Tag Archives: மகாத்மா காந்தி

வாழ்க நீ எம்மான்!

30 Jan

வாழ்நாளெல்லாம் சத்தியசோதனை செய்த,
எனது வாழ்வே எனது செய்தி என்று சொன்ன,
மக்களிடமிருந்தே தனது போராட்ட வழிமுறைகளை உருவாக்கிக்கொண்ட,
தனது தவறுகளை ஒப்புக்கொள்ளத் தயங்காத,
அதிகாரபீடம் மீது என்றும் ஆசை கொள்ளாத,
மாமனிதரின் நினைவுநாள் இன்று.

மகாகவி பாரதியால் ‘வாழ்க நீ எம்மான்’ என்று பாடப்பட்ட அந்த மகத்தான மனிதருக்கு,
மகாத்மா காந்திக்கு எனது கண்ணீர் அஞ்சலி.

அவரது அனைத்துக் கருத்துகளுடனும் அனைவரும் உடன்பட முடியாமல் போகலாம். ஆனால், அவர் தனக்கென எதையுமே சொல்லவில்லை என்பது முற்றிலும் உண்மை. அதனால்தான் அவரை மகாத்மா என்கிறோம்.

காந்தியின் மரணம் அவரது பிம்ப வீழ்ச்சியைத் தடுத்தது; காங்கிரஸ் கட்சிக்கு அடுத்தடுத்த தொடர் வெற்றியத் தந்தது. அவரது சகிப்புத்தன்மையையும் மதச்சார்பின்மையையும் கொள்கைரீதியாக எதிர்த்தவர்கள் கட்டம் கட்டப்பட்டார்கள். நாதுராம் கோட்சே அவரைக் கொல்லாமல் இருந்திருந்தால், சரித்திரம் வேறு திசையி்ல் பயணித்திருக்கும். இந்தியாவின் விதி வலியது போலும்.

காந்தியின் உண்மையான வாரிசுகள் எவரும் பதவிமோகத்திலோ, ஆட்சி சுகத்திலோ இதுவரை -அவரது பெயரைப் பயன்படுத்தி- திளைக்கவில்லை. ஆனால், காந்தி குடும்பத்துக்கு சற்றும் தொடர்பில்லாத ஒரு குடும்பம் – நேருவின் குடும்பம்- காந்தி என்ற பெயரைப் பயன்படுத்தி நாட்டை ஆண்டிருக்கிறது. இன்றும் ஆளத் துடிக்கிறது. இதுவே காந்தி கொலையால் விளைந்த விபரீதம்.

இந்திய வரலாற்றில் இரட்டை ஆயுள் தண்டனை பெற்ற மாவீரர், தியாகத் தழும்பேறிய மகான் வீர சாவர்க்கர் காந்தி கொலையில் தொடர்புபடுத்தப்பட்டு கைது ஆனார். அதன் விளைவாக அவரது நற்பெயர் குலைந்தது. நேருவுக்கு மாற்றாக வந்திருக்க வேண்டிய ஓர் ஆளுமை காந்தி கொலையால் திட்டமிட்டுச் சிதைக்கப்பட்டது.

இன்று, முகநூல் பதிவுகளில் கோட்சேவின் செயலை- காந்தி படுகொலையை- நியாயப்படுத்தும் பதிவுகள் பலவற்றை ஹிந்து அபிமானிகள் சிலர் செய்வதைக் கண்டேன். அதற்கு சற்றும் சளைக்காமல் காந்தி கொலையாளிகள் என்று ஆர்.எஸ்.எஸ். அமைப்பைத் தூற்றும் பதிவுகளையும் கண்டேன். இவ்விரு தரப்பினருமே, காந்தியையோ, சரித்திரத்தையோ புரிந்து கொள்ளாதவர்கள்.

கொல்லப்படுவதற்கு ஆறு மாதங்களுக்கு முன்னர் கூட ஆர்.எஸ்.எஸ். முகாமுக்கு வந்தவர் மகாத்மா காந்தி. அவரைக் கொன்ற கோட்சேவே, எனக்கும் ஆர்.எஸ்.எஸ். அமைப்புக்கும் தொடர்பில்லை என்று சொல்லி இருக்கிறார். அவரது நீதிமன்ற வாக்குமூலம் தனி நூலாகவே கிடைக்கிறது. ஆனாலும், காந்தி கொலையின் தீராப் பழி ஆர்.எஸ்.எஸ். அமைப்பைத் தொடர்கிறது. இது புரியாமல் ஹிந்து அபிமானிகள் சிலரும் காந்தி கொலையை நியாயப்படுத்தி வருவது முட்டாள்தனம்.

ஆர்.எஸ்.எஸ். அமைப்பின் தொடர்புக்கு வரும் முன் எனக்கும் மகாத்மா காந்தி மீதும், அவரது அஹிம்சைக் கோட்பாடு மீதும் அதிருப்தி இருந்தது. சங்கத் தொடர்பால்தான் நான் காந்தி குறித்த தெளிவை அடைந்தேன். அவர் நிச்சயமாக மகாத்மா தான். எனவேதான் தினமும் காலையில் பாடும் ஏகாத்மதா ஸ்தோத்திரத்தில் (பிராதஸ்மரனம்)
காந்தியின் பெயரை லட்சக் கணக்கான சங்க ஸ்வயம்சேவகர்கள் பாடி வருகின்றனர். இதனை ஏற்பாடு செய்த சங்க முன்னோடிகள் அறியாதவர்கள் அல்ல.

பல்லாயிரம் ஆண்டுகளுக்கு ஒருமுறை மட்டுமே காந்தி போன்ற தலைவர்கள் தோன்றுவர். அவரது முடிவுகளில் பல பிழையானவையே. நேதாஜிக்கு எதிரான அவரது பிடிவாதம் அதில் ஒன்று. முஸ்லிம் அடிப்படைவாதம் குறித்த அவரது புரிதல் தவறானது. அவரும் மனிதரே. ஆனால், நேருவுடன் அவரை சமன்வைக்க முடியாது; கூடாது..

ஹிந்த் ஸ்வராஜ், ராமராஜ்யம், அஹிம்சை, சத்யாகிரஹம் ஆகிய கருத்தாக்கங்கள் சாதாரணமானவை அல்ல. இன்று காந்தியின் பெயரை வெளிப்பார்வைக்கு உச்சரிக்கும் பலரும் அவரது ஹிந்துத்துவ ஆழத்தை அறியாதவர்கள் அல்ல. ஆனால், இன்று வெற்றி இலக்கை நோக்கிப் பயணிக்கும் ஹிந்துத்துவ சித்தாந்தத்தைத் தடுக்கவே, அரை மனதுடன் காந்தி பெயரை அவர்கள் பயன்படுத்துகின்றனர். இதை ஹிந்து அபிமானிகள் முதலில் உணர வேண்டும்.

மகாத்மா காந்தி ஓர் இணையற்ற ஹிந்து.
அதைவிட மிகச் சிறந்த தேசபக்தர்.
அதைவிட மிகச் சிறந்த மனிதர்.
உலகம் தழுவிய அதிமானுடர் அவர்.
ஹிந்துத்துவத்தின் உண்மையான பிரதிபலிப்பு அவர்.

அவரைத் தூற்றுவோருக்கும் சேர்த்து,
அவர் பெயரால் அரசியல் எண்ணத்துடன் பிறரைத் தூற்றுவோருக்கும் சேர்த்து,
எனது அஞ்சலியை மகாத்மாவுக்குக் காணிக்கை ஆக்குகிறேன்.

வாழ்க நீ! எம்மான்,
இந்த வையத்து நாட்டி லெல்லாம்
தாழ்வுற்று வறுமை மிஞ்சி
விடுதலை தவறிக் கெட்டுப்
பாழ்பட்டு நின்ற தாமோர்
பாரத தேசந் தன்னை
வாழ்விக்க வந்த காந்தி
மஹாத்மா நீ வாழ்க, வாழ்க!

Advertisements

தன்னல மறுப்பும் அகிம்சையும் இன்றைய தேவை

2 Oct

 

தினமலர் – ஈரோடு (02.10.2001)

அறவழிப் போராட்டத்தின் மூலமே அடிமைத்தளையை நொறுக்க முடியும் என்று வாழ்ந்து காட்டியவர் அண்ணல் மகாத்மா காந்தி.  நாட்டு விடுதலைக்காக சுதந்திரப் போராட்டத்துக்கு தலைமை தாங்கிய அத்தலைவர், விடுதலை பெற்ற தேசத்தில் ஆட்சித்தலைமை ஏற்க மறுத்தது, உலக வரலாற்றில் இன்றும் அதிசயமாகவே பார்க்கப்படுகிறது.

அவரது தனிப்பட்ட வாழ்க்கை ஒரு திறந்த புத்தகம். அவரது அரசியல் கொள்கைகள் குறித்து மாறுபட்ட கருத்துகள் பலருக்கு உண்டென்றாலும்கூட, அவரது சத்திய சோதனையான வாழ்க்கையை வியந்து போற்றவே செய்கிறார்கள். அகிம்சையை போதித்த புத்தர் பிறந்த நாட்டில், அந்த அகிம்சையையே ஆயுதமாக்கிக் காட்டிய மாவீரர் அல்லவா மகாத்மா!

உண்ணாவிரதத்தைக் கூட சக்தி வாய்ந்த ஆயுதமாக்கிக் காட்டியவர்; சாதாரணமான உப்பை சுதந்திரத்தின் சின்னமாக மாற்றிக் காட்டியவர்; ராட்டை நூற்பதையே விடுதலை வேள்வியாக உருவாக்கியவர், மகாத்மா காந்தி. அவரது தலைமையில் எண்ணற்ற தியாகியர் செங்குருதி சிந்தி, கல்லுடைத்து, வெஞ்சிறையில் வாடி, பாடுபட்டுப் பெற்றதுதான், இன்று நாம் இன்பமாக அனுபவிக்கும் சுதந்திரம்.

நாட்டில் ஊழலும், பிரிவினைவாதமும், சுயநலமும் பெருகியுள்ள இன்றைய சூழ்நிலையில், தேசத்தின் நோய் தீர்க்கும் அருமருந்து, காந்திஜி பரப்பிய தன்னல மறுப்பே!

உலகில் பயங்கரவாதம் கோரத்தாண்டவம் ஆடும் சூழலில், போர்மேகம் விரிந்து பரந்து உலகை அச்சுறுத்தும் இன்றைய அவசர காலகட்டத்தில், மானிட உலகுக்கு சமய சஞ்சீவினியாக விளங்குவது, மகாத்மா காந்தி வலியுறுத்திய அகிம்சைக் கொள்கையே.

எளிய வாழ்வு வாழ்ந்த அந்த அரிய திருமகனாரின் பிறந்த தினமான இன்று, அவரது நினைவைப் போற்றும் வகையில்,  அவரது லட்சியங்களை நினைவுகூர்வோம்! இன்றைய நமது தேவை, தன்னல மறுப்பும் அகிம்சையும் மட்டுமே!

 

-தினமலர் (ஈரோடு பதிப்பு)- 02.10.2001

 

.

 

 

உலகிற்கு வழிகாட்டும் சுவாமி விவேகானந்தர்!

14 Sep

மூன்றே வார்த்தைகளில் ஒரு நாட்டையும் மக்களையும் கவர்ந்து வெற்றிக்கொடி நாட்ட முடியுமா? அதுவும் அறிவில் சிறந்தவர்களும் பல மதத் தலைவர்களும் நிறைந்த சபையில், தனியொருவனாக நின்று அனைவரது உள்ளங்களையும் கொள்ளையிட முடியுமா?

இதை நடத்திக் காட்டியவர் சுவாமி விவேகானந்தர். இன்றைக்கு 120 ஆண்டுகளுக்கு முன், அமெரிக்காவின் சிகாகோ நகரில், 1893, செப்டம்பர் 11 ஆம் தேதி நடைபெற்ற உலக சர்வ சமயப் பேரவையில் பாரதத்திலிருந்து இந்து சமயப் பிரதிநிதியாகப் பங்கேற்றவர் விவேகானந்தர். அந்த மாநாட்டின் நோக்கங்களை வரையறுத்தவராக அவர் மாறியது ஓர் உலக அதிசயம்.

அப்படி என்ன அவர் புதிய விஷயங்களைச் சொல்லிவிட்டார்? உலகைப் பீடித்திருக்கும் பிரிவினைவாதமும், அளவுக்கு மீறிய மதப்பற்றும், மதவெறியும் உலகை ரத்தக்களரியாக்குகின்றன என்ற அவரது கருத்தில் புதுமை ஏதும் இல்லை. இதை பல நூற்றாண்டுகளுக்கு முன்னமே, சிலுவைப் போர்களின் போதே உலகம் உணர்ந்துவிட்டது. எனில், விவேகானந்தரை மற்றவர்களிடமிருந்து வேறுபடுத்திக் காட்டியது எது?

இங்கு தான் பாரதத்தின் ஆன்ம வலிமை வெளிப்படுகிறது. விவேகானந்தர் உண்மையில் இந்து சமயப் பிரதிநிதியாக மட்டும் உலக சர்வ சமயப் பேரவையில் பங்கேற்கவில்லை. அவர் அங்கு ஆறு நாட்களில் நிகழ்த்திய உரைகளை வாசிக்கும் எவரும் அவரது தேசபக்தியால் புளகாங்கிதம் அடைவர்.

உலகில் மதவெறியால் பாதிக்கப்பட்டவர்கள் அனைவருக்கும் புகலிடம் அளித்த நாட்டிலிருந்து வந்தவன் என்றுதான் தன்னை முதல் நாள் பேச்சில் விவேகானந்தர் அறிமுகப்படுத்திக் கொண்டார். யூதர்களுக்கும் பார்ஸிகளுக்கும் அடைக்கலம் கொடுத்த நாட்டிலிருந்து வருபவன் நான் என்று அவர் நெஞ்சு நிமிர்த்திப் பேசினார். இந்த நெஞ்சுரத்துக்குத் தகுதி உடையவர்கள் வேறு எவரும் அங்கிருக்கவில்லை.

’எங்கெங்கோ தோன்றும் ஓடைகள் அனைத்தும் இறுதியில் கடலில் சங்கமிப்பதைப் போல அனைத்து மதங்களும் இறைவனிடம் சென்று சேர்கின்றன’ என்ற பொருள் தரும், பாரத மக்கள் அன்றாடம் பாடும் சிவ மகிமை ஸ்தோத்திரத்தை அந்தச் சபையில் விவேகானந்தர் பாடியபோது, அடிமை தேசத்தின் ஆண்மை மிக்க ஆன்மா பேசியதை சபை உணர்ந்தது.

இதுதான் அந்த மாநாட்டில் பேசிய பிற மதத் தலைவர்களிடமிருந்து விவேகானந்தரை வேறுபடுத்திக் காட்டியது. உலகம் முழுவதும் மதவெறி தலைவிரித்தாடுகையில் மானுடம் என்ன ஆகுமோ என்ற கவலையில் கூடிய அம்மாநாட்டிற்குத் தெளிவான வழிகாட்டுதலை, ஓர் இந்துத் துறவி என்ற முறையில் விவேகானந்தரால் கச்சிதமாகவும் உறுதியாகவும் வெளிப்படுத்த முடிந்தது.

அவரது பேச்சின் துவக்கமே அதை அடிக்கோடிட்டுக் காட்டியது. ’அமெரிக்கா வாழ் சகோதர சகோதரிகளே’ என்ற மூன்றே வார்த்தைகளில், அங்கு கூடியிருந்த 7 ஆயிரம் பேருக்கும் தான் அடுத்து என்ன சொல்லப் போகிறேன் என்பதை அவர் தெளிவுபடுத்திவிட்டார்.

பரிபூரணமான இதயசுத்தியால் அமைந்த கம்பீரமான உடல்மொழியும், தியாகமும் துறவும் அமைத்துக் கொடுத்த அற்புதமான மனத்தெளிவும் அவருக்குப் பொலிவூட்டின. தனது இதய அன்பின் ஆழத்திலிருந்து அவர் கூறிய அச்சொற்கள் போலித்தனமானவை அல்ல என்பதை அந்த விநாடியே சர்வ சமயப் பேரவை உணர்ந்தது. அதனால் தான் வேறு யாருக்கும் கிட்டாத மிக நீண்ட கரவொலியும் வரவேற்பும் அந்த இளம் துறவிக்கு அங்கு கிடைத்தன.

அடுத்தடுத்த நாட்களில் சபையில் சோர்வு ஏற்பட்ட போதெல்லாம் விவேகானந்தரைப் பேச அழைத்து, சர்வ சமயப் பேரவை நிர்வாகிகள் பெருமை பெற்றனர்.  ‘இந்தியாவின் இளம்புயல்’ என்று அமெரிக்கப் பத்திரிகைகள் அவரை வர்ணித்தன. அதற்கடுத்த ஆண்டுகளில் அமெரிக்காவிலும் இங்கிலாந்திலும் அவர் நிகழ்த்திய தொடர்  பிரசாரம், வெளிநாடுகளில் இந்தியா குறித்து உருவாகியிருந்த தவறான கருத்துகளை மாற்றி அமைத்தது.

பல நூறு ஆண்டுகளாக பல்வேறு நாடுகளால் சூறையாடப்பட்ட போதும் இந்தியா தனது ஆன்ம வலிமையை இழக்கவில்லை. படையெடுத்து வந்தவர்களையும் சுவீகரித்து, ஜீரணித்து, அவர்களையும் அவர்களது புதிய மதங்களையும் மனமார அரவணைத்ததால் தான் பாரதம் உலகிற்கே வழிகாட்டும் தகுதி பெற்றது. இதற்கு பாரதத்தின் பன்னெடுங்காலப் பாரம்பரியமும் “யாதும் ஊரே யாவரும் கேளிர்’ என்ற பண்பாட்டு விழுமியங்களும் தான் காரணம்.

அத்தகைய, உலகையே ஒரு குடும்பமாகப் பாவிக்கும் ’வசுதைவ குடும்பகம்’ என்ற உபநிடத மகாவாக்கியம் அல்லவா விவேகானந்தரை உருவாக்கியது? அதுவல்லவா பிற்காலத்தில் மகாத்மா காந்தியையும் உலகிற்கு ஈந்தது! இதை உலகம் மறந்ததால் அல்லவா, 2001ஆம் ஆண்டில் இதே செப்டம்பர் 11ஆம் தேதி அமெரிக்காவின் இரட்டைக் கோபுரங்கள் தகர்க்கப்பட்டு ஆயிரக் கணக்கான மக்கள் மடிந்து போயினர்!

இன்றும்கூட நாள்தோறும் உலகில் நிகழும் மதவெறி சார்ந்த நிகழ்வுகளும் அதற்கு பரிதாபமாகப் பலியாகும் மனித உயிர்களும் தொடர்ந்து கொண்டுதான் இருக்கின்றன. இதற்கெல்லாம் தீர்வாக உலகிற்கு விவேகானந்தரின் போதனைகளை மீண்டும் முன்வைக்கும் பொறுப்பு பாரதத்திற்கே உள்ளது. சுவாமி விவேகானந்தரின் 150ஆவது ஜெயந்திக் கொண்டாட்டங்கள் நிகழும் இந்த ஆண்டைவிட அதற்கு மிகவும் பொருத்தமான தருணம் வேறு எது?

தினமணி இணையதளம்  (14.09.2013)

ஜனவரி முப்பது

2 Oct

இன்று காந்திஜி இறந்த தினம்.

மாலைகளைச் சுமக்க முடியாமல்
தள்ளாடும் அவர் மேல்
காகம் உட்கார்ந்து
கரைந்து கொண்டிருக்கிறது.

பாவம் காந்திஜி!

அருகில் நெருங்கினால்
‘மணம்’ வீசுகிறதே?
யாரோ சாணாபிஷேகம்
செய்திருக்க வேண்டும்.

சுதந்திர ஜனநாயகம்!

அவர் காங்கிரஸ் கட்சி
என்றல்லவா எண்ணியிருந்தேன் –
எல்லாக் கட்சிக் கொடிகளையும்
ஏந்தியிருக்கிறாரே?

பரந்த மனப்பான்மை?
இல்லை…
பக்கா சுயநலம்!

சிற்பி ஊன்றுகோலை
கையுடன் நன்கு
பிணைத்திருக்கலாம் –
பாருங்கள்,
காந்திஜி ஊன்றுகோலில்லாமல்
தள்ளாடுவதை!

கட்சிக்கொடிகள்
இருப்பதால் தான்
அவர்
நின்று கொண்டிருக்கிறார்!

கட்சிகள் வாழ்க!

என்ன கண்ணாடியையும்
காணவில்லை?
ஊன்றுகோலை உருவியவன் தான்
கண்ணாடியையும்
களவாடியிருப்பான்!

பரவாயில்லை,
அவருக்கு எளிமையே
விருப்பம்!
நல்ல வேளை
உடையையாவது சிமென்ட்டில்
செய்தார்கள்!

ஒருவரையே
பார்த்துக் கொண்டிருந்தால் எப்படி?
இந்தப்புறம்
ஒருவர் இருப்பாரே?

ஆஹா…
அதோ…

-விஜயபாரதம் (29.01.1999)

.