Tag Archives: பாரதி

உடலினை உறுதி செய்!

2 Oct

balam quote

.

தமிழகத்தின் தவப்புதல்வரான மகாகவி பாரதி, இளைஞர்நலனில் மிகுந்த நாட்டம் கொண்டவர். இளைஞர்நலமே தேசநலம் என்ற எண்ணம் கொண்ட பாரதி,  ‘இளைய பாரதத்தினாய் வா வா வா’ என்று அழைத்து மகிழ்ந்தவர்.

இளைய தலைமுறையின் நல்வாழ்க்கைக்காக அவர் எழுதிய புதிய ஆத்திசூடி, இளைஞர்கள் செய்ய வேண்டியவற்றை தெளிவாக வரையறுக்கிறது. புதிய ஆத்திசூடியில் உள்ள 110 அறிவுரைகளில் அதிகமாகக் காணப்படுவது இளைஞர்களின் உடல்பலத்திற்கு அவர் அளிக்கும் முக்கியத்துவம் தான்.

‘இளைத்தல் இகழ்ச்சி’ என்று பலவீனத்திற்கு எதிரான கருத்தை முன்வைக்கும் பாரதி,  ‘நொந்தது சாகும்’ என்று மற்றொரு வரியில் எச்சரிக்கிறார். இதையே தான் சுவாமி விவேகானந்தரும்,  ‘பலமே வாழ்வு, பலவீனமே மரணம்’ என்று அறைகூவுகிறார்.

‘உடலை வளர்த்தேன் உயிர் வளர்த்தேனே’ என்று திருமூலரும் கூறுகிறார். பாரதியின் புதிய ஆத்திசூடி, இளமையை பேணிக் காத்து மிடுக்குடன் வாழுமாறு உபதேசிக்க எழுதப்பட்டதாகவே உள்ளது. ஒருவரியில்  ‘யௌவனம் காத்தல் செய்’ என்று பாரதி அறிவுறுத்துகிறார். எதற்காக? “வையத் தலைமை கொள்’வதற்காக!

‘மூப்பினுக்கு இடங்கொடேல்’,  ‘நோய்க்கு இடங்கொடேல்’ என்றெல்லாம் கூறிய பாரதி ‘உடலினை உறுதி செய்’ என்கிறார். இந்த உடலினை உறுதி செய்வது எப்படி?

நமது உடலை இளமைத்துடிப்புடன், நோய் அணுகாமல் காக்க சில உடற்பயிற்சிகள் அவசியம். அதிகாலையில் துயிலெழுவதும், சில மணிநேரங்கள் கடும் உடற்பயிற்சியில் ஈடுபடுவதும், உடலை சுறுசுறுப்பாக்கும் விளையாட்டு, யோகா ஆகியவற்றில் ஈடுபடுவதும் இளமையை நீடிக்கச் செய்ய வல்லவை.

தினசரி ஒருமணி நேரமேனும் உடலின் அனைத்துப் பாகங்களும் இயங்கும் வகையில் உடற்பயிற்சி செய்பவரின் உடல் அவர் சொன்னதைக் கேட்கும்.  ‘விசையுறு பந்தினைப் போல் மனம் வேண்டியபடி செல்லும் உடல் கேட்டேன்’ என்று பராசக்தியிடம் பாரதி வேண்டிய உடல்நலம் உடற்பயிற்சியால் தான் சாத்தியமாகும்.

உடற்பயிற்சியால், நமது உடலின் வெப்பநிலை அதிகரிக்கிறது. அப்போது நமது ரத்தத்தின் வேகமான சுழற்சியால் ரத்தத்தில் உள்ள வெள்ளை அணுக்கள் புதுப்பிக்கப்படுகின்றன என்கின்றனர் மருத்துவர்கள்.

உடற்பயிற்சியால் நரம்பு மண்டலம் புத்துணர்ச்சி பெறுகிறது; பசி பெருகி, உணவைச் செரிக்கும் ஆற்றல் அதிகரிப்பதால் ஜீரண மண்டலமும் நலம் பெறுகிறது. வேகமான உடற்பயிற்சி காரணமாக நுரையீரல்களின் ஆற்றல் அதிகரித்து சுவாச மண்டலமும் தெளிவடைகிறது.

ரத்த ஓட்டத்தின் வேகமான சுழற்சியால் சுத்திகரிக்கப்படும் ரத்தத்தில் உடலுக்குத் தீங்கு விளைவிக்குமó கொழுப்பு கரைகிறது. அதனால் உடலை இயக்கும் இதயம் வலிமை பெறுகிறது.

உடற்பயிற்சியின்போது எலும்பு மூட்டுகள் உரம்பெறுகின்றன. உடலின் வளையும் திறன் அதிகரிக்கிறது. தவிர வியர்வை ஆறாகப் பெருகுவதால் உடலின் தாதுக்கழிவுகள் இயல்பாக வெளியேற்றப்படுகின்றன. இவை அனைத்தாலும், நோய் அணுகமுடியாமல் ஆரோக்கியம் வலுப்பெறுகிறது.

உடற்பயிற்சியால் உடலின் வலிமை அதிகரிக்கிறது; எதையும் தாங்கும் திறன் அதிகரிக்கிறது; உடலின் வளையும் தன்மை கூடுகிறது. தவிர, ‘அரிவாளைக் கொண்டு பிளந்தாலும் கட்டு மாறாத உடலுறுதி’ கிடைக்கிறது.

தவறான உணவுப்பழக்கம், போதைப்பழக்கம், தகுதியற்ற சேர்க்கை போன்றவற்றைத் தவிர்க்கச்செய்து, இளைஞர்களைக் காக்கும் கவசமாகத் திகழ்வதும் உடற்பயிற்சியே.

வேகமான நடைப்பயிற்சி, ஓட்டம், மிதிவண்டி ஓட்டுதல், திறந்தவெளி விளையாட்டுகள், உடற்பயிற்சி சாதனங்களைப் பயன்படுத்துதல், சிலம்பம், நீச்சல், தற்காப்புப் பயிற்சிகள், யோகாசனம் போன்றவற்றை இளைஞர்களும் இளைஞிகளும் தொடர்ந்து மேற்கொள்வது அவர்களின் வாழ்க்கைக்கு ஊக்கம் தரும்.

தொடர் உடற்பயிற்சியால், தோற்றப்பொலிவும், முகத்தில் தெளிவும் மலர்கின்றன. தளர்ச்சி குறைந்து, உடலின் மிடுக்கு நடையில் வெளிப்படுகிறது.  ‘ஏறுபோல் நட’ என்ற பாரதியின் அறிவுரைப்படி அப்போது தான் இளைஞர்கள் நடைபயில முடியும்.

உறுதியான உடலில் மட்டுமே உறுதியான, தெளிவான மனம் அமையும். உடற்பயிற்சியால் சோம்பல் காணாமலாகிறது. சுறுசுறுப்பான உடலில் மனம் துடிப்புடன் செயலாற்றும்போது மட்டுமே வாழ்வில் உயர முடியும்.

இதுவே மகாகவி பாரதியின் விருப்பம். நமது இளைய பாரதம் உயர்வதற்கான வழியும் இதுவே.

தினமணி- இளைஞர்மணி (22.09.2015)
.

மகர சங்கராந்தியும் பொங்கல் விழாவும்…

13 Jan

பொங்குக பொங்கல்!

தமிழகத்தில் உற்சாகமாகக் கொண்டாடப்படும் பொங்கல் பண்டிகை, நாடு முழுவதும் ‘மகர சங்கராந்தி’ என்ற பெயரில் கொண்டாடப்படுகிறது. பாரதக் கலாசாரத்தின் தாக்கம் கொண்ட தெற்காசிய நாடுகளிலும் கூட இவ்விழா வேறு பெயர்களில் கொண்டாடப்படுகிறது.

பொங்கல் பண்டிகை அறுவடைத் திருநாள் மட்டுமல்ல, இந்த உலகை வாழவைக்கும் சூரியனுக்கு நன்றி கூறும் நாளாகவும் இருக்கிறது. கதிரவனின் இயக்கத்தை அடிப்படையாகக் கொண்டே இவ்விழா நமது முன்னோரால் உருவாக்கப்பட்டுள்ளது.

சூரிய வழிபாடு நமதுநாட்டில் தொன்றுதொட்டு நிலவி வருவதாகும். நாட்டின் பல இடங்களில் பழமையான சூரியன் கோவில்கள் இன்றும் உள்ளன. ஆதிசங்கரர் நிறுவிய ஷண்மத வழிபாட்டில் சூரிய வழிபாட்டை அடிப்படையாகக் கொண்ட ‘சௌரம்’ உள்ளது.

ஈராயிரம் ஆண்டுகளுக்கு முற்பட்ட தமிழ்க் காப்பியமான சிலப்பதிகாரம் ‘ஞாயிறு போற்றுதும்’ என்று துவங்குவதில் இருந்தே அக்காலத்தில் சூரிய வழிபாட்டின் தாக்கத்தை உணர முடியும். உண்மையில், சூரியனின் இயக்கத்தில் ஏற்படும் வருடாந்திர மாற்றத்தை வரவேற்று உருவானது தான் மகர சங்கராந்தியும் பொங்கல் பண்டிகையும்.

விஞ்ஞான விளக்கம்:

நாம் வாழும் பூமி 23 பாகைக் கோணத்தில் தன்னைத் தானே சுற்றிக்கொண்டு சூரியனையும் சுற்றிவருவதை நாம் அறிவோம். அதேபோல சூரியனும் ஏதோ ஒரு மையசக்தியைச் சுற்றுகிறது. இதுவே பிரபஞ்சம்.

பூமி சூரியனைச் சுற்றிவர 365.5 நாட்கள்- ஓராண்டு ஆகிறது. இந்த ஓராண்டில், சூரியனின் பார்வை பூமியின் வட பகுதியிலும் தென்பகுதியிலும் ஆறு மாதங்களுக்கு ஒருமுறை திசை மாறுகிறது. இதனை அயனம் என்பர்.

அதாவது, பூமியின் தென்பகுதியில் சூரியனின் பார்வை இருப்பது தட்சிணாயனம் எனப்படுகிறது. ஆடி முதல் மார்கழி வரையிலான ஆறு மாதங்களும் தட்சிணாயனம் எனப்படுகின்றன. இக்காலத்தில் சூரியனின் கதிர்வீச்சும் பகல் பொழுதும் குறையும்; குளிர்ச்சி அதிகரிக்கும். இந்நிலை தைமாதம் மாறுகிறது. தை முதல் ஆனி வரையிலான ஆறு மாதங்கள் பகல் பொழுதும் உஷ்ணமும் அதிகரிக்கும் உத்தராயணம் எனப்படுகின்றன.

சூரியக் கதிர்களின் ஆற்றல் அதிகரிப்பால் மந்தநிலை மாறி உலகம் உவகை கொள்கிறது.   ‘பொழுது புலர்ந்தது யாம் செய்த தவத்தால்; புன்மை இருட்கணம் போயின யாவும்’ என்று பாடுவார் மகாகவி பாரதி.

‘சங்கரணம்’ என்றால் சமஸ்கிருதத்தில் நகர்தல் என்று பொருள். உலக உயிர்களை இயக்கும் சூரியனின் திசைமாற்றத்தால் தைமாதம் ஏற்படும் பெரும் நிகழ்வே மகர சங்கராந்தி. வான மண்டலத்தை நமது முன்னோர் 12 ராசிகளாகப் பகுத்துள்ளனர். இதில் தனுர் ராசியிலிருந்து மகர ராசிக்கு சூரியன் இடம்பெயர்வதே ‘மகர சங்கராந்தி’ ஆகும்.

சூரியன் உதிக்கும் திசை கிழக்கு என்றாலும், தட்சிணாயன காலத்தில் தெற்கு திசை சார்ந்தும், உத்தராயண காலத்தில் வடக்கு திசை சார்ந்தும் உதிப்பதை, உன்னிப்பாகக் கவனித்தால் உணர முடியும். சூரியனின் இந்த திசைமாற்றமே நம்மால் பண்டிகையாகக் கொண்டாடப்படுகிறது.

சமய விளக்கம்:

இதில் தட்சிணாயன காலமான ஆறு மாதங்களும் தேவர்களுக்கு இரவுப் பொழுதாகும். உத்தராயண காலமான ஆறு மாதங்களும் தேவர்களுக்கு பகல் பொழுதாகும். அதாவது மனிதர்களின் ஓராண்டு காலம் தேவர்களுக்கு ஒரு நாளாகிறது. அதிலும், தேவர்கள் துயிலெழும் நேரமே தை மாதமாகும். எனவே தான் இம்மாதத்தின் துவக்க நாள் புனிதம் பெறுகிறது.

உத்தராயண காலமே புண்ணியகாலம் என்று புராண நூல்கள் போற்றுகின்றன. பாரதப் போரில் படுகாயமுற்ற பீஷ்மர், உத்தராயண காலம் வரும்வரை உயிர் துறக்காமல் காத்திருந்ததை மகாபாரதக் கதையில் அறிகிறோம்.

பன்னிரு ஆண்டுகளுக்கு ஒருமுறை நிகழும் கும்பமேளா, மகர சங்கராந்தியில் தான் துவங்குகிறது. ஆடிப்பட்டம் தேடி விதைத்து, நீர் பாய்ச்சி, களையெடுத்து சாகுபடி செய்த பயிரினங்களை அறுவடை செய்யும் காலம் தை மாதம். ஆகவே, விவசாயத்தின் ஆணிவேராக உள்ள சூரியனின் கதிர்களுக்கு நன்றி கூறும் நாளாக, அறுவடைத் திருநாளாக மகர சங்கராந்தி அனுசரிக்கப்படுகிறது.

தைமுதல் நாளே மகர சங்கராந்தி. அந்நாளில் தான் புதுப்பானையில் பொங்கலிட்டு, சூரியனுக்குப் படையலிட்டு வணங்குகிறோம். கூடவே, சூரியனின் ஆற்றல் மிகுந்த மஞ்சள், கரும்பு ஆகியவற்றையும் படையலிட்டு பூஜிக்கிறோம்.

வழிபடு முறைகளில் வேறுபாடு:

உத்தரப் பிரதேசம், மகாராஷ்டிரம், ஆந்திரப் பிரதேசம், கர்நாடகம், கேரளா ஆகிய மாநிலங்களில் இப்பண்டிகை மகர சங்கராந்தி என்ற பெயரிலேயே கொண்டாடப்படுகிறது.

குஜராத்தில் இப்பண்டிகையின் பெயர் ‘உத்ராயண்’. ராஜஸ்தானில் ‘மகர் சக்ராத்’, பஞ்சாபில் ‘லோஹ்ரி’, இமாச்சலில் ‘மகா சாஜா’, மேற்கு வங்கத்தில் ‘பௌஸ் சங்கராந்தி’, ஹரியானாவில் ‘மாகி’ என்ற பெயர்களில் இப்பண்டிகை கொண்டாடப்படுகிறது.

குஜராத்தில் உத்ராயண் பண்டிகையின் முக்கிய அம்சம், பட்டம் பறக்கவிடும் போட்டியாகும். அண்மைக்காலமாக இந்நிகழ்வு உலக அளவில் பிரபலமடைந்து சுற்றுலாப் பயணிகளை ஈர்க்கிறது.

அண்டை மாநிலமான கேரளம், சபரிமலை ஐயப்பன் கோவிலால் அனைவரையும் கவர்கிறது. அங்கு மகர சங்கராந்தியன்று நிகழும் மகரவிளக்கு திருவிழா பிரசித்தி பெற்றது.

பிகாரில் எள்ளுருண்டையைப் படையலிட்டுப் பூஜித்து, அனைவருக்கும் வழங்கி மகிழ்கின்றனர். இதன்காரணமாக இப்பண்டிகை அங்கு ‘தில் சங்கராந்தி’ என்று பெயர் பெற்றுள்ளது (தில் என்றால் இந்தியில் எள் என்று பொருள்).

மத்தியப் பிரதேசத்தில் இனிப்புப் பதார்த்தங்களை ஒருவருக்கொருவர் வழங்கி மகிழ்வர். இங்கு ‘சகராத்’ என்று இப்பண்டிகை பெயர் பெறுகிறது. அசாமில் இப்பண்டிகையை ‘போகாலி பிகு’ என்ற பெயரில் அனுஷ்டிக்கிறார்கள்.

நான்கு நாள் வழிபாடு:

தமிழகத்தில் பொங்கல் பண்டிகை 4 நாள் வழிபாடாகும். மார்கழி கடைசிநாளில் போகிப் பண்டிகையுடன் பொங்கல் விழா துவங்குகிறது. அன்று பழையன கழித்து புதியன விரும்பும் குறியீடாக, இல்லங்கள் சுத்தப்படுத்தப்பட்டு, உபயோகமற்ற பொருட்கள் எரிக்கப்படுகின்றன; மங்கலச் சின்னமான பூளைப்பூ, ஆவாரம்பூ, மாவிலை, வேப்பிலைக் கொத்துகளால் வீடுகள் அலங்கரிக்கப்படுகின்றன.

தை முதல் நாள், கதிரவனுக்கு நன்றி கூறி வணங்கும் பொங்கல் திருநாள். தை இரண்டாம் நாள், விவசாயத்தின் உயிர்நாடியான பசுக்கள் மற்றும் கால்நடைகளுக்கு நன்றி தெரிவிக்கும் விதமாக மாட்டுப் பொங்கல் கொண்டாடப்படுகிறது. தை 3-ஆம் நாள் கன்னிப் பெண்கள் நல்ல மணாளனுக்காகப் பிராத்திக்கும் காணும் பொங்கல். சகோதரர்களின் நலனுக்காகவும் பெண்கள் அன்று விரதம் இருந்து வழிபடுவர்.

இதே வரிசைமுறையை பல்வேறு மாநிலங்களிலும் காண முடிகிறது. போகி, சங்கராந்தி, காணுமு, முக்காணுமு என்ற பெயர்களில் ஆந்திரத்தில் 4 நாள் திருவிழாவாக இப்பண்டிகை அமைந்துள்ளது.

தாய்லாந்து நாட்டில் ‘சொங்க்ரான்’ என்ற பெயரிலும், லாவோஸில் ‘பிம லாவோ’ என்ற பெயரிலும், மியான்மரில் ‘திங்க்யான்’ என்ற பெயரிலும், நேபாளத்தில் ‘மாகே சங்கராந்தி’ என்ற பெயரிலும், இலங்கையில் புத்தாண்டாகவும் இப்பண்டிகையைக் கொண்டாடி அந்தந்த நாடுகளின் மக்கள் மகிழ்கிறார்கள்.

இவ்வாறாக, தேச எல்லை கடந்தும் கொண்டாடப்படும் மகர சங்கராந்தி திருவிழா, நமது நாட்டின் இயல்பான ஆன்மிக ஒருமைப்பாட்டின் சின்னமாகத் திகழ்கிறது. சர்க்கரையை எந்தப் பெயரிட்டு அழைத்தாலும் இனிப்பே அதன் குணம் என்பதுபோல, பொங்கலை எப்பெயரிட்டு அழைத்தாலும் அதன் சுவை குறையாது அல்லவா?

(பொங்கல் திருநாள்- 2014 சிறப்பிதழ்- கோவை)
.

பாரதி குறித்து ம.பொ.சி…

21 Nov


விடுதலைப் போராட்ட வீரரும், தமிழறிஞருமான ம.பொ.சிவஞானம், மகாகவி பாரதியாருக்கு புகழஞ்சலி செலுத்தும் வகையில் எழுதிய கட்டுரைகளின் தொகுப்பே இந்நூல். அவர் நடத்திய ‘செங்கோல்’ வார இதழில் வெளிவந்த கட்டுரைகள் இவை.

பல்வேறு கோணங்களில் பாரதியின் பாடல்களை ஆராய்ந்து தான் கண்ட முடிவுகளை இத்தொகுப்பில் வெளியிட்டிருப்பதாக, முன்னுரையில் ம.பொ.சி. குறிப்பிடுகிறார். பாரதியின் கவிதைகள் மட்டுமல்லாது, அவரது கதை, கட்டுரைகளிலிருந்தும் பல மேற்கோள்களை தனது ஆய்வுக் கட்டுரைகளில் சுட்டிக் காட்டுகிறார். இக்கட்டுரைகள் அனைத்தும், பாரதி இலக்கியச் சுவையைப் பருகிய களிப்பில் மிளிர்கின்றன.

குறிப்பாக, நூலின் முதல் கட்டுரையான ‘தெய்வ வள்ளுவரும் தேசியகவி பாரதியும்’ கட்டுரை அற்புதம். வள்ளுவரிலும் பாரதியிலும் தோய்ந்த ஒருவரால் தான் இவ்வளவு ஒப்புமைகளை வெளிப்படுத்த முடியும்.  ‘பாரதியார் கண்ட மகாகவிகள்’ கட்டுரையிலும் அறிஞரின் ஆய்வுத்திறன் ஒளிர்கிறது. கம்பனையும் இளங்கோவையும் பாரதி ஆழக் கற்றறிந்தவர் என்பதற்கு இக்கட்டுரையே ஆதாரம்.

‘பாரதியாரும் பாரதிதாசரும்’ கட்டுரையில், பாரதியின் அரசியல் விடுதலைக் கொள்கைக்கு வாரிசாகச் செய்துகொள்ள பாரதிதாசன் தவறிவிட்டார் என்று மதிப்பிட்டிருப்பது ம.பொ.சி.யின் நேர்மைத் துணிவுக்கு உதாரணம்.

இந்நூலில் உள்ள  ‘காலத்தை வென்ற கவி, பாரதி படைத்த பாரதீயம், பாரதியாரிடமும் முரண்பாடா? பாரதியாரும் சிதம்பரனாரும்’ போன்ற கட்டுரைகள் தமிழ் ஆர்வலர்களுக்கு என்றும் திகட்டாதவை. எனினும், நூலில் அதிகமாகக் காணப்படும் எழுத்துப் பிழைகள் நெருடலை ஏற்படுத்துகின்றன. தமிழுக்காகவே வாழ்ந்த பெரியோர் குறித்த நூலில் இத்தகைய பிழைகளைத் தவிர்ப்பது நமது கடமையல்லவா?

***

பாரதியாரின் பாதையிலே!

சிலம்புச் செல்வர் ம.பொ.சிவஞானம்,

136 பக்கங்கள், விலை: ரூ. 75.

வெளியீடு: ம.பொ.சி. பதிப்பகம்,
4/ 344ஏ, சீ ஷெல் அவென்யூ, அண்ணாசாலை,
பாலவாக்கம்,  சென்னை- 600 041.
தொலைபேசி: 94441 92051.

.

மீண்டும் வேண்டும்…

18 Aug

This slideshow requires JavaScript.

மீண்டும் வேண்டும் காந்திஜி –
மதவாதிகளிடமிருந்து
மக்களைக் காக்க…
அராஜகவாதிகளிடமிருந்து
அரசியலை மீட்க…

மீண்டும் வேண்டும் நேதாஜி –
வெளிநாட்டு மோகத்தை
வேருடன் கிள்ளி எறிய…
வெற்றிபெறும் உத்வேகத்தை
நாட்டுக்கு அளிக்க…

மீண்டும் வேண்டும் திலகர் –
தேசபக்தி நறுமணம்
எங்கும் பரவ…
வேஷமிடும் சதியாளர்கள்
நடுங்கியோட…

மீண்டும் வேண்டும் அம்பேத்கர் –
ஏற்றத் தாழ்வற்ற சமுதாயம்
விரைவில் அமைய…
எல்லோரும் எல்லாமும்
எங்கேயும் பெற…

மீண்டும் வேண்டும் பாரதி –
சுதந்திரத்தின் சுகத்தை
அனைவரும் உணர…
அடிமைத்தனத்தின் எச்சங்கள்
அலறியோட…

மீண்டும் வேண்டும் சுதந்திரம் –
உயர்வைத் தடுக்கும்
ஊழல் அரக்கனிடமிருந்து…
சுயநலமே பிரதானமான
அதிகாரிகளிடமிருந்து…
நாட்டை அழிக்கும்
நாசகாரர்களிடமிருந்து…

– தினமணி (விளம்பரச் சிறப்பிதழ்), கோவை (15.08.2012)

.

உள்ளத்தில் உண்மைஒளி உண்டாகட்டும்!

17 Apr

“பொதுஜன நன்மையே நோக்கமாகக் கொண்டு நடத்தப்பட்டுவரும் நமது பத்திரிகைக்கு அனுப்பப்படும் நிருபங்கள், இதரவிதமான பத்திரிகைகளுக்கு அனுப்புகிற மாதிரியாய் இருக்கக் கூடாது. நிருபம் எழுதுவோர் ஒவ்வொரு விஷயத்தையும் சிரமப்பட்டு ஆராய்ந்தறிந்து எழுத வேண்டும். அது பொது நன்மைக்கேற்றதாயும், சாதாரண ஜனங்களின் அறிவை விருத்தி செய்வதாகவும் இருக்க வேண்டும்…”.

‘இந்தியா’ (7.11.1908) நாளிதழில் ‘நிருபர்களுக்கு முக்கியமான அறிக்கை’ என்ற தலைப்பில் மகாகவி பாரதி எழுதியுள்ள விதிமுறைகள் இவை.
.
அடிமைப்பட்டிருந்த காலத்தில் நாட்டு விடுதலைக்காகவும், மக்களின் நன்மைக்காகவும் எழுதுகோல் உதவியுடன் போராடிய ஒரு பத்திரிகையாளராக பாரதி ஆற்றிய பணிகள் எண்ணற்றவை. நமது துரதிர்ஷ்டம், அவரது கவிதைகள் பெற்ற கவனத்தை அவரது பத்திரிகையுலகப் பணிகள் பெறாமலே உள்ளன. அவற்றை நாட்டிற்கு எடுத்துக்காட்ட வேண்டிய கட்டாயச் சூழல் தற்போது மிக அதிகமாகவே இருக்கிறது.
.
பாரதியின் பத்திரிகையுலகப் பணி 1904 நவம்பரில் ‘சுதேசமித்திரன்’ பத்திரிகை வாயிலாகத் துவங்கியது. ஆரம்பத்தில் ராய்ட்டர் செய்தி நிறுவனச் செய்திகளை தமிழில் மொழி பெயர்க்கும் பணி பாரதிக்கு கொடுக்கப்பட்டது. வெளிநாட்டுச் செய்திகளை தமிழில் தரும்போதும், நமது நாட்டின் நிலையை ஒப்பிட்டு செய்திகளை வழங்கினார் பாரதி.
.
இதனிடையே மகளிருக்கென்று துவங்கப்பட்ட ‘சக்கரவர்த்தினி’ மாத இதழின் ஆசிரியராகவும் பாரதி பொறுப்பேற்றார். அதில் பெண்கள் முன்னேற்றம் குறித்த முன்னோடிக் கருத்துக்களை அவர் எழுதினார். தனது பத்திரிகைப் பணி காரணமாக, நாட்டு விடுதலைப் போராட்டத்தில் அவர் ஈர்க்கப்பட்டார்.
.
தனது விடுதலை வேட்கையின் வேகத்திற்கு ‘சுதேசமித்திரன்’ ஈடுகொடுக்காத காரணத்தால், நிரந்தர மாத சம்பளத்தைப் பொருட்படுத்தாமல் அதிலிருந்து விலகி, 1906ல் “இந்தியா’ பத்திரிகையில் சேர்ந்தார் பாரதி. அதில் அவரது எழுத்தாவேசம் கரைபுரண்டது. சுதேசியக் கல்வி, அந்நியப்பொருள் பகிஷ்கரிப்பு, காங்கிரஸ் கட்சியின் நிலை, வெளிநாடுகளில் இந்தியர் நிலை, சமய மறுமலர்ச்சி, சமூக சீர்த்திருத்தம் உள்ளிட்ட பல முனைகளில் பாரதியின் எழுத்துக்கள் புதுவீறுடன் வெளிவந்தன.
.
இந்தியா பத்திரிகையில், வாசகர்களின் வசதிக்கேற்ப சந்தா நிர்ணயம், முதன்முதலாக கார்ட்டூன் வெளியீடு, பத்திரிகையுடன் இணைப்பாக சிறு புத்தக வெளியீடு, விவாதங்களில் வாசகர் பங்கேற்பு, தமிழ்த்தேதி குறிப்பிடுதல் உள்ளிட்ட பல புதுமைகளை நிகழ்த்திய பாரதி, ஆங்கிலேய ஆட்சிக்கு எதிராக மக்கள் கருத்தை உருவாக்குவதிலும் ஈடுபட்டார். இதனால் அரசின் கெடுபிடிகளுக்கு ஆளாகி, பத்திரிகையை சென்னையில் நிறுத்த வேண்டியதாயிற்று.
.
அரசின் கைது நடவடிக்கையிலிருந்து தப்பி புதுவை சென்ற பாரதி, அங்கிருந்து மீண்டும் இந்தியா பத்திரிகையை புதிய வேகத்துடன் நடத்தினார். அங்கு ‘விஜயா’ என்ற மாலை இதழையும் ‘பாலபாரதா’ என்ற ஆங்கில இதழையும் பாரதி நடத்தினார். தவிர, கர்மயோகி, தர்மம், சூர்யோதயம், ஞானபானு ஆகிய பத்திரிகைகளிலும் அவரது எழுத்துக்கள் வெளிவந்தன.
.
பொருளாதாரச் சிக்கல்கள் காரணமாக, புதுவையிலும் இந்தியா பத்திரிகையை நடத்த முடியாமல் போனது. அப்போதும், காளிதாசன், நித்யதீரர், உத்தம தேசாபிமானி என்ற புனைப்பெயர்களில் காமன்வீல், நியூஇண்டியா, விவேகபானு போன்ற பத்திரிகைகளில் தனது எழுத்து தவத்தைத் தொடர்ந்தார் பாரதி.
.
‘லண்டன் டைம்ஸ்’ முதல் கொல்கத்தாவிலிருந்து வெளியான ‘அமிர்தபஜார்’ பத்திரிகை வரை 50க்கு மேற்பட்ட பிற பத்திரிகைகள் குறித்தும், பிற பத்திரிகையாளர்கள் குறித்தும் 100 ஆண்டுகளுக்கு முன்னரே அவர் தனது கட்டுரைகளில் எழுதியிருக்கிறார். இவை அனைத்தும், ஆங்கிலேய அரசு கொடுத்த தொல்லைகளுக்கு மத்தியில், பெரும் பொருளாதாரச் சிக்கல்களிடையே, உடல்நலிவுற்றபோதும், பாரதி நிகழ்த்திய சாதனைகள்.
.
வாழ்வின் இறுதிக்கட்டத்தில் (1921) மீண்டும் சுதேசமித்திரன் பத்திரிகையில் பணிபுரிந்த பாரதி, சிறந்த மொழிபெயர்ப்பாளர், கவிஞர், எழுத்தாளர், முற்போக்குச் சிந்தனையாளர் என பலமுகங்களை வெளிப்படுத்தி இருக்கிறார்.
.
சாவதற்கு சில நாட்கள் முன்னரும்,  ‘சித்திராவளி’ என்ற கார்ட்டூன் பத்திரிகையையும்,  ‘அமிர்தம்’ என்ற வாரமிருமுறை இதழையும் வெளியிட அவர் முயன்றார். பத்திரிகைத்தொழில் மீதான பாரதியின் காதலையும், பத்திரிகை மூலம் சமூகத்தை மாற்ற அவர் துடித்த துடிப்பையும் இதன்மூலம் அறியமுடிகிறது.
.
பாரதி நினைத்திருந்தால், ஆங்கிலேய அரசுடன் சமரசம் செய்துகொண்டு பிரபல ‘பத்தி’ எழுத்தாளராகப் பரிமளித்திருக்க முடியும். அரசுடன் குலாவியிருந்தால், 39 வயதிலேயே குடும்பத்தை நிர்கதியாக்கி, மருந்திற்கு காசின்றி இறந்திருக்க வேண்டிய நிலையும் அவருக்கு ஏற்பட்டிருக்காது.
.
உயரிய விருதுகளுடன் வாழ்வதைவிட, நாட்டு மக்களுக்காக வாழ்வதே பத்திரிகையாளனின் கடமை என்று, அவர் இறுதிவரை உறுதியுடன் வாழ்ந்தார்.
.
இந்நாளில் பத்திரிகையாளர்களுக்கு சமூகத்தில் தனி கெüரவம் உள்ளது. அரசு அஞ்சி மரியாதை செலுத்தும் பணியாக ஊடகத்துறை மாறிவிட்டது; ஊதியமும்கூட ஊக்கமளிப்பதாகவே இருக்கிறது. ஆனால், பத்திரிகைத்துறையின் தேசியப் பங்களிப்பு உற்சாகம் அளிப்பதாக இல்லை.
.
நாட்டைக் காக்க வேண்டிய பத்திரிகைத் துறையிலும் முறைகேடுகள் பெருகிவிட்டன. அதிகாரத் தரகர்களுடனும், பதவிப் பித்தர்களுடனும் கூடிக் குலாவும் பத்திரிகையாளர்களால், ஊடகத்துறையின் நம்பகத்தன்மை பாதிக்கப்படுவதைக் காண்கிறோம். சுயபொருளாதார முன்னேற்றத்திற்காக தங்களை விற்கும் ஊடக அறிஞர்களைக் காணும்போது வேதனை மிகுகிறது.
.
இதற்கெல்லாம் ஒரே மருந்து, பாரதியின் பத்திரிகைப் பணிகளை இளம் தலைமுறையினருக்கு கொண்டுசேர்ப்பதுதான். இதழியல் பட்டப் படிப்பில் பாரதியின் பத்திரிகைப் பணிகள் பாடமாக வைக்கப்பட வேண்டும். பாரதியின் எழுத்துக்கள் அனைத்தும் ஆங்கிலம், ஹிந்தியில் மொழிபெயர்க்கப்பட்டு நாடு முழுவதும் கொண்டுசெல்லப்பட வேண்டும். தற்போதைய தறிகெட்ட பத்திரிகை உலகிற்கு மருந்து பாரதி மட்டுமே.
.
நிறைவாக, இந்தியா பத்திரிகையில் ‘நமது விஞ்ஞாபனம்’ எந்ற தலைப்பில் பாரதி எழுதிய மகத்தான வரிகள் இதோ…
.
“..இப்பத்திரிகை தமிழ்நாட்டு பொதுஜனங்களுக்கு சொந்தமானது. யாரேனும் தனிமனிதனுடைய உடைமையன்று. தமிழர்களில் ஒவ்வொருவரும் தத்தம் சொந்த உடைமையாகக் கருதி, இதைக் கூடிய விதங்களிலெல்லாம் விருத்தி செய்து ஆதரிக்க கடமைப்பட்டிருக்கிறார்கள். அவர்களுடைய பொருள் அவர்கள் நன்மையின் பொருட்டு செலவிடப்பட்டு வருகிறது. நமக்கு இதுவிஷயத்தில் ஊழியத்திற்குள்ள உரிமையே அன்றி, உடைமைக்குள்ள உரிமை கிடையாது…”
.
.