Tag Archives: புதுக்கவிதை

யாருக்கு மெத்தை?

25 May

‘கல்லும் முள்ளும்
காலுக்கு மெத்தை’-
குழந்தைப் பிராயத்தில்
நெக்குருகச் செய்த
அதே சரண கோஷம்
துணுக்குறச் செய்கிறது.
மனக்கண்ணில்
நிழலாடுகின்றன
முள்வேலி முகாம்கள்.

விரதமிருந்து நடந்த
அதே பம்பைப் படுகை
முள்ளி வாய்க்காலாய்
தென்படுகிறது. Continue reading

இறைமை – 2

25 May

நெடிதுயர்ந்த தென்னையின்
மிளிரும் கீற்றசைவில்
இறைமையின் தாண்டவம்.
அதனருகில் பாயென கிடக்கும்
பைம்பொழிலின் நுனிமென் நடனத்தில்
இறைமையின் குதூகலம்.
வரப்பில் நீர் பாய்ச்சும் 
வெற்றுடம்பு முண்டாசுக் காரரின்
வியர்வையில் வெளிப்படும் 
இறைமையின் உழைப்பு.

.

முரண் – 2

24 May

‘உயர்ந்த கல்வித் தரம்
வெளிநாட்டில் வேலைவாய்ப்பு
உங்கள் திறமைக்கு சவால்
எல்லாம் கிடைக்கும்,
எங்கள்
கம்ப்யூட்டர் கல்வியகத்தில்’…

சிறுவன் கொடுத்துச் சென்ற
விளம்பர நோட்டீசை
படித்துக்கொண்டே பார்த்தேன்-
இடுப்பில் டிராயர்
நழுவும் சிறுவனை.

.

சிகிச்சை 

24 May

 

தலைவலி போக
மாத்திரையை மட்டுமல்லாது
வயிற்று வலியையும் வாங்கி,
வயிற்று நோவுக்காக 
வயிற்றை அறுத்து, 
இப்போது
தையலில் வலி.
அலோபதியின்
கடைக்கண் பார்வையை 
நினைக்குந்தோறும்
நரம்பில் ஊசி ஏறுகிறது.

விஜயபாரதம் (28.01.2000)

அற்ற குளத்து அறுநீர்ப் பறவைகள்!

23 May
அங்கிருந்து இங்கும்
இங்கிருந்து அங்கும்
அல்லாடும் பறவைகள்.
எங்கேனும் அன்பும் ஆதரவும்
கிட்டக்கூடும் என்பது
இறகுகளின் ஓசை.
.
தொழில்வயிற் பிரிந்து
ஆயிரம் காதம் தாண்டி
மூட்டை முடிச்சுக்களுடன்
நம்பிக்கைப் பயணம்-
இரவல் வாழ்க்கை.

Continue reading

குடி 

23 May

குடித்துவிட்டு வாகனம்
ஓட்டுகிறார்களா?
என்று சோதிக்கும்
சாலையோரக் காவலரின்
வாயில்
சாராய வீச்சம்.

விஜயபாரதம் (22.10.1999)

முரண்

22 May

ஊரெங்கும்
ஊரடங்கு போல் 
அடைத்துக் கிடக்கின்றன
எல்லாக் கடைகளும்
தொழிற்சாலைகளும்.

போன வருடம் 
சேது சமுத்திரத் திட்டத்துக்காக;
இந்த வருடம் 
இலங்கைத் தமிழருக்காக.

சாயாக் கடைகளும் கூட 
இல்லவே இல்லை.

விடுதியில் தங்கி 
வேலைக்குச் செல்பவர்கள்
வேறு வழியின்றி 
உண்ணாவிரதம்.

‘டாஸ்மாக்’ கடைகளில் 
மட்டும் 
ஜெகஜோதியாகக் கூட்டம்.

 

(2009-ல் எழுதியது; இன்றும்- கொரோனா காலத்திலும்- பொருந்துகிறது!)

சாஸ்வத சமதர்மம்

22 May

எரிந்து கொண்டிருந்தது அது. 
நேற்றுவரை அது 
அவராக இருந்தது.
அவர் – கோடீஸ்வரர்.

அருகிலேயே 
அதுவும் எரிந்தது.
இன்று காலை அது 
அவனாக இருந்தது.
அவன்- அநாதை.

நாளை 
இரு சவச் சாம்பல்களும் 
மண்ணில் கலந்திருக்கும்.

வெட்டியான் 
காத்திருக்கிறான் –
நாளை வரப் போகும் 
பிணங்களுக்காக. 

விஜயபாரதம் (06.11.1998)

அஞ்சலி

21 May

அவர் ஒரு மகான்;
சிறந்த தீர்க்கதரிசி;
இணையில்லாப்
பெருந்தலைவர்;
அவரது எண்ணங்கள்
எக்காலத்துக்கும்
ஏற்புடையவை;
முக்காலமும் உணர்ந்த
முனிவர் அவர்.
பிறந்த நாளிலேயே 
இறந்துபோன 
பெருந்தகை அவர். Continue reading

பவனி

18 May


ஓபெல் அஸ்திரா
மாருதி ஜென்
கான்டசா கிளாசிக்
அம்பாசிடர்
பிரீமியர் பத்மினி
ஹூண்டாய் சான்ட்ரோ…
பலநிற கார்கள்
பவனி போகின்றன-
நடைபாதையில் உறங்கும்
நாடோடியைக் கடந்து.

விஜயபாரதம் (24.09.1999)
%d bloggers like this: