேற்கொள்ளவில்லை. இது அக்கட்சியின் அதீதத் தன்னம்பிக்கையா,  பிற எதிர்க்கட்சிகளின் அலட்சியமா என்பது தெரியவில்லை.

தே.ஜ.கூட்டணியிலிருந்து விலகிவந்த 9 கட்சிகளுடனும், ஜம்மு காஷ்மீரில் தேசிய மாநாடு கட்சி, அஸ்ஸôமில் ஏஐயூடிஎஃப், தமிழகத்தில் திமுக, இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, தெலங்கானாவில் தெலங்கானா ஜன சமிதி, கர்நாடகத்தில் மதச்சார்பற்ற ஜனதாதளம் ஆகிய கட்சிகளுடனும் கூட்டணி அமைத்துள்ளது காங்கிரஸ். ஐக்கிய முற்போக்குக் கூட்டணியிலுள்ள கட்சிகளின் எண்ணிக்கை தற்போது 32 ஆக உள்ளது. இவற்றில் பல சிறிய கட்சிகள்.

எனினும், பாஜகவுக்கு எதிரான கொள்கை கொண்ட சமாஜ்வாதி கட்சி, பகுஜன் சமாஜ் கட்சி, தெலுங்குதேசம்,  திரிணமூல் காங்கிரஸ்,  ராஷ்ட்ரீய லோக்தளம் கட்சிகளை தனது அணிக்குள் கொண்டுவர காங்கிரஸ் கட்சியால் இயலவில்லை.  இதற்கு தேசிய அளவில் காங்கிரஸ் கட்சியின் செல்வாக்கு சரிந்து வருவதே காரணம்.

நாடு முழுவதும் பரவலான அரசியல் அமைப்பும் ஆதரவும் உள்ள கட்சியாக இன்றும் இருப்பது காங்கிரஸ் கட்சி மட்டுமே. அந்த நிலையை பாஜக அடைந்ததால்தான் ஆட்சியைப் பிடிக்க இயன்றது. இந்த நிலையை பாஜக அடையக் காரணமானது அதன் கூட்டணி அரசியல் ராஜதந்திரம்தான் என்று சொன்னால் மிகையில்லை.

வாஜ்பாய்} அத்வானி காலம் துவங்கி, மோடி} அமித்ஷா காலம் வரை பல்வேறு மாநிலங்களில் வெற்றிகரமான கூட்டணிகளை உருவாக்கி அதையே தங்கள் கட்சியின் பலமாக வளர்த்தெடுப்பது தேர்தல் வியூகமாக இருந்து வருகிறது. இந்த விஷயத்தில் இன்னமும் காங்கிரஸ் பின்தங்கியுள்ளது. வடகிழக்கு மாநிலங்களில் பாஜக செயல்படும் வேகத்தைக் கண்டு காங்கிரஸ் பாடம் படிக்க வேண்டும்.

2014 மக்களவைத் தேர்தலின்போது, பாஜக தலைமையிலான தேசிய ஜனநாயகக் கூட்டணி 29 கட்சிகள் கொண்டதாக இருந்தது. காங்கிரஸ் கட்சிக்கு எதிரான வாக்குகளை ஒருங்கிணைப்பதை நோக்கமாகக் கொண்டு பாஜக அதை சாதித்தது. 1998 முதல் 2004 வரை வாஜ்பாய் தலைமையிலான அரசு இருந்தபோது பாஜக பெற்ற கூட்டணி அரசியல் அனுபவங்கள் அதற்கு வெகுவாக உதவின.

மாறாக, 2004 முதல் 2014 வரையிலான காலகட்டத்தில் ஆளும் கட்சியாக இருந்த காங்கிரஸ் தனது எதேச்சதிகாரத் தன்மையால் தோழமைக் கட்சிகளை பெருமளவில் இழந்தது. 2014  தேர்தலின்போது ஐக்கிய முற்போக்குக் கூட்டணியில் 10 கட்சிகள் மட்டுமே இடம் பெற்றிருந்தன. அவற்றிலும் தேசியவாத காங்கிரஸ்,  ராஷ்ட்ரீய ஜனதாதளம், இந்திய யூனியன் முஸ்லிம் லீக் ஆகியவை மட்டுமே குறிப்பிடத் தக்கவை.

காங்கிரஸ் அரசு மீதான ஊழல் புகார்களும், அதற்கு வலுவான கூட்டணி அமையாததும் பாஜகவுக்கு சாதகமாகின. மோடியின் சூறாவளிப் பிரசாரமும், பாஜகவின் பலம் வாய்ந்த கட்டமைப்பும், தேசிய ஜனநாயகக் கூட்டணியின் வலிமையும் அக்கூட்டணிக்கு 336 இடங்களில் வெற்றியைத் தந்தன.

அந்தத் தேர்தலில் காங்கிரஸ் அடைந்த படுதோல்வி,  யாரும் எதிர்பாராதது. மோடி அலையில் வீழ்ந்த காங்கிரஸ் 44 தொகுதிகளில் மட்டுமே வென்று,  பிரதான எதிர்க்கட்சிக்கான அந்தஸ்தையும் இழந்தது. அதன் கூட்டணிக் கட்சிகள் 16 இடங்களில் வென்றன. அதன்மூலமாக, ஐக்கிய முற்போக்குக் கூட்டணியின் பலம் 80 ஆக இருந்தது.

கடந்த ஐந்தாண்டுகளில் மோடி அரசு மேற்கொண்ட பண மதிப்பிழப்பு, ஜிஎஸ்டி உள்ளிட்டவற்றால் ஏற்பட்ட பாதிப்பை முன்னிறுத்தியும், மோடி நிறைவேற்றாத தேர்தல் வாக்குறுதிகளை சுட்டிக்காட்டியும் பிரசாரம் செய்துவரும் காங்கிரஸ் கட்சி, இம்முறை பாஜகவை வீழ்த்தி ஆட்சியை மீட்கும் முனைப்பில் இருக்கிறது.

இன்றைய நிலையில் பாஜகவுக்கு சமமாக மோதும் நிலையில் காங்கிரஸ் கட்சி இல்லை என்பது அனைவரும் அறிந்த உண்மை. ஆனால் அதை ஏற்கும் மனப் பக்குவம் காங்கிரஸ் தலைவர்களிடம் காணப்படவில்லை என்பதே எதிர்க்கட்சிகளின் வருத்தம்.

உதாரணமாக, தில்லி, ஹரியாணா, பஞ்சாப் மாநிலங்களில் காங்கிரஸ் கட்சியுடன் கூட்டணி அமைக்க ஆம் ஆத்மி கட்சி தயாராக இருந்தது. ஆனால், பஞ்சாப் முதல்வர் அமரீந்தர் சிங்கும், தில்லி முன்னாள் முதல்வர் ஷீலா தீட்சித்தும் கடும் எதிர்ப்பு தெரிவித்ததால், அந்தக் கூட்டணி சாத்தியமாகவில்லை.  இதந் காரணமாக இம்மாநிலங்களில் ஏற்படப்போகும் மும்முனைப்போட்டி பாஜகவுக்கே சாதகமாகும்  நிலை காணப்படுகிறது.

மேற்கு வங்க மாநிலம் திரிணமூல் காங்கிரஸ் கட்சியின் கோட்டையாக இருந்து வருகிறது. இங்கு முதல்வராக உள்ள மம்தா பானர்ஜி முன்னாள் காங்கிரஸ்காரர்தான். ஆனால்,  சென்ற சட்டசபைத் தேர்தலில் செய்த  காங்கிரஸ் கட்சி செய்த தவறை மம்தா மன்னிக்கத் தயாராக இல்லை. அங்கு நடந்த பேரவைத் தேர்தலில் தனது பிரதான எதிரியான மார்க்சிஸ்ட் கட்சியுடன் கூட்டணி அமைத்துப் போட்டியிட்ட காங்கிரஸ் கட்சியை மம்தா பானர்ஜி நம்ப மறுக்கிறார். தவிர, பிரதமர் நாற்காலி மீது அவருக்கும் ஒரு கண் இருக்கிறது.  எனவே அங்கு மொத்தமுள்ள 42 தொகுதிகளுக்கும் மம்தா வேட்பாளர்களை அறிவித்துவிட்டார்.

காங்கிரஸ் கட்சியுடன் கூட்டணி அமைப்பது குறித்து ஆலோசித்துவந்த மார்க்சிஸ்ட் கம்யூனிஸ்ட் கட்சியும், காங்கிரஸ் தலைவர்களின் பேராசை காரணமாக பின்னடைந்து விட்டது. தற்போது அக்கட்சியும் தனது வேட்பாளர் பட்டியலை அறிவித்துவிட்டது. இதன்மூலமாக, மேற்கு வங்க மாநிலத்தில் புறக்கணிக்கப்பட்ட கட்சியாகிவிட்டது காங்கிரஸ். இத்தனைக்கும் இங்கு காங்கிரஸ் கட்சிக்கு 9.5 சதவீத வாக்குகள் உண்டு.

திரிணமூல் காங்கிரஸ், பாஜக,  இடதுசாரிக் கூட்டணி, காங்கிரஸ் என நான்கு முனைப் போட்டி ஏற்பட்டால் அது சிறுபான்மையினரின் வாக்குகளைச் சிதறச் செய்துவிடும். அது பாஜகவுக்கே ஆதாயம் என்று புலம்பி இருக்கிறார் மேற்கு வங்க மாநில காங்கிரஸ் தலைவர் சோமன் மித்ரா. அதற்கேற்றாற்போல, பாஜகவின் செல்வாக்கு அம்மாநிலத்தில் பல மடங்கு அதிகரித்திருக்கிறது. இம்முறை மேற்கு வங்கத்தில் உண்மையான போட்டி மம்தாவுக்கும் மோடிக்கும் தான்.

பிகாரில் மகா கூட்டணி என்று வெகுவாகப் பேசப்பட்ட காங்கிரஸ்- ஆர்ஜேடி- ஐக்கிய ஜனதாதளம் கூட்டணி  2015இல் நடந்த சட்டப்பேரவைத் தேர்தலில் பிரமாண்ட வெற்றி பெற்று பாஜகவுக்கு அதிர்ச்சி வைத்தியம் அளித்தது. ஆனால் லாலு பிரசாத் யாதவ் குடும்பத்தின் குடைச்சல்களால் மனம் நொந்த முதல்வர் நிதிஷ்குமார் சில மாதங்களில் கூண்டோடு தே.ஜ.கூட்டணிக்கு மாறி பாஜக ஆதரவாளராகிவிட்டார். இங்கு பாஜக- ஐக்கிய ஜனதாதளம் கூட்டணி வலிமையாக உள்ளது.

குஜராத்திலும், பெரிதும் எதிர்பார்க்கப்பட்ட மகா கூட்டணியை காங்கிரஸ் கட்சியால் அமைக்க முடியவில்லை. காங்கிரஸ் கட்சியிலிருந்து தேசியவாத காங்கிரஸ் கட்சிக்கு மாறிய சங்கர் சிங் வகேலா உபயத்தால் தேசியவாத காங்கிரஸ் கட்சி தனித்துப் போட்டியிடுவதாக அறிவித்துவிட்டது. அதன் பேரவைத் தேர்தல் தோழரான பாரதீய பழங்குடியினக் கட்சியும் காங்கிரஸ் கூட்டணியில் சேர மறுத்துவிட்டது. இறுதியில், மோடியின் மண்ணில்  காங்கிரஸ் தனிப்பயணியாகத் தத்தளிக்கிறது.

ம.பி, ராஜஸ்தான், சத்தீஸ்கர், ஜார்க்கண்ட் மாநிலங்களில் காங்கிரஸ் கட்சி வலுவுடன் உள்ளது. ராஜஸ்தானில் ஜாட் தலைவரின் கட்சியான ராஷ்ட்ரீய லோக்தந்திரிக் கட்சியுடனும், பாஜக அதிருப்தியாளர் கண்ஷியாம்  திவாரியின் கட்சியுடனும் முதல்வர் அசோக் கெலாட் முயற்சியால் கூட்டணி அமைந்திருக்கிறது. தமிழகத்தில் திமுக தலைமையிலான கூட்டணியில் இடம்பெற்றதும், கர்நாடகத்தில் மதச்சார்பற்ற ஜனதாதளத்துடன் அணி சேர்ந்ததும், ஜம்மு காஷ்மீரில் தேசிய மாநாட்டுக் கட்சியுடன் உடன்பாடு கண்டதும் குறிப்பிடத்தக்க முன்னேற்றம் எனலாம்.

இருப்பினும், அதிக எம்.பி.க்களைக் கொண்ட உத்தரப் பிரதேசத்தில் காங்கிரஸ் கட்சியின் வறட்டுப் பிடிவாதத்தால், பாஜகவுக்கு எதிரான மகா கூட்டணி அமையும் வாய்ப்பு நழுவியது.  ராகுலை பிரதமர் வேட்பாளராக ஏற்க மனமில்லாத சமாஜவாதி கட்சியும், பகுஜன் சமாஜ் கட்சியும் புதிய கூட்டணியை உருவாக்கிவிட்டன. இதில் ராஷ்ட்ரீய ஜனதாதளமும் இடம்பெற்றுள்ளது. இங்கு மொத்தமுள்ள 80 தொகுதிகளில் சமாஜவாதி- 37, பகுஜன் சமாஜ்-38, ஆர்ஜேடி-3 தொகுதிகளில் போட்டியிடுகின்றன. காங்கிரஸ் கட்சியின் நட்சத்திரத் தொகுதிகளான ரேபரேலி, அமேதி ஆகியவற்றில் மட்டும் காங்கிரûஸ ஆதரிப்பதாக மாயாவதி அறிவித்தார்.

இதற்குப் போட்டியாக,  மகான் தளம், அப்னா தளம் (கோண்டா) போன்ற சிறு கட்சிகளுடன் கூட்டணி அமைத்தது காங்கிரஸ். தவிர, முலாயம் சிங் குடும்பத்தினரும் மாயாவதியும் போட்டியிடும் 7 தொகுதிகள் தவிர்த்து 73  தொகுதிகளில் போட்டியிடுவதாக மாநில காங்கிரஸ் தலைவர் ராஜ் பாப்பர் அறிவித்தார். இதனால் கோபமடைந்த மாயாவதி, காங்கிரஸ் கட்சியின் தயவு தங்களுக்குத் தேவையில்லை என்றார்; உ.பி.யில் காங்கிரஸ் கட்சி குழப்பத்தை ஏற்படுத்த வேண்டாம் என்று அவர் எச்சரித்தார்.

இவ்வாறாக,  கூட்டணி அமைக்கும் விஷயத்தில் பாஜக ராஜதந்திரத்துடன் செயல்பட்டு வரும் சூழலில், காங்கிரஸ் கட்சி கிடைத்த நல்ல வாய்ப்புகளையும் வீணடித்து வந்துள்ளது. மத்தியில் ஆட்சிப் பொறுப்பில் இருப்பது பாஜகவின் கூட்டணி முயற்சிகளுக்கு சாதகமாக உள்ளது. அந்த வாய்ப்பு காங்கிரஸ் கட்சிக்கு இல்லை.

இந்த இரு அணிகளிலும் இடம்பெறாத தெலங்கானா ராஷ்டிர சமிதி, ஒய்எஸ்ஆர் காங்கிரஸ், பிஜு ஜனதாதளம் ஆகிய கட்சிகள் தேர்தலுக்குப் பிறகு ஆளும் கட்சியாக வருபவரையே ஆதரிக்கும் என நம்பலாம்.

பொதுவாக, நம்பகத் தன்மை,  அரசியல் லாபம்,  எதிர்கால நன்மை, தலைமைப் பண்பு  ஆகியவற்றைக் கருத்தில் கொண்டே தேர்தல் கூட்டணிகள் அமைகின்றன. அந்த வகையில்,  பாஜக பலம் குறைந்த மாநிலங்களில் தேசிய ஜனநாயகக் கூட்டணி வலுப்படுத்தப்பட்டிருக்கிறது. காங்கிரஸ் கட்சியிடமோ, ஐக்கிய முற்போக்கு கூட்டணியிலோ இத்தகைய தெளிவைக் காண முடியவில்லை.

கொள்கை அடிப்படையில் அல்லாது வெற்றியை இலக்காகக் கொண்டே தேர்தல் கூட்டணிகள் அமைகின்றன. தேர்தலுக்குப் பின் கூட்டணி உடைவதும், அணி மாற்றமும் நாம் கண்டதே. வரும் மக்களவைத் தேர்தலும் அதற்கு விதிவிலக்காக இருக்கப் போவதில்லை.

***

பெட்டிச் செய்தி-1

Continue reading

வடகிழக்கில் வெற்றி யாருக்கு?

28 Mar

மனையடி சாஸ்திரத்தில் வடகிழக்கு திசை ஈசானியம் என்று அழைக்கப்படுகிறது. இந்தியாவின் ஈசானியமாக 8 வடகிழக்கு மாநிலங்கள் அமைந்துள்ளன. அருணாச்சல பிரதேசம், அஸ்ஸாம், மணிப்பூர், மேகாலயம், மிஸோரம், நாகாலாந்து, திரிபுரா ஆகிய 7 மாநிலங்கள் ‘வடகிழக்கு சகோதரிகள்’ என்று அழைக்கப்படுகின்றன. இத்துடன், 1975இல் இந்தியாவுடன் இணைந்த சிறு நாடான சிக்கிம் எட்டாவது மாநிலமாக உள்ளது.

இப்பகுதியில் நிலவும் விசேஷமான மக்கள் பரவலும், இனக்குழுக்களிடையிலான வேற்றுமையும், பாரதத்தின் பிற பகுதி மக்களால் கவனிக்கப்படுவதில்லை. இப்பகுதியின் மொத்த மக்கள் தொகை 4.6 கோடி (2011 நிலவரம்). இதில் அருணாச்சல பிரதேசமும், அஸ்ஸாமும் மட்டுமே பெரிய மாநிலங்கள். பழங்குடி மக்களின் பிரதேசமாக வர்ணிக்கப்படும் வடகிழக்கு இந்தியாவில் 220 தனி இனக்குழுக்கள் உள்ளன. எனவே அவற்றிடையே அவ்வப்போது மோதல்கள் ஏற்படுவது தவிர்க்க இயலாததாக உள்ளது. எனவே, சிறு மாநிலங்கள் அங்கு உருவாக்கப்பட்டன.

இதிலும் அருணாச்சல பிரதேசம் நிலப்பரப்பில் பெரிய மாநிலமாக இருந்தாலும் மக்கள் அடர்த்தி குறைவு. இங்கிருந்து 2 எம்.பி.க்கள் மட்டுமே தெந்தெடுக்கப்படுகின்றனர். அஸ்ஸாம்- 14 எம்.பி.க்களைத் தேர்வு செய்கிறது. மணிப்பூர்-2, மேகாலயம்- 2, மிஸோரம்- 1, நாகாலாந்து-1, திரிபுரா-2, சிக்கிம்- 1 மாநிலங்களின் பிரதிநிதிகள் உள்பட வடகிழக்கு இந்தியா 25 எம்.பி.க்களைத் தேர்வு செய்கிறது. Continue reading

தனிக்காட்டு ராஜாங்கம் நீடிக்குமா?

24 Mar

(குஜராத்தில் பாஜகவின் நிலை குறித்த அலசல்)

இந்திய அரசியலில் குஜராத் மாநிலம் ஆரம்ப காலத்திலிருந்தே பிரதான இடம் வகித்து வந்துள்ளது. விடுதலைப் போராட்டக் காலத்தில் சியாம்ஜி கிருஷ்ண வர்மா, மகாத்மா காந்தி, வல்லபபாய் படேல் ஆகியோரின் தலைமையை நாடறியும். சுதந்திரத்துக்குப் பிந்தைய காலத்திலும், காங்கிரஸ் அல்லாத கட்சிகளுக்கு முன்னுதாரணமாக அமைந்தவர் மொரார்ஜி தேசாய்.

இன்றும் குஜராத் மாநிலம்தான் இந்திய அரசியலின் மையப் புள்ளி. அங்கு 4 முறை முதல்வராக இருந்த நரேந்திர மோடி இன்று நாட்டின் பிரதமர் ஆனதுடன், இந்திய அரசியலையே தன்னைச் சுற்றிச் சுழலக் கூடியதாக மாற்றி இருக்கிறார். மோடியின் எழுச்சிக்கு குஜராத் மாநிலம் அடித்தளம் அமைத்தது எனில் மிகையில்லை. Continue reading

இந்தப் பூச்சாண்டி இன்னும் எத்தனை நாளுக்கு?

24 Jul

அண்மையில் குடியரசுத் தலைவர் தேர்தலுக்கான காங்கிரஸ் வேட்பாளரைத் தீர்மானிப்பதற்கு முன் நடந்த அரசியல் கூத்துக்கள் அனைவருக்கும் தெரியும். பிரணாப் முகர்ஜியை காங்கிரஸ் அறிவிப்பதற்கு முன்னதாக, சமாஜ்வாதி கட்சித் தலைவர் முலாயம் சிங்கும் திரிணமூல் காங்கிரஸ் தலைவி மம்தா பானர்ஜியும் ஓர் அரசியல் அதிரடியை நிகழ்த்தினர்.

காங்கிரஸ் கட்சி முன்வைத்த உத்தேச வேட்பாளர்களின் பெயர்களை நிராகரித்த இவ்விருவரும் முன்னாள் குடியரசுத் தலைவர் கலாம், முன்னாள் சபாநாயகர் சோம்நாத் சட்டர்ஜி ஆகியோரில் ஒருவரைத் தேர்வு செய்யுமாறு வலியுறுத்தினர். இது குடியரசுத் தலைவர் தேர்தலில் ஒரு பரபரப்பு திருப்பத்தை ஏற்படுத்தியது. இதன் விளைவாகவே, பிரணாப் முகர்ஜியின் பெயரை காங்கிரஸ் அவசரமாக அறிவித்தது.

அதன் பிறகு நடந்ததை நாடு அறியும். மம்தாவுடன் இணைந்து காங்கிரஸ் கட்சிக்கு அதிர்ச்சி வைத்தியம் அளித்த முலாயம் சிங், ஒரேநாள் இரவில் அந்தர்பல்டி அடித்து மம்தாவுக்கு அதிர்ச்சி வைத்தியம் அளித்தார். அதற்கு அவர் கூறிய காரணம் தான் நகைச்சுவை.

பிரணாப் முகர்ஜியின் திறமைக்காகவும், பாஜக வென்றுவிடக் கூடாது என்பதற்காகவும் தான் அவரை ஆதரிப்பதாக முலாயம் சிங் கூறினார். அதாவது, குடியரசுத் தலைவர் தேர்தலில் காங்கிரஸ் தோற்றுவிடக் கூடாது என்பதே அவரது தொலைநோக்குப் பார்வை.

இந்த ஞானோதயம், மம்தாவுடன் இணைந்து மிரட்டல் விடுத்தபோது எங்கே போயிருந்தது? இடையில் என்ன நடந்தது? பேரங்கள் ஆட்சி செய்யும் அரசியல் களத்தில் என்ன வேண்டுமானாலும் நடந்திருக்கலாம். இப்போது, முலாயமை நம்பி காங்கிரசை எதிர்த்த மம்தா தனிமைப்பட்டு நிற்கிறார்.

நமது ஊடகங்கள் முலாயமின் புத்திசாலித்தனத்தையும் மம்தாவின் முட்டாள்தனத்தையும் விவரித்து செய்திகளை அள்ளி வழங்குகின்றன. அதாவது நம்பகத் தன்மையற்றவராக இருப்பதே புத்திசாலித்தனம் ஆகிவிட்டது.

முலாயம் சிங்கின் புத்திசாலித்தனம் இப்போது தான் வெளிப்பட்டுள்ளதாகக் கூற முடியாது. அவரது கட்சியின் குட்டிக்கரணங்கள் பிரசித்தமானவை. 2004ல் அயோத்தி நாயகன் கல்யாண் சிங்குடன் குலாவியபோதுதான் அவரது சுயரூபம் வெளிப்பட்டது. பிறகு அவரையும் நட்டாற்றில் விட்டார் முலாயம்.

1999ல் வாஜ்பாய் அரசு கவிழ்ந்தபோது சோனியா காந்தி பிரதமராகும் வாய்ப்பு வந்தது. ஆரம்பத்தில் அதற்கு சம்மதித்த முலாயம், திடீரென போர்க்கொடி உயர்த்தி, சோனியாவின் ஆசையில் மண்ணைப் போட்டார். அதன் விளைவாகவே பாஜக தலைமையிலான தேசிய ஜனநாயகக் கூட்டணி மீண்டும் ஆட்சிக்கு வர முடிந்தது.

உத்தரப் பிரதேச மாநிலத்தில் ஆளும் சமாஜ்வாதி கட்சிக்கு எதிராக காங்கிரஸ் செயல்படுகிறது. இங்கு பிரதான எதிர்க்கட்சி பகுஜன் சமாஜ். அக்கட்சிக்கும் காங்கிரஸ் அரசியல் எதிரி தான். ஆனால், நாடாளுமன்றத்தில் இவ்விரு கட்சிகளும் போட்டியிட்டுக் கொண்டு காங்கிரஸ் ஆட்சியை சிக்கலான தருணங்களில் காத்து வருகின்றன.

மக்களவையில் பல்வேறு மசோதாக்களை நிறைவேற்றவும், நம்பிக்கைத் தீர்மானங்களில் வெல்லவும் காங்கிரஸ் கட்சியை இக்கட்சிகள் என்ன காரணத்துக்காக ஆதரித்தன என்பது சாமானியர்கள் அறியாத புதிர். இவ்விரு கட்சிகளும் கடைசியில் சொல்லும் காரணமோ வேடிக்கையானது. மதவாத பாஜக ஆட்சிக்கு வந்துவிடக் கூடாதாம். இதைக் கூறியே இக்கட்சிகள் அரசியல் நடத்தி வருகின்றன.

இக்கட்சிகள் மட்டுமல்ல, லாலுவின் ராஷ்ட்ரீய ஜனதாதளம், பஸ்வானின் லோக் ஜனசக்தி, மு.கருணாநிதியின் திமுக, ராமதாஸின் பாமக போன்ற கட்சிகளும் அடிக்கடி கூறும் அரசியல் பூச்சாண்டி பாஜக ஆட்சிக்கு வந்துவிடக் கூடாது என்பதே.

நாட்டிலுள்ள பெரும்பாலான கட்சிகள் பாஜகவுடன் இணைந்து செயல்பட்டுள்ளன. முலாயமும், லாலுவும் கூட 1989 தேர்தலில் பாஜகவுடன் தொகுதி உடன்பாடு செய்து கொண்டவர்கள் தான். பஸ்வானும், கருணாநிதியும், ராம்தாசும், மம்தாவும், நவீன் பட்நாயக்கும், பரூக் அப்துல்லாவும் தேசிய ஜனநாயகக் கூட்டணியில் அங்கம் வகித்தவர்கள் தான். மாயாவதியோ பாஜகவுடன் இணைந்து உத்தரப் பிரதேசத்தில் கூட்டணி அரசையே நடத்தி இருக்கிறார்.

அவர்களே இன்று பாஜகவின் மதவாதத்தை எதிர்ப்பதாகக் கூறி முழக்கமிடுவது முரண். நாட்டிலுள்ள 20 சதவீதத்துக்கு மேற்பட்ட சிறுபான்மையினரின் வாக்குகளைக் கவரவே இக்கட்சிகள் நாடகமாடுகின்றன. உடனடி லாபத்துக்காக பாஜகவுடன் கைகோர்க்கத் தயங்காத நமது ‘மதச்சார்பற்ற’ கட்சிகள், தேர்தல் லாபத்துக்காக பாஜகவை விமர்சிப்பதை வாடிக்கையாகக் கொண்டுள்ளன.

‘பாஜக’ என்ற வார்த்தையைப் பூச்சாண்டியாகக் காட்டியே தேர்தல் களங்களில் வாக்குகளை பல கட்சிகள் அறுவடை செய்கின்றன. அரசியல் களத்தில் தாங்கள் நிகழ்த்தும் கூத்துக்களை நியாயப்படுத்தவும் இக்கட்சிகளுக்கு உதவுவது ‘பாஜக’ பூச்சாண்டி தான். ஊழலில் திளைக்கும் மத்திய அமைச்சர்கள் தப்பிப் பிழைத்திருப்பதற்கும் இதே பூச்சாண்டி தான் உதவி வருகிறது.

இன்றைய அரசியல் சூழலில் பிரதான எதிர்க்கட்சியின் பங்களிப்பு முக்கியமானது. ஆனால் பாஜகவை தனிமைப்படுத்த அரசியல் தீண்டாமையைக் கடைப்பிடிப்போர் அனைவரும் வேறு கையில் நாட்டிற்கு நஷ்டத்தை ஏற்படுத்துகின்றனர்.

இந்தப் பூச்சாண்டி இன்னும் எத்தனை நாளுக்கு? ஒன்று பாஜக தன் மீதான மதவாதக் கறையைப் போக்கிக்கொள்ள வேண்டும். அல்லது, இந்தப் பூச்சாண்டி அச்சத்தைவிட ஆபத்தான அரசியல் கோமாளித்தனங்களை மக்கள் புரிந்துகொள்ள வேண்டும்.

இல்லாவிடில் ஊழல் அரக்கன் சத்தமின்றி நாட்டை கபளீகரம் செய்துவிடுவான். பூச்சாண்டியா? அரக்கனா? எது ஆபத்தானது? காலத்தின் கரங்களில் பதில் காத்திருக்கிறது.

மீள்பதிவு: குழலும் யாழும்

.

%d bloggers like this: