Tag Archives: நிலம்

நிலம்

22 Feb
நஞ்சையோ புஞ்சையோ –
பத்து காணியோ நூறு காணியோ
எத்தனை வைத்திருந்தாலும்
ஆறடி நிலமும் அவனுக்கு கிடையாது.
அஸ்தமனத்துக்குப் பிறகு
ஒருபிடி பஸ்மம் தான்.
.
தன்னைத் தானே சுற்றிக்கொண்டு
தன்னையும் சிலர் சுற்றவைத்து
ஏதோ ஒன்றைச் சுற்றிச் சுற்றப்பட்டு
ஓயாமல் உருளும் பூமியைப்
போன்றதுதான்
ஒவ்வொரு மனிதனின் வாழ்க்கை.
.
இதைப் புரிந்தவன் பூமியாள்கிறான்
புரியாதவன் புலம்பிக்கொண்டிருப்பான்.
கனவுகளைக் கண்டே
களைத்துப்போயிருப்பவன்
நனவுகளைக் காணும்போது
நாணிப்போகிறான்-
இயற்கை தான்.
.
ஏர்முனை படும்போது சிலிர்த்து,
மழைத்துளி வீழின் கிரஹித்து,
தூவப்படும் விதைகளுடன் காதலித்து,
செடி முளைத்து… கதிர் விளைத்து…
ஓ! இத்தொடர் சங்கிலியில்
மீண்டும் விதைகள் தூவப்படும்!
.
விட்டுப்போன வித்துக்கள்
உயிர்களுக்கு உணவாகி,
உணவாக உறவாடி,
மஃகி – மடிந்துபோய்…
மண்ணுக்குள் மீண்டும் ஒரு
தொடர் சங்கிலி.
.
தொடர் சங்கிலியாய்
தோற்றம் தருவது நிலம் தான்.
இதற்கு ஆரம்பமும் இல்லை;
முடிவும் இல்லை.
நாமெல்லாம் ஏதாவது ஒரு கண்ணியிலே
ஏதாவது ஒரு பகுதி தான்.
.
இதை அறிபவன்
நிலத்தை ஆள்பவனுடன்
நிலைத்து விடுகிறான்.
அறியாதவன் நிலத்தால் ஆளப்படுகிறான்.
.
நுண்ணுயிர்ச்சேறு,
எரிமலைக் குழம்பு
அகண்டநீர்க் கொள்கலன்,
அருணனின் சிதறல்,
கடந்தும் உள்ளும் இருக்கும்
காலத்தின் தோற்றம்.
.
எரிமலைக் குழம்பில்
நுண்ணுயிர்ச் சேறா?
அருணனின் சிதறலா
அகண்டநீர்க் கொள்கலன்?
திகைப்பினால் –
வாயுவின் வட்டிலை எண்ணி
நாசி நிலை தடுமாறி
பெருமூச்சு விளைக்கிறது!
.
எத்துணையோ சிதறல்களில் ஒன்றான
எத்துணையோ துகள்களில்
ஒன்று தான் நான்.
அத்துகள்களிலும்
எத்துணையோ அணுக்கள்!
.
எல்லாமே காலத்தின் தோற்றம் விளைத்த
கடவுளின் தேற்றங்கள் தான்.
நிலமே மூலம்.
இல்லையேல் எல்லாம் நிர்மூலம்.
அதற்கு அடிபணி –
அது தான் தெய்வம்.
.
அள்ள அள்ளக் குறையாத வள்ளலாய்,
எடுக்க எடுக்க மாளாத சுரங்கமாய்,
அமுதசுரபியாய் நிலம்.
ஆழம் அதிகமாக ஆக
அதிசயங்கள் உரைக்கப்படும்.
ஆனால் –
எல்லாமே மண்ணுக்குள் போவது தான்
என்பதை மட்டும் மறந்து விடாதீர்கள்.
.
நாடுங்கள்; ஊடுங்கள்; தேடுங்கள்…
தட்டுப்படும்! தட்டுப்படும்! தட்டுப்படும்!
மண்ணுக்குள் வைரம்,
கடலுக்குள் பவளம்,
கல்லுக்குள் தேரை,
எல்லாமே கிடைக்கும்-
எடுத்துக் கொள்ளுங்கள்!
.
எட்டடுக்கு வீடெடுத்து
முற்றத்திலே நின்று,
தங்கத் தட்டெடுத்து-
சந்தனத்தை வடிகட்டி,
சரம் சரமாய்த் தெளியுங்கள்!
வெள்ளிப்பொடி அரைத்து
வீதியிலே தூவுங்கள்!
கூடவே –
நன்றியுடன் நினையுங்கள்!
நிலத்தையே வணங்குங்கள்…
நிலத்தையே பாடுங்கள்!
.
எல்லோரும் ஒருநாளில்
மண்ணாகப் போகின்றோம் –
என்பதை மறவாதீர்!
எல்லோரும் சொல்லுங்கள்:
.
”ஜகமே ஜனனம்;
ஜகமே மரணம்”
ஓம் சாந்தி!
.
Advertisements