Tag Archives: பூனை

பூனைக்குட்டி 

14 May

அறைக்குள்ளிருந்த புழுக்கம்
வெளியே வந்தவுடன்
அடித்த வெயிலில்
காய்ந்து போனது தெரியாமல்
கால்கள் நடக்கின்றன.
நேற்று இந்நேரம்
வீட்டில் கடும் மழை.
குளிருக்கு இதமாக
போர்வைக்குள் சுருண்டிருந்த 
கால்களினிடையே 
சுருண்டிருந்தது 
பட்டு ரோமப் பூனைக்குட்டி.

Continue reading

பூனை

14 May
பஞ்சென ஸ்பரிஸ மென்மை
பாலெனத் தூய வெண்மை.
துஞ்சுதல் அற்ற கண்கள்
தூய்மையை நாடும் உள்ளம்.
அஞ்சிடுமாறு கீறும்
ஆணியே நகங்களாகும்.
வஞ்சகம் அற்ற வாழ்வு
வாலிலே நடனமாடும்.
நஞ்சையும் ஜீரணித்து
நாவினால் அருகு மெல்லும்.
கொஞ்சிடு விறைத்த காது
கோபமோ உறுமும்போது.
சஞ்சலமின்றி வேட்டை
சாகசங் காட்டி ஓடும்.
வெஞ்சினம் வந்துவிட்டால்
வேங்கையாய்க் கூரும் பற்கள்.
ரஞ்சகமான தோற்றம்
ராகமாய்ப் பாடிக் கூவும்.
நெஞ்சிலே கொண்ட அன்பு
நேசமே பூனை ஆகும்.
.

பூனைக்குட்டி போல!

11 Mar


பால் பூத்தில் சுகமாகத் தூங்குகிறது பூனைக்குட்டி-
பாம்பையும் கிழிக்கும் நகங்களை மறந்து.
பசி இல்லாததால் ருசியும் இல்லை-
பதற்றம் இல்லை; வாலாட்டும் பரபரப்பு இல்லை.
சக்கைப் பாலைக் குடித்துக் குடித்து
எலிவேட்டை ஆடும் வேட்கை மறந்தது.
இருளிலும் ஒளிரும் கண்களை மூடி
நிஜமாகவே தூங்குகிறது பூனைக் குட்டி.
பக்கத்திலேயே பால் பாத்திரம் இருப்பதால்,
தன்னியல்பு மறந்து தூங்குகிறது பூனைக் குட்டி-
பத்திரிகை அலுவலகத்தில்
பணியாற்றும் கவிஞனைப் போல.

 

-விஜயபாரதம் (2005)

பாற்கடல்

31 Jan

புதிதாய்க் கட்டிய வீட்டில் இன்னும்

பால் காய்ச்சவில்லை.

அதற்குள்

மாடிப்படிக்கடியில்

நான்கு குட்டிகளுடன்

குடித்தனம் நடத்துகிறது

எங்கிருந்தோ வந்த பூனை.

தாயில்லாச் சமயம்

கோணிப்பையில் தூக்கிப் போட

நெருங்குகையில்

விரல்களை வேகமாய் நக்குகிறது

கண் திறவாக் குட்டி,

பாற்கடல் ஊற்றென எண்ணி!

%d bloggers like this: